Mu Nameg e N’en Ngam Rin’ u M’on Ngu Tomuren e Puguran

Gubin e duw ni ma felfelan’ e girdi’ rok Jehovah ni ngar madnomnaged fare Puguran u taabang. Nap’an e pi wik u m’on ngu tomuren fare Puguran, ma gad ma guy rogon ni ngad pininged e sorok nge magar ngak Jehovah ni bochan fare biyul ni ke pi’ nib tow’ath. (Efe 1:3, 7) Bod ni aram e ngiyal’ ni gad ma athamgil u rogon nrayog rodad ni ngad pininged e girdi’ ko Puguran. Bay boch e walag ni yad ma thilyeg rogon e tin yad be rin’ ya nge yag nra uned ko pioneer ni ayuw u lan e pul ni March ara April ni ngar thognaged 30 ara 50 e awa. Ga baadag ni ngam yoornag e tayim rom ni fan ko machib u m’on ngu tomuren e Puguran, fa? Mang e rayog ni nge ayuwegem ni ngam rin’ e re n’ey?

Ba ga’ ni faan gad ra tanom u m’on riy, ma aram e rayog ni ngad rin’ed boor ban’en. (Pr 21:5) Bochan ni ke chugur e Puguran, ma aram fan ni chiney e aram e ngiyal’ nib fel’ ni ngad tababgad ni ngad tanomnaged e n’en ngad rin’ed. Mu lemnag rogon ni ga baadag ni ngam yoornag e tayim rom ni fan ko machib u m’on ngu tomuren e Puguran, nge n’en nib t’uf ni ngam rin’ ya nge yag nim rin’ e n’en ga be nameg. Ngemu’ ma gog ngak Jehovah ni nge tow’athnagem ko athamgil ni ga be tay.​—1Jo 5:14, 15.

Rayog ni ngam lemnag boch e kanawo’ nrayog ni ngam yoornag e tayim rom riy ni fan ko machib u m’on ngu tomuren e Puguran, fa?