Ngan Ayuweg e Piin ni Yibe Machibnagrad ni Ngar Fal’eged i Lemnag e N’en ni Yibe Weliy Ngorad”

1. Uw rogon nib fel’ ni ngan non ngak be’ u nap’an e machib?

¹ Uw rogon ni yira non ngak be’ u nap’an e machib ma ra yib angin? Ngan towasariy ni nge fol ko n’en ni yibe machibnag ngak fa ngan ayuweg ni nge guy rogon ni nge nang fan me puluw u wan’ e n’en ni yibe weliy. Nap’an ni be machibnag apostal Paul e pi Jew ni yad ma par u Thessalonika me guy rogon ni nge ayuwegrad ni ngar fal’eged i lemnag mar nanged fan e n’en ni be weliy ngorad ma angin ni yib riy e boch i yad e kar mon’oggad ko “liyor ngak Got.” (Acts 17:2-4) Mang e ba muun ko ngan ayuweg e girdi’ ni ngar nanged fan e n’en ni yibe weliy ngorad?

2. Uw rogon ni ngad folwokgad ko n’en ni rin’ Paul u nap’an ni gad be machib?

² Mu Lemnag Rarogon Laniyan’ e Girdi’ nge Pi N’en nib Mich u Wan’rad: Faanra mu ayuweg e girdi’ ko gin ni ga be machib riy ni ngar nanged fan e n’en ni ga be machibnag ngorad ma thingar mu lemnag rarogon lanin’rad. I tabab Paul i machibnag e girdi’ nu Greece ndawori michan’rad ni kar muulunggad ko Areopagus ni aram e weliy ngorad boch ban’en ni yad manang mab mich u wan’rad. (Acts 17:22-31) Ere nap’an ni ga be fal’eg rogon e n’en ni ngam weliy u nap’an e machib ma ga lemnag e pi n’en nib mich u wan’ e girdi’ ko gin ni ga ma machib riy nge pi n’en ni dubrad. (1 Kor. 9:19-22) Faanra ke togopuluw be’ ngom mag guy rogon ni ngam weliy ngak ban’en nib mich u wan’mew ma ga fanay e re n’em ni nge mang kenggin e n’en ni ngam weliy.

3. Faan gad ra fith e deer nib fel’ rogon, ma uw rogon nra mom ngodad ni ngad ayuweged e girdi’ ni ngar nanged fan e n’en ni gad be weliy ngorad?

³ Ngan Fith e Deer nib Fel’ Rogon: Dabiyog ni nga dogned ngak be’ e kanawo’ ni sor ko gin ni be milekag ngay ni faanra dad nanged e gin ni bay facha’ riy. Ere ku errogon ndabiyog ni ngad ayuweged be’ nge nang fan e n’en ni gad be machibnag ngak ni faanra dad nanged e n’en ni be lemnag. U m’on ni nge ayuweg Jesus be’ ni nge nang fan e n’en ni be weliy ngak ma ba ga’ ni ma fith boch e deer ya nge nang ko mang e be lemnag. Bod ni nap’an ni fith be’ ngak ni gaar: “Mang e thingar gu rin’ me yog ngog e yafos ndariy n’umngin nap’an?,” ma aram me guy rogon ni nge nang ko mang e be lemnag u m’on ni nge fulweg. (Luke 10:25-28) Ku immoy bayay ni pi’ Peter e fulweg u ban’en nde puluw ma aram me fith Jesus boch e deer ni nge yal’uweg e lem rok. (Matt. 17:24-26) Ere ku er rogodad ni faanra ke fith be’ reb e deer ngodad ara ke yog ban’en nde puluw ma rayog ni ngad fithed boch e deer ngak ya nge yog ni nge guy rogon ni nge nang fan e n’en ni gad be weliy ngak.

4. Mang fan ni susun e ngad guyed rogon ni ngad ayuweged e en ni gad be machibnag ni nge nang fan e n’en ni gad be weliy ngak?

⁴ Nap’an ni gad ra ayuweg e en ni gad be machibnag ni nge nang fan e n’en ni gad be weliy ngak, ma aram e gad be folwok rok Jesus ni ir fare sensey ni th’abi fel’ nge ku boch e tamachib ko bin som’on e chibog. Gad ra rin’ ni aray rogon ma aram e gad be tayfan facha’. (1 Pet. 3:15) Ma angin nra yib riy e rayog ni nge pagdad ni ngkud sulod ngak bayay.