Mu Fanay e Tract ni Ngam Wereg fare Thin nib Fel’
1. Uw rogon ni ka i fanay e pi tapigpig rok Got e tract kafram i yib?
1 Ke n’uw nap’an ni ma fanay e pi tapigpig rok Jehovah e tract ni bay e thin nu Bible riy ni ngar wereged fare thin nib fel’. Nap’an e duw ni 1880, me tabab C. T. Russell nge boch e girdi’ i ngongliy reb e babyor ni ka nog e Bible Students’ Tracts ngay, ma re n’ey e un pi’ ngak e piin ni yad ma beeg fare Wulyang ko Damit ni ngar wereged ko girdi’ ni yoor. Rib ga’ fan e tract u wan’rad, ere aram fan nnap’an ni sunmiy C.T. Russell reb e ulung ko duw ni 1884 ni fan ko fare maruwel ni fan nga Gil’ilungun Got ma gathi ngan yognag e salpiy riy, min uneg fare bugithin ni “tract” nga fithingan e re ulung nem, ma aram mu un pining e Zion’s Watch Tower Tract Society ngay, ma chiney e yima yog fare Watch Tower Bible and Tract Society of Pennsylvania ngay. Nap’an e duw ni 1918, ma ba pag 300 e milyon e tract ni ke wereg e pi Bible Student ara Piin ni Ma Fil e Bible. Ke mada’ ko ngiyal’ ney ma ma yib angin e pi tract ni yima fanay u nap’an e machib.
2. Mang fan nib ga’ angin e pi tract?
2 Fan nib Ga’ Angin: Tract e boor e raen riy ma baadag e girdi’ ni nge yaliy. Yugu aram rogon nde yoor e thin ni bay riy, machane ba mom ni nge k’aring be’ ni nge fal’eg i lemnag e n’en ni be weliy murung’agen maku boor ban’en ni yira fil riy. Faanra dabun be’ ni nge beeg e pi magazine ara yu ke babyor ni gad ma wereg, ma ra adag ni nge beeg e tract. Ba mom ni ngan pi’ e tract, ma mus ngak e piin ni ka fin ra uned ko machib nge piin bitir mab mom ni ngar pied. Maku reb e, tract e ba achichig mab mom ni ngad feked ko gin ni gad be yan riy.
3. Mog e n’en ni ke buch rom ara ban’en ni ke buch rok be’ ni kan tay murung’agen ko pi babyor rodad ni be dag feni ga’ fan e pi tract ni gad ma wereg.
3 Boor e girdi’ ni kar nanged e tin riyul’ ko pi tract ni gad ma wereg. Bod ni immoy reb e ppin u Haiti ni guy reb e tract rodad u kanawo’, me fek nge beeg me yog ni gaar, “Kug pirieg e tin riyul’!” Munmun ma aram me un ko yan nga Kingdom Hall, me tabab i fil e Bible, me un ko taufe. I rin’ gubin e pi n’ey ni bochan gelngin e Thin rok Got ni bay u lan fa gi tract ni beeg.
4. Faanra tract e ir e yibe wereg u reb e pul, ma mang e ngad nameged?
4 Mit e Tabinaw: Bochan nib ga’ angin e pi tract ni yima wereg, ma aram fan nnap’an nra tabab e pul ni November ma aram e bay boch e pul ni ireray e babyor ni yira wereg. N’en ni gad be nameg e gathi kemus ni ngad pied bang e tract u nap’an nra pagdad e en ni gad be machibnag ni ngad pied, ya gad be nameg ni ngad fanayed ni ngad tababnaged e numon ngak be’. Faanra baadag be’ e machib ko yay nsom’on ni kad mada’gad ara nap’an ni kad sulod ni ngad guyed, ma rayog ni ngad tababgad i fil e Bible ngak ni gad be fanay fare ke babyor ni Mang e Ri Be Fil e Bible? ara yugu ba ken e babyor ni ku yima fil e Bible riy ko girdi’. Uw rogon nrayog ni ngad pied e tract u mit e tabinaw i yan? Ra reb e tract ma ba thil e n’en ni bay riy, ere ba t’uf ni ngad nanged e n’en ni bay ko tin ni gad be wereg ko girdi’.
5. Uw rogon ni ngad pied e tract u nap’an ni gad be machib u mit e tabinaw?
5 N’en ni ngad weliyed e thingari m’ag ko gin ni gad be machib riy nge tract ni gad be fanay. Som’on e rayog ni ngad pied fare tract ngak faen ni kad mada’naged. Dabisiy ni n’en ni bay u keru’ e re tract nem e ra k’aring ni nge motoyil ngodad. Maku reb e rayog ni ngad daged in e tract ngak ma gad yog ngak ni nge mel’eg e bin baadag riy. Nap’an ni gad be machib ko yungi n’en ni gathi ri baadag e girdi’ riy ni ngar binged e mab ngodad, ma rayog ni ngad koled fare tract u bang nra guy riy, ara dogned ngak ni ngad pied ban’en ngak u tan e mab ni nge yog laniyan’ riy. Faanra kenggin fare tract e ba deer, ma rayog ni nga dogned ngak ni nge yog rogon laniyan’ riy. Maku reb e rayog ni ngad fithed yugu reb e deer ngak nra k’aring ni nge adag ni ngad nonad. Ngemu’ ma rayog ni ngad beeged bang ko fare tract ngak, ma nap’an ni gad ra taw ko pi deer ni bay riy ma gad tal ya nge yog ni pi’ e fulweg riy. Ku rayog ni ngan beeg e pi thin nu Bible ni bay riy nib ga’ fan ni ngan beeg. Tomuren ni kad weliyed boch ban’en ko fare tract, ma rayog ni ngad talgad ma gad yarmiy e rofen ni ngkud sulod. Faanra ba ga’ ni ma tay e ulung rodad e babyor ko pi tabinaw ndariy e girdi’ riy, ma rayog ni ngad ted e tract u bang ndabi guy be’ ni be yan u kanawo’.
6. Uw rogon nrayog ni ngan fanay e tract ko machib u kanawo’?
6 Machib u Kanawo’: Ka am fanay e tract u nap’an e machib u kanawo’, fa? Boor e girdi’ ni yad be yan u kanawo’ e yad be gur ni nga ranod nga bang mab mo’maw’ ni ngar talgad ni ngad nonad. Ere, rayog ni nge mo’maw’ ngodad ni ngad nanged ko yad baadag e machib fa danga’. Faanra aram rogon, ma mang ndab da pied bang e tract ngorad ko bin ni ngad pied e tin ni kab beech e magazine rodad ngorad? Bochan rogon e thin ni bay u keru’ nge ku bochan ni buchuuw e thin ni bay riy, ma rayog ni nge k’aring facha’ ni nge adag ni nge beeg u nap’an ni ke yib e tayim rok. Machane, faanra darur gurgad nga bang, ma rayog ni ngad weliyed boch ban’en ni bay ko fare tract ngorad.
7. Mu weliy boch ban’en ni ke buch ni be dag rogon ni ngan fanay e pi tract u nap’an ni yibe machib u fithik’ e sabethin.
7 Machib u Fithik’ e Sabethin: Ba mom ni ngan fanay e tract u nap’an ni yibe machib u fithik’ e sabethin. Bay reb e walag ni pumoon ni ma tay boch e tract nga lan e paketo rok u nap’an ni nge yan nga bang. Nap’an nra mada’nag be’ nib ga’ ni be’ ni be maruwel u kantin, me yog ni nge pi’ ban’en ngak ni nge beeg ma aram me pi’ reb fapi tract ngak. Nap’an ni nge yan ba wu’ e mabgol nga New York ko fafel nge sapsap, mar nangew ni yow ra mada’nag e girdi’ nib thilthil e nam rorad u rom. Ere, ra fekew fare ke babyor ni kenggin e Nations nge boch e tract ni thin nu yugu boch e nam. Ma nap’an ni yow ra guy be’ u kanawo’ ni be pi’ boch ban’en ni chuway’, ara be’ u park, ara tagil’ e abich ni be non ni thin nu yugu reb e nam, mi yow pi’ bang fapi tract ngak ko thin rok.
8. Uw rogon nrayog ni ngan taareb rogonnag e pi tract ni gad ma wereg ko awoch?
8 “Mu Yung e Woldug Rom”: Pi tract ni gad ma wereg e rayog ni ngan taareb rogonnag ko awoch. Be’ ni ma milay’ e ma wereg e awoch rok ni bochan e de nang ko bin ngan riy e ra tugul. Be gaar e Eklesiastes 11:6: “Mu yung e woldug rom ni kakadbul nge blayal’; ya dabiyog ni ngam nang ko gubin nra tugul nib fel’ rogon fa danga’, ara reb e ra tugul boch nib fel’ rogon ma boch e dabi fel’ rogon.” Ere, manga yugu da ululgad i “garereg e llowan’” ara tamilangan’ u daken e biney e talin e maruwel nrib ga’ angin ko machib.—Prov. 15:7.
[Blurb ko page 3]
Bochan nib ga’ angin e pi tract ni yima wereg, ma aram fan nnap’an nra tabab e pul ni November ma aram e bay boch e pul ni ireray e babyor ni yira wereg