Ngan Ayuweg e Girdi’ Nge Yib Angin Fare Biyul’ Ngorad Ran
Madenomnag e Yam’ ni Tay Kristus ko April 12
1. Mang reb e kanawo’ nrayog ni nge dag girdien Got ni yad ma tay fan fare biyul’?
1 ”Ngad pininged e magar ngak Got ko tow’ath ni ke pi’ ngodad ndabiyog puluwon!” (2 Kor. 9:15) Pi thin nem e be dag ko uw rogon u wan’dad ya daken Fak ni Jesus Kristus ma ke dag Got felngin nge rogon ni gad ba t’uf rok. Gad ra dag ni gad ma tay fan e re n’em ni faan gad ra muulung u taabang ko April 12 ni fan ko Puguran ko yam’ ni tay Kristus.
2. Mini’ e ma un ko pi tapigpig rok Jehovah ko Puguran, ma mang e ba t’uf ni ngar rin’ed ni nge yib angin ngorad fare biyul’?
2 Sogonapan ragag i milyon e girdi’ ni yad ma un ko pi tapigpig rok Jehovah ngar muulunggad ko Puguran u gubin e duw. Ma aram ma yad be dag ni yad ma tay fan fare maligach ni pi’ Kristus. Machane ba t’uf ni nge mich u wan’rad fare biyul’ ni nge yib angin ngorad. (John 3:16, 36) Uw rogon nrayog ni ngad ayuweged e girdi’ nge mich u wan’rad? Nap’an e ngiyal’ ko Puguran ma ngad pininged yad ngar filed e Bible mar uned ko pi muulung ko ulung. Ngam lemnag e pi n’en ney ni baaray.
3. Uw rogon nrayog ni ngad tababnaged e Bible study u nap’an ni gad ra pining e girdi’ ngar uned ko Puguran?
3 Pi Bible Study: Nap’an ni ngam pining e girdi’ ngar uned ko Puguran, ma ngam guy rogon ni ngam tababnag e Bible study u daken fare babyor ni Ngam Par ni Gab Fas. Ngam mog ni rayog ni ngam weliy u murung’agen fare Puguran ko pi thin ni bay ko page 201-2 ma ngam filew e pi thin ko paragraph 29 nge 30. Rayog ni ngam filew e pi thin nem ko taab yay ara l’agruw, ma sana ngan fil e Bible u langan e mab. Nap’an ni kam mu’gow i fil e pi thin nem ma sana ra adag facha’ ni nge fil paragraph 10-19 ko guruy ni 6 ni “Jesus Kristus—Got e L’og?” Nap’an ni kan duguliy e Bible study ma ngan sul nga tabolngin ma ngan fil fa lal guruy ni tin som’on ko re ke babyor nem.
4. Mini’ ni rayog ni ngad filed e Bible ngorad u nap’an e ngiyal’ ko Puguran?
4 Mini’ ni rayog ni ngad studygad ni aram rogon? Sana rayog ni ngad filed e Bible ko girdi’ u tabon e maruwel rodad ara piin ni gad ma un ko skul, ara piin buguli yoror rodad. Pi walag ni pumoon e rayog ni ngar guyed figirngin e pi walag ni ppin ko ulung ni dawora uned ko machib. Ma dabda paged talin e girdi’ rodad ni gathi yad e Pi Mich. Maku gad ba adag ni ngad pininged ko Puguran e piin ni kar uned ko ulung kafram. (Luke 15:3-7) Ngad guyed rogon ni ngad ayuweged urngin e girdi’ nge yib angin ngorad fare biyul’.
5. Uw rogon nrayog ni ngad pied e athamgil nga laniyan’ e pi Bible study nge yugu boch e girdi’ ni ngar uned ko pi muulung ko ulung?
5 Pi Muulung ko Ulung: Boor e Bible study nge yugu boch e girdi’ ma fare Puguran e aram e bin som’on e muulung ni yad ra un ngay. Uw rogon nrayog ni ngad pied e athamgil nga lanin’rad ngar uned ko tin ni ka bay e muulung rodad? Fare Machib Rodad Ni Fan Ko Gil’ilungun Got ko April 2005, page 8, e be weliy ni gaar: “Ngam weliy kenggin e bin migid e public talk. Ngam dag ngorad e n’en ni ngan fil u nap’an fare muulung ni Watchtower Study nge fare Congregation Book Study. Ngam weliy u murung’agen fare Theocratic Ministry School nge Service Meeting. Nap’an ni ga ra pi’ e talk ko school, ma rayog ni ngam practice ngar rung’aged. Ngam tamilangnag ngorad u murung’agen e pi n’en ni kan weliy u nap’an e muulung. Ngam dag e pi sasing u lan e pi babyor rodad ni rayog ni ngar guyed ko uw rogon e pi muulung. Bin som’on yay ni ngam studygow be’ ma ngam pining nge un ko muulung.”
6. Mang l’agruw e kanawo’ nrayog ni ngad ayuweged e piin nib yul’yul’ ni nge yib angin ngorad fare biyul’?
6 Nap’an ni ma un e piin nib yul’yul’ ko Bible study nge pi muulung ko ulung u gubin ngiyal’ ma yad ma mon’og iyan ko tirok ban’en nib pay. Ere ngad pininged e girdi’ ngar uned ko pi n’en ney ko tirok Got ban’en ni nge yib angin ngorad e bin th’abi ga’ fan e tow’ath ni pi’ Got—ni aram fare biyul’.