Rogon ni Ngam Fanay Fapi Kanawo’ u Rogon ni Ngan Machib

Ka nap’an e January 2018, ma kan tay fapi kanawo’ u rogon ni ngan machibnag be’ nga lan fare babyor rodad ni kenggin e Pi N’en ni Ma Rin’ e Piin Kristiano nge Machib ni Yad Ma Tay​—Babyor ni Fan ko Muulung. Uw rogon ni ngad fanayed e pi kanawo’ ney u nap’an e machib?

Nap’an ni Bay e Part Rom ko Skul: Thingar mu fol ko fapi kanawo’ u rogon ni ngam fith e deer, mag weliy e thin nu Bible, ngemu’ ma ngkum fith e deer ni ir e ngam weliyew e fulweg riy ko yay ni migid. Machane re ney e der yip’ fan ni nga mog gubin bugithin ni kan fanay u lan fare video ni be dag yaan reb e pi kanawo’ ney. Ya rayog ni ngam dugliy rogon ni ngam machibnag be’ ni bod ni ngam machibnag u mit e tabinaw, ara ngam filew e Bible u taabang. Ku rayog ni ngam thilyeg rogon ni ngam tababnag e numon ngak be’ ni kam mada’gow, nge rogon ni ngam tamilangnag e tin riyul’ ngak, nge ku boch ban’en. Ku rayog ni ngkum pi’ reb e babyor ngak ni bay ko fare Tafen Talin e Maruwel ni Yima Fanay ni Ngan Fil Ban’en Riy ko Girdi’ ni yugu aram rogon ndawor ni tamilangnag ko birom e part ni ngam rin’.

Nap’an e Machib: Fapi kanawo’ u rogon ni ngan machibnag e girdi’ e kan yarmiy ni bochan e nge ayuwegdad ni ngad machibnaged e girdi’. Faanra kam pirieg be’ ni baadag e machib ma baadag ni ngki nang boch, ma rayog ni ngam ululgow ko numon ni ngam fanay fare kanawo’ u rogon ni ngan sul ngan guy be’. Rayog ni ngam thilyeg boch ban’en ko fapi kanawo’ u rogon ni ngan non ngak be’ ara mu fanay yugu reb e kanawo’ nib thil. Gur, bay ban’en ni kan weliy ko fa bin baaram e pul ni ke yan ara reb e thin nu Bible nra adag e girdi’ ko binaw rom ni ngar motoyilgad ngay? Gur, baadag e girdi’ ko binaw rom ni ngar weliyed murung’agen boch ban’en ni ka fini buch ko binaw rom, fa? Rayog ni nge thilthil rogon ni ngam fanay e pi kanawo’ ney. Machane thingar mu nameg ni ngam rin’ urngin ban’en nrayog rom ni “fan ko fare Thin Nib Fel’,” ya nge yag ni ngam machibnag gubin e girdi’.​—1Ko 9:22, 23.