Ngam Ayuweg e Girdi’ ni Ngar Motoyilgad ngak Got
1. Mang fa gali brochure ni kan pi’ ngak e girdi’ u nap’an fare District Convention ni kenggin e ‘Nge Yib e Gagiyeg rok Got!’, ma mang fan ni ireray talin e maruwel nib ga’ fan?
1 Nap’an fare District Convention ni Kenggin e ‘Nge Yib e Gagiyeg rok Got!’ ma kan pi’ ngak e girdi’ l’agruw e brochure ara babyor ni Mmotoyil ngak Got me Yog e Yafas ni Manemus Ngom nge Listen to God.a Bochan ni buchuuw e thin riy, ma rayog ni ngan piliyeg e gali babyor ney nib papey. Bin riyul’ riy, e tomuren ni kan pi’ e gali babyor ney ngak girdi’ ma kan pi’ mat’awun e pi walag ni yad ma piliyeg e babyor ni ngar pilyeged e gali babyor ney ko 431 e thin.
2. Chon mini’ e ra fel’ rogon ko gali babyor ney?
2 Mini’ e rayog ni nge fel’ rogon ko gali babyor ney? Mu lemnag e tin ni baaray:
• Reb e tamachib ni yow be non be’ ko yay ni som’on ni kar mada’gow ara u nap’an ni ke sul ngak be’ ni baadag e machib, e ke nang ni cha’ nem ni be machibnag e de nang e yol ara mo’maw’ ni nge beeg e babyor.
• Reb e tamachib e be machibnag be’ ni thin rok e buchuuw ara dariy e babyor rodad ni kan pilyeg ngay. Ara oren e girdi’ u lan e pi binaw ni yima machib riy e dabiyog ni ngar beeged e thin nri yad ma yog.
• Reb e tamachib e ke fanay pa’ ni nge fanathin ngay ya nge yag ni nge machibnag e girdi’ nib biling.
• Reb e llabthir e ri baadag ni nge fil e thin riyul’ ngak e bitir ndawori nang e yol.
3. Uw rogon ni kan fal’eg fare babyor ni Listen to God?
3 Rogon ni Kan Fal’eg: Fare babyor ni Listen to God e rib buchuuw e thin ni bay riy, nib ga’ ni kemus ni reb e sentence nge reb e thin nu Bible e kan yoloy nga but’ ko pi page riy ni be tamilangnag kenggin e machib riy. Mang fan? Susun bay be’ ni ke dag ngom reb e brochure ni kan yoloy ko thin ndabiyog ni ngam beeg, ya kan fanay e letra ndamur nang. Gur, yugu demtrug ni bay e sasing riy nib fel’ yaan, ma ga baadag ni ngam fek? Yooren e girdi’ e dubrad. Maku aram rogon e girdi’ ndar nanged e yol e ba ga’ ni dubrad e babyor ni bay e yol riy. Aram fan, ni kan fal’eg e sasing nib tamilang ni bay ko pi page riy, ma bay e arrow riy ni be pow’iyey ko bin migid e sasing.
4. Mang e pi n’en ni bay ko pi page ko fare brochure ni Mmotoyil ngak Got me Yog e Yafas ni Manemus Ngom?
4 Pi sasing ni bay ko fare brochure ni Mmotoyil ngak Got me Yog e Yafas ni Manemus Ngom e ba taareb rogon ko pi sasing ni bay ko Listen to God. Re ke babyor ney e kan fal’eg ni fan ngak e girdi’ ndawori salap i beeg e babyor. Maku rayog ni nge fanay e tamachib e re ke babyor ney u nap’an ni be fil ngak be’ ni be fanay fare brochure ni Listen to God. Ra reb e guruy ma kan tay nga lan l’agruw e page. Ma bay e deer u lang ko fare page u ba’ ni gilay’ ma fulweg riy e bay ko gali page nem. Maku bay boch e thin nge thin nu Bible riy. Ma u but’ ko pi page nem e bay boch e thin riy nge thin nu Bible ni ku rayog ni ngan weliy, ni be yan u rogon fa cha’ ni yibe fil e Bible ngak.
5. Mingiyal’ ma uw rogon ni ngam pi’ e gali brochure ney ngak e girdi’?
5 Rogon ni Ngan Pi’: Nap’an ni ga be un ko machib u mit e tabinaw i yan, ma rayog ni ngam pi’ ndemtrug reb ko gali brochure ney ngak e girdi’ nfaanra kam guy nib fel’ ni ngan rin’ ni aram rogon, nyugu aram rogon ni gathi ireray e babyor ni ka nog ni ngan wereg ko re pul nem. (Mu guy fare thin ni kenggin e “Rogon ni Ngan Pi’ e Gali Brochure N’ey.”) Rayog ni ngam pi’ e gali brochure ney u nap’an ni ga ra sul ngak be’ ni kam machibnag, ma gog ni bay ban’en ni ngam dag ngak ma ga pi’ ba ken ngak.
6. Uw rogon ni ngad fanayed e gali brochure ney u nap’an ni gad be fil e Bible ngak be’?
6 Bochan fare babyor ni Listen to God e kan fal’eg ndariy e deer riy, ere dabiyog ni ngam fil e re ke babyor ney ngak be’ ni bod ni yima rin’ ko fare babyor ni Mang e Ri Be Fil e Bible? Urngin e girdi’, ma yad baadag ni ngar motoyilgad nga chepin ban’en. Ere ngam weliy chepin ban’en u Bible ni ga be fanay e pi sasing ni bay ko re ke brochure ney. Ngam weliy fan e pi sasing riy u fithik’ e pasig. Nga mog ngak ni nge weliy murung’agen e n’en ni ke guy nge n’en ni be lemnag. Ngam beeg e thin nu Bible ni bay u but’ ma ga weliy fan. Ma ngam fith boch e deer ya nge yag ni nge maruwel e lem rok ma ngam gay rogon ni nge nang fan. Faanra be fanay fare brochure ni Mmotoyil ngak Got me Yog e Yafas ni Manemus Ngom, ma ngam beegew u taabang e pi thin ni bay riy nge thin nu Bible u nap’an ni gimew be weliy murung’agen reb e sasing riy.
7. Uw rogon ni ngad ayuweged be’ ni gad be fil e Bible ngak ni nge mon’og?
7 Ngam Ayuweg ni Nge Mon’og: Yibe athapeg ni fol Bible ni gimew be tay e ra k’aring fa cha’ ni nge fil rogon ni nge beeg e babyor ya nge yag ni nge fil e tamilangan’ rok Jehovah ni goo ir. (Matt. 5:3; John 17:3) Ere faanra be fanay e cha’ nem fare brochure ni Listen to God, me munmun ma rayog ni nga mog ngak ni ngam fil ngak rogon ni nge beeg e babyor, ngemu’ ma rayog ni ngam ululgow i fil e Bible ni gimew be fanay fare brochure ni Mmotoyil ngak Got me Yog e Yafas ni Manemus Ngom. Yugu demtrug e brochure ni kam mu’nagew i beeg, ma dabiyog ni nge un facha’ ko taufe. Ere ba t’uf ni ngam ululgow i fil e Bible ni gimew be fanay fare babyor ni Mang e Ri Be Fil e Bible?, ara yugu reb e babyor ya nge yoor e tamilangan’ rok.
8. Mang fan nri gad ba felfelan’ ni bay e talin e maruwel rodad nib beech ni fan ko machib?
8 Thingari motoyil e girdi’ ngak e en Th’abi Tolang u palpalth’ib ya nge yag e yafas ni manemus ngorad. (Isa. 55:3) Mab m’agan’ Got ngay ni “urngin e girdi’ ni ngar thapgad ngak,” ngar filed rogon ni ngar motoyilgad ngak Got nib muun ngorad e piin ndar nanged e yol. (1 Tim. 2:3, 4) Ri gad ba felfelan’ ni bay e talin e maruwel rodad nib beech nrayog ni ngad fanayed ni ngad filed ngak e girdi’ rogon ni ngar motoyilgad ngak Got!
[Boch e Thin nra Tamilangnag Murung’agen]
a Thin nu Meriken.
[Kahol ko page 3]
Rogon ni Ngan Pi’ e Gali Brochure N’ey
Ngam dag ngak be’ e page 2-3, ma ga yog ni nge lungum: “Ga baadag ni ngam par u ba fayleng ni aram rogon yaan? [Mmotoyil ko n’en nra yog.] Fare Bible [ara babyor nib thothup] e be micheg ni dabki n’uw nap’an ma ra fal’eg Got e fayleng nge fel’ yaan mab gapas ma dakuriy e girdi’ nib m’ar mab gafgow. [Mu beeg e Isaiah 55:3, ni kan yoloy nga lang ko bin 3 e page.] Re thin nu Bible ney e be yog ni gaar: ‘Mu telmed, mi gimed yib ngog.’ Machane uw rogon ni ngad motoyilgad ngak Got?” Ngam pithig ko page 4-5, ma ngam weliyew e fulweg riy. Faanra dariy e tayim rok, ma ngam pi’ fare brochure ngak ma ngam yarmiyew ni ngkum sul ya ngam weliyew e fulweg riy.