Mini’ e Piin ni Yad Be Rin’ e N’en nib M’agan’ Jehovah Ngay e Ngiyal’ Ney?
1. Wuin e gad ra fil fare brochure ni Mini’ e Piin ni Yad be Rin’ e N’en nib M’agan’ Jehovah Ngay e Ngiyal’ Ney? ma uw rogon nra yib angin ngodad?
1 U nap’an fare wik ko October 28, ma yira weliy murung’agen fare brochure ni Mini’ e Piin ni Yad be Rin’ e N’en nib M’agan’ Jehovah Ngay e Ngiyal’ Ney? u nap’an e Fol Bible ko Ulung. Re brochure ney nib beech ni kan wereg u nap’an fare District Convention ni Kenggin e “Mu Kol Ayuw u Rogon ni Ga Be Lem!” e kan fal’eg rogon ni nge pow’iy e piin ni yad be fil e Bible ko ulung rok Jehovah. Faan gad ra nang fan e re brochure ney, ma gathi kemus ni gad ra felfelan’ ni gad bang ko ulung rok Jehovah, ya gad ra nang rogon ni ngad fanayed u nap’an e machib.—Ps. 48:13.
2. Uw rogon ni ngan fil fare brochure u lan e ulung?
2 Rogon ni Yira Fil: Ba t’uf ni nge yaliy e en ni ma yarmiy e fol Bible ko ulung e tayim, ya nge dabi pag n’umngin nap’an ni ngan weliy reb e guruy nge reb. Bay 28 e guruy ko re ke babyor ney, ma nap’an nra tabab ni nge weliy reb e guruy, mab t’uf ni nge beeg fare deer riy ni aram kenggin e re guruy nem. Ma aram me yog ngak fa en ni ir e nge beeg fare brochure ni nge beeg e bin som’on e paragraph. Ma aram me fith reb e deer ngak e girdi’ u lan e ulung ni bay rogon ko bin som’on e paragraph. Ere, gubin e paragraph ni bay e thin riy ko som’on nib gel ramaen e thingar ni beeg, min weliy. Tomuren ni kan beeg fare paragraph, ma fa en ni be yarmiy e Fol Bible e ra fith ko mang e fulweg ko fare deer ni aram kenggin fare guruy. Maku bay e sasing ni boor u lan fare brochure ni ku rayog ni ngan weliy murung’agen. Faanra ku bay e tayim ma thingar ni beeg e thin nu Bible riy. U m’on ni ngan yan ko bin migid e guruy, ma fa en ni be yarmiy e fol Bible e ra sul nge fith fapi deer ni bay nga but’. Faanra bay fare kahol ni kenggin e “Kum Gay Boch Ban’en u Murung’agen” ma ra yog ni ngan beeg, ma ra pining e girdi’ ni ngar weliyed rogon nrayog ni nge yib angin ngak e en ni be fil e Bible. Faanra ka bay e tayim, ma en ni be yarmiy e fol Bible e rayog ni ngki sul nge fith fare deer ni aram kenggin fare guruy. Dab ni pagtalin ni gathi ireray e yaram u rogon ni ngan fil e Bible ngak be’.
3. Uw rogon ni ngari fel’ rogodad u nap’an ni gad ra fil e re brochure ney u lan e ulung?
3 Faanra nge yib angin e muulung ngom, mab t’uf ni ngam fal’eg rogom u m’on. Mu athamgil ni ngam pi’ e fulweg. Ma nap’an ni yibe fil fare brochure, mag lemnag ko uw rogon nra ayuweg fa en ni ga be fil e Bible ngak ni nge mon’og. Bochan ni kad filed e re brochure ney, ma aram e ke bung rogodad ni ngad ayuweged boch e girdi’ ni ngar uned ngodad i rin’ e tin nib m’agan’ Got ngay, ya nge yag e athap ko yafas ni manemus ngorad.—1 John 2:17.