Mang e Ra K’aringdad ni Ngad Machibgad?
1. Mini’ e nge t’uf rodad, ma gad ra pasig ko machib?
1 Ngan machibnag fare thin nib fel’ u murung’agen Gil’ilungun Got e aram e bin th’abi ga’ fan e maruwel nrayog ni ngad uned ngay e ngiyal’ ney. Faan yira rin’ e re n’ey, ma gad be fol ko fa gal motochiyel ni th’abi ga’ fan, ni aram e nge t’uf Jehovah rodad, ma bin migid e nge t’uf e en ni migid ngodad. (Mark 12:29-31) T’ufeg e rayog ni nge k’aringdad ni ngad machibgad u fithik’ e pasig.—1 John 5:3.
2. Uw rogon ni machib ni gad be tay e be dag nib t’uf Jehovah rodad?
2 Nge T’uf Jehovah Rodad: Bochan nib t’uf Jehovah rodad, ma ra k’aringdad ni ngad weliyed murung’agen. Ke gaman 6,000 e duw ni ke yan ni ke gathibthibnag Satan Jehovah. (2 Kor. 4:3, 4) Ere, bay e girdi’ nib mich u wan’rad ni Got e ma gafgownag e girdi’ nib ta denen u infernio, maku ir bang ko fare Trinitas, ma der ma runguy e girdi’. Maku boor e girdi’ ni yad ma lemnag ndariy e Got. Dabisiy ni gadad baadag ni nge nang e girdi’ e tin riyul’ u murung’agen e Chitamangidad nu tharmiy! Athamgil ni gad ma tay ni ngad manged e mich rok e be k’aringdad ni ngad felfelan’naged, machane ri be damumuw Satan.—Prov. 27:11; Heb. 13:15, 16.
3. Uw rogon ma machib ni gad be tay e be dag nib t’uf e en nib migid ngodad?
3 Nge T’uf Rodad e En ni Migid Ngodad: Gubin e ngiyal’ ni gad ra machibnag be’, ma gad be dag nib t’uf rodad. Ngiyal’ ney ni ke mo’maw’ e par e ba ga’ fan ni nge rung’ag e girdi’ fare thin nib fel’. Boor i yad e bod rogon piyu Nineveh u nap’an Jonah “ndawor ra bucheged ban’en.” (Jonah 4:11) Machib ni gad ma tay e ra ayuweg e girdi’ ni ngar nanged rogon ni ngar pared nib fel’ rogon e yafas rorad, ma yad ba felfelan’. (Isa. 48:17-19) Ma rayog e athap ngorad. (Rom. 15:4) Faanra yad ra motoyil, mar folgad ko pi n’en ni kar filed, ma yad ra ‘fos ni kar thapgad ngak Got.’—Rom. 10:13, 14.
4. Mang e dabi pag Jehovah talin?
4 Piin bitir ni yad ma fol e gathi bay ngiyal’ mfin nra daged e t’ufeg ngak e gallabthir rorad. Ya yad ma athamgil ni ngar daged e t’ufeg ni gubin e ngiyal’. Ere, ku taareb rogodad nfaanra ba t’uf Got nge girdi’ rodad, ma gad ra gay rogon ni ngad machibnaged e girdi’ ni gubin e ngiyal’, ma gathi kemus u ngal’an ni kan yarmiy ni ngan yan ko machib. Gad ra machib ni gadad ba pasig. (Acts 5:42) Dabi pag Jehovah talin rogon e t’ufeg ni gad be dag.—Heb. 6:10.