Ma Tow’athnagdad Jehovah ko Athamgil ni Gad Ma Tay ni Ngad Uned ko Puguran

1-2. Mang fan ni gad ma un ko Puguran ni gubin e duw?

BA CHUGUR ni nge gaman 2,000 e duw ni ke yan, me pi’ Jesus e yafos rok ni fan ngodad ni aram e n’en ke bing e kanawo’ ni nge yag e yafos ni manemus ngodad. Fare nep’ u m’on ni nge yim’, me tababnag ba madnom ni fanay e flowa nge wain riy ni nge tay chilen ngak pi gachalpen ni ngaur pugeduran ngorad e maligach ni pi’.—1 Kor. 11:23-26.

² Gad ma fol ko n’en ni tay Jesus chilen ni bochan e rib t’uf rodad. (John 14:15) Gubin e duw ni gad ma tay e tayim ni ngad lemnaged angin e yam’ ni tay ni fan ko girdi’ u m’on ngu tomuren e Puguran, ya ngad daged nib ga’ fan u wan’dad e n’en ke rin’. Ku gad ma felfelan’ ngay ni ngad yoornaged e tayim rodad ni fan ko machib ma gad pining urngin e girdi’ nrayog rodad ni ngar uned ngodad ko re madnom ney nib ga’ fan. Kud dugliyed u wan’dad ndab da paged ban’en ni nge talegdad ndab da uned ko Puguran.

3. Mang e gad ra weliy ko re article ney?

³ Gad ra weliy ko re article ney dalip e kanawo’ ni ke athamgil e girdi’ rok Jehovah u rogon nrayog rorad ni ngar madnomnaged e yam’ ni tay Jesus, ni aram e: (1) yad ma madnomnag fare Puguran u rogon kanawoen ni yog Jesus ni ngan rin’ riy, (2) yad ma pining e girdi’ ni ngar uned ko fare Puguran, nge (3) yad ma madnomnag fare Puguran ni yugu aram rogon nib mo’maw’ ngorad.

YAD MA MADNOMNAG FARE PUGURAN U ROGON KANAWOEN NI YOG JESUS NI NGAN RIN’ RIY

4. Mang boch e deer ni yima pi’ e fulweg riy u nap’an e Puguran ni yima tay u gubin duw? Mang fan nsusun e yugu dab da darifannaged e pi n’ey ni kad nanged e fulweg riy? (Luke 22:19, 20)

⁴ Gubin e duw ni gad ma motoyil nga reb e welthin nib puluw ko Bible ni yima pi’ u nap’an e Puguran ni be weliy e fulweg u boor e deer. Gad ma fil fan nib t’uf ni ngan biyuliy e girdi’ nge rogon nrayog ni nge biyuliy taabe’ e denen rok boor e girdi’. Yima puguran ngodad e n’en be yip’ fan fare flowa nge fare wain nge piin nsusun e ngar ked e flowa mar unumed e wain. (Mu beeg e Luke 22:19, 20.) Ku gad ma fal’eg i lemnag e pi tow’ath nra yag ngak e piin yad be athapeg e par u fayleng. (Isa. 35:5, 6; 65:17, 21-23) Ere susun e yugu dab da darifannaged e pi n’ey ni kad nanged e fulweg riy ni bochan e bokum bilyon e girdi’ ndawori tamilang u wan’rad, maku dar nanged feni ga’ fan e maligach ni pi’ Jesus. Ku darur madnomnaged fare Puguran ko yam’ ni tay u rogon kanawoen ni yog ni ngan rin’ riy. Mang fan?

5. Uw rogon ni tabab e girdi’ ni ngar madnomnaged e yam’ ni tay Jesus u tomuren ni yim’ yooren e apostal?

⁵ De n’uw nap’an nga tomuren ni ke yim’ yooren e apostal rok Jesus, me yib boch e Kristiano ni googsur nga lan e ulung. (Matt. 13:24-27, 37-39) Ur weliyed boch ban’en “nde riyul’ ngar pow’iyed e piin ni ke mich Jesus u wun’rad nga bang ngar uned ngorad.” (Acts 20:29, 30) Reb e machib “nde riyul’” ni munmun mar tababgad i weliy e aram fare machib ni be yog nde ognag Jesus downgin “nri taab yay ni nge chuweg e denen rok boor e girdi’” ni bod ni be yog e Bible, ya re maligach nem e thingar ni pi’ ni boor yay. (Heb. 9:27, 28) Boor e girdi’ e ngiyal’ ney ni ke mich e re machib ney u wan’rad. Gubin ngiyal’ ni yad ma muulung nga galesiya ni bay yu ngiyal’ ni gubin e rran ni ngar rin’ed ban’en ni ma yog e Katolik e “Komonion” ngay.b Yugu boch e teliw e gathi gubin ngiyal’ ni yad ma madnomnag e yam’ ni tay Jesus, machane yooren e girdi’ ko pi yurba’ i teliw nem e dar nanged angin fare maligach ni pi’ Jesus. Ere rayog ni nge gaar boch e girdi’ u wan’rad, ‘Riyul’ nrayog ni ngan n’ag fan e denen rog ni bochan e yam’ ni tay Jesus, fa?’ Mang fan ni yad ma fith e re deer ney? Bochan ni ke mich u wan’rad e n’en ma yog e piin yad ma yog ndabiyog ni ngan n’ag fan e denen u daken e yam’ ni tay Jesus. Ere mang e ke rin’ e tin riyul’ i gachalpen Jesus ko re n’ey?

6. Nap’an ni taw ko duw ni 1872, ma mang e ke tamilang u wan’ ba ulung i girdi’ ni yad ma fil e Bible?

⁶ Nap’an e duw ni 1870, ma bay ba ulung i girdi’ ni yad ma fil e Bible ni Charles Taze Russell e ma yog e thin rorad nra tababgad i fil e thin nu Bible nib fel’ rogon. Yad baadag ni ngar nanged e tin riyul’ u murung’agen feni ga’ fan e maligach ni pi’ Jesus nge rogon nsusun e ngan madnomnag e yam’ ni tay. Nap’an ni taw ko duw ni 1872, ma ke tamilang u wan’rad nriyul’ ni biyuliy Jesus urngin e girdi’. Ere dar ted rorad e pi n’en kar filed, ya ra weliyed ko girdi’ u daken yu ken e babyor nge shimbung. De n’uw nap’an nga tomuren, mar tababgad i madnomnag fare Puguran ni taab yay u reb e duw ni bod ni i rin’ e pi Kristiano ko bin som’on e chibog.

7. Uw rogon ni be yib angin ngodad e pi n’en ni fil fare ulung i girdi’ ni ur filed e Bible?

⁷ Ngiyal’ ney e be yib angin ngodad e pi n’en ni fil e pi Kristiano ney ni ke yoor e duw ni ke yan. Ni uw rogon? Ke ayuwegdad Jehovah ni ngad nanged e tin riyul’ u murung’agen e maligach ni pi’ Jesus nge angin ni ke yib riy. (1 John 2:1, 2) Kud filed ni be yog e Bible ni l’agruw e athap ni bay rok e piin yad ma rin’ e n’en nib m’agan’ Got ngay. Boch i yad e ra yag e yafos ngorad u tharmiy ndab kur m’ad biid, ma bokum milyon i yad e ra yag e yafos ni manemus ngorad u fayleng. Ma gel e chugur ko tha’ u thildad Jehovah u nap’an ni gad ra lemnag gelngin nri gad ba t’uf rok, nge rogon angin fare maligach ni pi’ Jesus ngodad. (1 Pet. 3:18; 1 John 4:9) Ere aram fan ni gad ma pining e girdi’ ni ngar uned ngodad i madnomnag fare Puguran u rogon kanawoen ni yog Jesus ni ngan rin’ riy, ni bod e n’en ni i rin’ pi walagdad ni yad ba yul’yul’ kafram.

YAD MA PINING E GIRDI’ NI NGAR UNED KO FARE PUGURAN

8. Mang e ke rin’ e girdi’ rok Jehovah ya nge yag nra pininged e girdi’ ko fare Puguran? (Mu guy e sasing.)

⁸ Ke yoor e duw ni ma pining e girdi’ rok Jehovah e girdi’ ni ngar uned ko Puguran. Nap’an e duw ni 1881, min pining e pi walag u Meriken ni ngar mada’gad nga tafen reb e walag ni pumoon u Allegheny ni bay u Pennsylvania ni fan ko re madnom nem. Boch nga tomuren, ma ra reb e ulung ma yad ma tay e birorad e Puguran. Nap’an e March ko duw ni 1940, mi nog ko pi walag ndemtrug be’ ni baadag e machib ko gin yad ma machib riy ma rayog ni ngar pininged ni nge un. Ma nap’an e duw ni 1960, ma aram e yay nth’abi som’on ni ngongliy e Bethel yu yang e babyor ni yibe pining e girdi’ ko re muulung ney ngar pied ko pi ulung. Ka aram nap’an i yib ni bokum bilyon e yungi babyor ney ni kan wereg ko girdi’. Ere mang fan nib gel e athamgil ni gad ma tay ni ngad pininged e girdi’ ko re madnom ney?

9-10. Mini’ e piin ma yib angin ngorad e athamgil ni gad ma tay ni ngad pininged e girdi’ ko Puguran? (John 3:16) 

⁹ Reb i fan ni gad ma pining e girdi’ ko Puguran e bochan ni gad baadag ni nge fil e piin ka fin nra uned ko re madnom ney e tin riyul’ u murung’agen e n’en ke rin’ Jehovah nge Jesus ni fan ngodad ni gad gubin. (Mu beeg e John 3:16.) Gad ma athapeg ni pi n’en yad ra guy mar rung’aged u nap’an e re madnom ney e ra k’aringrad ni ngkur filed boch ban’en mar manged tapigpig rok Jehovah. Machane ku bay boch e girdi’ ni ma yib angin e re madnom ney ngorad.

¹⁰ Ku gad ma pining e piin ndakurur pigpiggad ngak Jehovah. Gad ma rin’ e re n’ey ni bochan e ngad pugeduran ngorad ni ka yad ba t’uf rok Got. Boor i yad e ma yib u nap’an ni gad ra piningrad, ma gad ma felfelan’ u nap’an ni gad ra guy ni kar bad. Nap’an ni yad ra un ko Puguran ma ma yib ngan’rad gelngin e felfelan’ ni ur ted u nap’an ni ur pigpiggad ngak Jehovah. Am lemnag e n’en ni buch rok Monica.c Nap’an fare m’ar ni COVID-19, me sul nge un ko machib bayay. Tomuren ni un ko Puguran ko duw ni 2021, me yog ni gaar: “Rib ga’ fan e re Puguran ney u wan’ug. Ireray e som’on u lan 20 e duw ni ke yag ni nggu machibnag e girdi’ mug piningrad ko Puguran. Ka rug athamgil u rogon nrayog rog ni nggu pining e girdi’ ko re madnom ney ni bochan e rib ga’ fan u wan’ug e n’en ke rin’ Jehovah nge Jesus ni fan ngog.” (Ps. 103:1-4) Demtrug ko ra un e girdi’ fa danga’, ma gad ma athamgil u rogon nrayog rodad ni ngad pininged yad ko fare Puguran ni bochan e gad manang nib ga’ fan u wan’ Jehovah e athamgil ni gad be tay.

11. Uw rogon ni ke tow’athnagdad Jehovah ko athamgil ni gad ma tay ni ngad pininged e girdi’ ko Puguran? (Haggai 2:7)

¹¹ Ke tow’athnagdad Jehovah ko athamgil ni gad ma tay ni ngad pininged e girdi’ ko Puguran. Yugu aram rogon ni boor ban’en nnog ndabkiyog ni ngan rin’ u nap’an e duw ni 2021 ni bochan fare m’ar ni COVID-19, ma 21,367,603 e girdi’ nra uned ko re madnom ney. Ba chugur ni nge gaman l’agruw nge baley yay nra mun nga urngin e Pi Mich Rok Jehovah u ga’ngin yang e fayleng mfini gaman e biney e namba! Riyul’ ni gathi namba e ba ga’ fan u wan’ Jehovah, ya girdi’ e ir e ba ga’ fan u wan’. (Luke 15:7; 1 Tim. 2:3, 4) Ba mich u wan’dad ni ma fanay Jehovah e re maruwel ney ni gad ma rin’ ni nge ayuwegdad ni ngad pirieged e girdi’ nriyul’ ni baadag ni nge nang e tin riyul’.—Mu beeg e Haggai 2:7.

YAD MA MADNOMNAG FARE PUGURAN NI YUGU ARAM ROGON NIB MO’MAW’ NGORAD

12. Mang boch e magawon nrayog ni nge mo’maw’nag ngodad ni ngad madnomnaged e Puguran? (Mu guy e sasing.)

¹² I yiiynag Jesus nra taw ko tin tomuren e rran ma boor mit e magawon ni gad ra mada’nag ni bod e togopuluw u lan e tabinaw, nge gafgow ni yibe tay ngodad, nge mahl, nge liliy nib machreg ni ma af, nge ku boch ban’en. (Matt. 10:36; Mark 13:9; Luke 21:10, 11) Yu ngiyal’ e ma mo’maw’nag e pi n’ey ngodad ni ngad madnomnaged e yam’ ni tay Jesus. Mang e ke rin’ pi walagdad ya nge yag nra gelgad ko pi magawon ney, ma uw rogon ni ke ayuwegrad Jehovah?

13. Uw rogon ni tow’athnag Jehovah Artem ni bochan e de rus miki dugliy u wan’ ni nge madnomnag e Puguran ni yugu aram rogon ni bay u kalbus?

¹³ Nap’an ni ka non’rad nga kalbus. Pi walagdad ni ka non’rad nga kalbus ni bochan e michan’ rorad e yad ma rin’ e tin rayog rorad ni ngar madnomnaged e yam’ ni tay Jesus. Am lemnag e n’en ni rin’ Artem. Nap’an e pi wik u m’on ngu tomuren e Puguran ko duw ni 2020, min tay nga lan ba singgil ni 183 e square fit ga’ngin ni bayi n’en min tay lal e kalbus ngay taab yay. Yugu aram rogon ni bay u kalbus, me yag rok ni nge kunuy boch ban’en nga taabang ni nge fanay ni nge mang flowa nge wain, miki yarmiy rogon ni nge pi’ e welthin ni fan ko Puguran ni ir e nge rung’ag. Machane piin yad bay u lan taareb e singgil e yad ma tamagow ma yugu yad ma yaba’. Ere mang e rin’? I fithrad ko rayog ni ngar pared taareb e awa ndab ra yaba’gad ma dab ra tamagowgad fa dabiyog. I gin Artem ya m’agan’rad ngay ndab ra tamagowgad ara ra yaba’gad u nap’an e Puguran. I gaar Artem, “Gog ni nggu weliy murung’agen e Puguran ngorad.” Machane yugu aram rogon nrogned ndubrad ni ngar nanged murung’agen e biney e madnom, ma tomuren nra guyed Artem ni be tay fare Puguran mu kur rung’aged e n’en be yog, ma aram mar tababgad ni ngar fithed boch ban’en u murung’agen e re madnom ney.

14. Uw rogon ni madnomnag e girdi’ rok Jehovah e Puguran u nap’an ni ke garer fare m’ar ni COVID-19?

¹⁴ Fare m’ar ni COVID-19. Nap’an ni garer e re m’ar ney, ma daki yag ni nge tay e girdi’ rok Jehovah e Puguran u Tagil’ e Liyor. Machane re n’ey e de talegrad ndab kur madnomnaged e Puguran.d Pi ulung nrayog ni nga ranod ko Internet e ra ted e Puguran u online. Machane uw rogon bokum milyon e girdi’ ndariy e Internet rorad? Bay boch e nam nni yarmiy rogon e welthin ni fan ko Puguran riy nrayog ni ngan yaliy u TV ara ni motoyil ngay u radio. Ku bay boch e branch nra yarmiyed ni ngan pi’ e re welthin ney u boor ko 500 mit e thin ya nge yag ni ngki un e piin yad ma par u boch e binaw nib palog i madnomnag e Puguran. Kun yarmiy ni nge yan boch e walag ni pumoon i pi’ e pi welthin ney ni kan recordnag ngak e piin nib t’uf rorad.

15. Mang e kam fil ko n’en ni rin’ be’ ni ma fil e Bible ni ka nog Sue ngak?

¹⁵ Togopuluw u lan e tabinaw. Bay boch e girdi’ ni togopuluw u lan e tabinaw e aram e n’en nri ma mo’maw’nag ngorad ni ngar madnomnaged e Puguran. Am lemnag e n’en ni rin’ be’ ni ma fil e Bible ni ka nog Sue ngak. U m’on ko rofen ni Puguran ko duw ni 2021, me yog ko en ma fil e Bible ngak ndabiyog ni nge un ko Puguran ni bochan e be togopuluw chon e tabinaw rok ngak. Ere beeg faen yow ma fil e Bible e Luke 22:44 ngak. Ngemu’ me weliy ngak nnap’an ni gad ra mada’nag e magawon, ma susun e ngad folwokgad ko n’en ni rin’ Jesus ni aram e ngad meybilgad ngak Jehovah mi ri pagan’dad ngak. Faani bin migid e rran ngay me fal’eg rogon e flowa nge wain me yaliy e Morning Worship ni bay ko jw.org. Me yan i blayal’ u nap’an ni bay u singgil rok ni yigoo ir me un ko Puguran ko phone rok. Tomuren me yol ngak faen yow ma fil e Bible ni gaar: “Rib gel e athamgil nim pi’ nga lanin’ug fowap. Gu rin’ urngin e tin rayog rog ni nggu un ko Puguran me ayuwegeg Jehovah. Dabiyog ni nggu weliy gelngin e felfelan’ ni kug tay ma ri kug be pining e magar!” Ga be lemnag nrayog ni nge ayuwegem Jehovah ni faanra kam mada’nag reb e magawon ni aray rogon, fa?

16. Mang fan nib pagan’dad ngay nra tow’athnagdad Jehovah ko athamgil ni gad ra tay ni ngad uned ko Puguran? (Roma 8:31, 32)

¹⁶ Rib ga’ fan u wan’ Jehovah e athamgil ni gad ma tay ni ngad madnomnaged e yam’ ni tay Jesus. Rayog ni nge pagan’dad ngay nra tow’athnagdad u nap’an ni gad ra dag nib ga’ fan u wan’dad e n’en ke rin’ ni fan ngodad. (Mu beeg e Roma 8:31, 32.) Ere ngad dugliyed u wan’dad ni ngad uned ko Puguran e biney e duw, ma gad athamgil u rogon nrayog rodad ni ngad yoornaged e tin gad be rin’ ni fan ngak Jehovah u m’on ngu tomuren e Puguran.