Rogon ni Ngan Fanay fare Brochure ni Listen to God

Fare brochure ni kenggin e Listen to God ni thin nu Meriken e kan ngongliy ni nge ayuwegdad u rogon ni ngad filed e tin riyul’ ngak e piin nib mo’maw’ rorad ni ngar beeged e babyor ni aram e ngad fanayed e pi sasing ni bay riy. Ra reb e guruy ko re babyor ney ma l’agruw e page riy ni bay boch e sasing riy. Ma ra reb e pi sasing nem ma bay e arrow riy ni bochan e nge pow’iyem u reb e sasing nga reb.

Fare brochure ni Mmotoyil ngak Got me Yog e Yafas ni Manemus Ngom e ku bay boch e sasing riy ni taareb rogon ko re brochure ney ni Listen to God ni thin nu Meriken, machane boor e thin ni bay riy nrayog ni nge beeg e piin ni yad manang rogon i beeg e babyor. Pi publisher e ba ga’ ni yad baadag ni ngar fanayed e bin baaray e brochure ni Mmotoyil ngak Got u nap’an ni ngar filed e Bible ngak be’ mar paged e en ni yad be fil e Bible ngak ni nge fanay e bin baaray ni Listen to God. Yooren e page ko fare brochure ni Mmotoyil ngak Got e bay e kahol riy ni ku bay boch ban’en riy nrayog ni ngkum weliyew faen ni ga be fil e Bible ngak ni be yan u rogon urngin ban’en nrayog ni nge nang facha’.

Demtrug e ngiyal’ nrayog ni ngam pi’ reb e gal brochure ney u nap’an e machib, mus ni faanra gathi ireray e babyor ni yibe wereg u nap’an e machib ko re pul nem. Nap’an ni ga be fil e Bible ngak be’ mag fanay e pi sasing ni bay riy ni ngam tamilangnag e pi n’en ni kan yoloy nga lan e Bible. Mag fith boch e deer nra k’aring e en ni ga be fil e Bible ngak ni nge weliy e n’en ni be lemnag miki ayuwegem ni ngam nang ko ke tamilang e n’en ni gimew be weliy u wan’ fa danga’. Ngam beegew mi gimew weliy e pi thin nu Bible ni bay nga tanggin e re page nem u taabang. Tomuren ni kam mu’nagew i fil e re brochure nem, ma rayog ni ngam filew fare babyor ni kenggin e Mang e Ri Be Fil e Bible? ni nge ayuweg faen ni ga be fil e Bible ngak ni nge mon’og i yan me un ko taufe.