Uw Rogon ni Ngan Fanay fare Babyor ni Mini’ e Piin ni Yad Be Rin’ e N’en nib M’agan’ Jehovah Ngay e Ngiyal’ Ney?
Reb e Brochure nib Beech nrayog ni nge Ayuweg e Piin ni Ma Fil e Bible ni Ngar Nanged Murung’agen e Ulung
1. Mang dalip i fan ni kan ngongliy fare brochure ni Mini’ e Piin ni Yad Be Rin’ e N’en nib M’agan’ Jehovah Ngay e Ngiyal’ Ney?
1 Kam tabab ni ngam fanay fare brochure nib beech ni Mini’ e Piin ni Yad Be Rin’ e N’en nib M’agan’ Jehovah Ngay e Ngiyal’ Ney? Fan e re babyor n’ey e nge (1) ayuweg e piin ni ma fil e Bible ni ngar nanged murung’agen e girdi’ rok Jehovah, (2) nge ayuwegrad ni ngar nanged murung’agen e pi n’en ni gad ma rin’, ma (3) dag ngorad rogon ni be maruwel e ulung rodad. Fare brochure ni Mini’ e Piin ni Yad Be Rin’ e N’en nib M’agan’ Jehovah Ngay e Ngiyal’ Ney?, e kan fal’eg nra reb e page ma taareb e guruy ni bay riy, ma rayog ni ngan fil u lan lal i yan ko ragag e minit u tomuren fare study.
2. Mu weliy rogon ni kan ngongliy e re ke brochure ney nge boch ban’en ni bay riy.
2 Rogon Ni Kan Ngongliy: Re ke brochure ney e kan keeg ni dalip guruy, ma ra reb e pi guruy ney ma be weliy ban’en u murung’agen e ulung rok Jehovah, nrogon ni kan weliy ko som’on. Ma kenggin e pi guruy ney ni 28 urngin e kan yoloy ni deer, ma pi subheading riy ni kan yoloy nib gel ramaen e ra pi’ e fulweg ko deer. Bay boor ko 50 e sasing ko pi nam ni kan tay nga urngin e page ni nge dag rogon e maruwel rodad e yibe rin’ u ga’ngin yang u fayleng. Boch e guruy e bay e kahol riy ni kenggin e “Kum Gay Boch Ban’en u Murung’agen”, ni bay e fonow riy nrayog ni nge pi’ e athamgil ngak e en ni be fil e Bible ni nge fol riy .
3. Uw rogon ni ngad fanayed fare brochure ni Mini’ e Piin ni Yad Be Rin’ e N’en nib M’agan’ Jehovah Ngay e Ngiyal’ Ney?
3 Uw Rogon Ni Ngan Fanay: Som’on e ngam dag fare deer ni aram kenggin fare guruy. Ma nap’an ni gimew be beeg fare guruy u taabang, ma ngkum tamilangnag e pi subheading ni kan yoloy nib gel ramaen. Ma tomur ma ngam weliyew e pi deer ni bay u tanggin fare page. Rayog ni ngam beegew urngin e thin u tan reb e guruy ara ngam beegew reb e subheading ma aram me gimew weliy. Ngam dugliy ko bin ngan e thin nu Bible e ngam beegew. Ma dab mu pagtalin ni ngam weliyew murung’agen fapi sasing nge fare kahol ni kenggin e “Kum Gay Boch Ban’en u Murung’agen.” Mab ga’ ni susun ni ngan beeg e pi guruy ni ngan tabab ko bin nib m’on min yan ko bin migid. Machane, ku rayog ni ngam mel’eg reb e guruy ni kam guy nib fel’ ni ngam beegew u ba ngiyal’ ni gimew be fil e Bible. Bod ni, faanra ke chugur reb e assembly ara convention ma rayog ni ngam weliyew e guruy ni 11.
4. Mang fan ni gad ba felfelan’ ni bay e re brochure rodad ney nib beech?
4 Nap’an ni gad be fil e Bible ngak be’, ma gad be ayuweg ni nge nang murung’agen e Chitamangidad nu tharmiy. Machane, kub t’uf ni ngad filed ngak murung’agen e ulung rok Jehovah. (Prov. 6:20) Ere, ri gad ba felfelan’ ni bay e re brochure ney nib beech nra ayuwegdad ni ngad rin’ed e re maruwel ney!