Rogon ni Ngan Fanay e Pi Tract ni Ngan Tababnag e Numon ngak Be’

Ka nap’an e January 2018, ma kan tay boch e kanawo’ u rogon ni ngan non ngak be’ u wuru’ fare babyor ni Pi N’en ni Ma Rin’ e Piin Kristiano nge Machib ni Yad Ma Tay. Yibe pi’ e athamgil ngodad ni ngad gayed rogon ni ngaud nonad ko girdi’ ko bin ni kemus ni ngaud pied e babyor ngorad. Aram fan ni kan ngongliy fapi video ni nge ayuwegdad u rogon ni ngad tababnaged e numon ngak e girdi’ ko yay nsom’on ni kad mada’naged yad ni gad be fanay e Bible. Ere gur, re n’ey e be yip’ fan ndab kud pied e babyor u nap’an ni gad be machib u mit e tabinaw? Danga’! Ya pi tract ni gad ma pi’ e aram reb e kanawo’ nrayog ni ngad nonad ko girdi’. Rayog ni ngad rin’ed e pi n’en ni baaray u but’ u nap’an ni gad ra pi’ reb e tract:

1. Mu fith fare deer ni bay u wuru’ fare tract, ngemu’ mag pag ni nge mel’eg reb ko pi fulweg ni bay riy.

2. Mu dag fare thin nu Bible ni bay u tabolngin e bin migid e page ni aram e fulweg ko fare deer. Ma faanra ka bay e tayim, mi gimew beeg mi gimew weliy murung’agen boch ban’en ni bay u langgin fare gi tract.

3. Mu pi’ fare gi tract ngak faen ni kam mada’gow, mag pi’ e athamgil ngak ni nge beeg e tin ni ka bay e thin riy ko ngiyal’ nrayog rok.

4. U m’on ni ngam chuw, mag dag ngak fare deer ni bay u tan fare thin ni “Ngan Lemnag,” ma gog ngak ni ga baadag ni ngam weliyew e fulweg riy nib puluw ko Bible ko yay ni migid ni gimew ra mada’.

Nap’an ni ga ra sul mi gimew weliy e fulweg ko fare deer, ma aram mu kum fith yugu reb e deer ni ngam weliyew ko yay ni migid. Rayog ni ngam mel’eg reb e deer ni bay ko fare website rodad, ara reb e deer ni bay ko fare babyor ni kan weliy murung’agen u wuru’ fare tract. Ra ga be guy nib puluw e tayim riy, mag weliy ngak murung’agen fare babyor ni kenggin e Thin nib Fel’ ni Yib rok Got! ara yugu reb e babyor ni bay ko fare Tafen Talin e Maruwel ni Yima Fil Ban’en Riy ko Girdi’.