Ba M’agan’um Ngay ni Ngam Thilyeg Kanawoen e Machib ni Ga Ma Tay, Fa?
1. Bochan ni be thilthil boch ban’en ko re fayleng ney, ma mang e ba t’uf ni ngad thilyeged?
1 Kan taarebnag e fayleng e chiney nga reb e stage ara bang i ban’en ni yima yan u yaan boch ban’en riy, ma re stage nem e ku be thilthil e n’en ni yibe rin’ riy nge girdi’ ni be rin’ e pi n’em. Bochan ni be thilthil boch ban’en ko re fayleng ney, ere yu ngiyal’ mab t’uf ni ngad thilyeged kanawoen e machib ni gad ma tay, nge schedule rodad nge n’en ni gad ra yog ngak e girdi’. Ere ba m’agan’um ngay ni ngam thilyeg kanawoen e machib ni ga ma tay, fa?
2. Mang fan ni thingar da thilyeged rarogodad ya nge yag ni nga darod e ulung rok Jehovah u taabang?
2 Kanawoen e Machib ni Ga Be Tay: Ulung ko Kristiano e yad ma thilyeg kanawoen e machib ni yad ma tay. Nap’an ni l’og Jesus pi gachalpen ko yay nsom’on, me yog ngorad ndab ra feked e ggan nge salpiy. (Matt. 10:9, 10) Machane, me munmun me thilyeg Jesus e n’en ni ke yog ngak pi gachalpen, ya manang ni boch nga m’on ma ra moy e girdi’ nra fanenikayrad, maku manang ni machib ni yibe tay e ra garer u yugu boch e binaw. (Luke 22:36) U lan raay e duw ni ke yan, ma ulung rok Jehovah e boor kanawoen e machib nib thilthil ni ur ted, ni bod ni yad ma fanay e testimony cards, nge radio broadcast, nge sound cars, ma pi n’ey e be yan u rogon e tin nib t’uf ko girdi’ e ngiyal’ nem. Ma ngiyal’ ney ni ke mo’maw’ ni ngan pirieg e girdi’ u tabinaw rorad, ere yibe pi’ e athamgil nga lanin’uy ni gathi kemus ni ngan machib u mit e tabinaw i yan, ya ngkun machib u bang ni boor e girdi’ riy, ma ngkun machib u fithik’ e sabethin. Maku kan pi’ e athamgil nga lanin’dad ni ngad machibgad u mit e tabinaw i yan ni blayal’ nfaanra ma un e girdi’ ko maruwel ni rran. Ere ga ma fol u rogon ni ma pow’iydad e ulung rok Jehovah u tharmiy u rogon ni be thilyeg kanawoen?—Ezek. 1:20, 21.
3. Uw rogon nra yib angin ngom nfaanra ga ra thilyeg kanawoen e machib ni ga ma tay?
3 N’en ni Ngam Weliy: Mang e pi n’en nib ga’ ni be magafan’ e girdi’ ngay u lan e binaw rom? Pi n’en ni bay rogon ko nam rorad, ara girdien e tabinaw rorad ara mahl ni be buch? Bfel’ nfaanra kad nanged e magawon nge rarogon e girdi’ ko binaw rodad ya nge yag ni ngad fal’eged rogodad ni ngad nonad ngak e girdi’ u nap’an ni gad ra yan ko machib. (1 Kor. 9:20-23) Nap’an nra weliy be’ laniyan’ u nap’an ni kam mada’gow u nap’an e machib, mab fel’ ni ngam non ngak u reb e kanawo’ ni ga be ayuweg ko magawon rok ko bin ni ngam weliy ngak murung’agen e n’en ni kam fal’eg rogon ni ngam weliy, machane de m’ag ko magawon rok.
4. Mang fan ngad gurgad ngad thilyeged boch ban’en?
4 Dabki n’uw nap’an ma ra m’ay e re maruwel ney ni machib, ma ra tabab fare gafgow nib ga’. “Daki yoor e tayim ni ke magey.” (1 Kor. 7:29) Ere rib ga’ fan ni ngad gurgad ni ngad thilyeged kanawoen e machib ni gad ma tay, ya nge yag ni nge yib angin e ngiyal’ ney ni ke chugur e tomur!