‘Urngin e Pi N’ey ni Ngam Rin’ ni Fan ko Fare Thin Nib Fel’’

1. Mang e baadag e pi tamachib ko Gil’ilungun ni ngar rin’ed, ma mang fan?

¹ Ke nang Paul nib milfan ngak ni nge machibnag fare thin nib fel’ ngak e girdi’. (1 Korinth 9:16, 19, 23) Ku arrogodad ni gad ma machibnag e girdi’ ni bochan e ri gad baadag ni nge yog e yafos ni manemus ngorad.

2. Mang boch ban’en nrayog ni ngad thilyeged u rarogon e machib ni gad ma tay, ma mang fan?

² Mu Machib ko Gin Nrayog ni Ngam Pirieg e Girdi’ Riy nge Ngiyal’ Nrayog ni Ngam Pirieg e Girdi’: Be’ nib salap ko fita’ e ma fita’ ko ngiyal’ ni bay nig riy nge gin ni bay e nig riy. Ku arrogodad ni gadad be “yognag e girdi’” ere thingar da thilyeged boch ban’en u rarogodad nge yog nda pirieged e girdi’ ko gin ni gad ma machib riy miki yog nda felfelan’gad ni kad uned i kunuy “urngin mit e nig” nib fanathin. (Matthew 4:19; 13:47) Rayog ni ngad machibgad ko ngiyal’ ni ke sul e girdi’ ko maruwel ko balayal’ fa kakadbul ni ka bay e girdi’ u tabinaw rorad, fa? N’en ni ke nameg Paul e nge “weliy ngan nang e Thin Nib Fel’” u gubin ngiyal’ ni ke mab e kanawo’ ngak ni nge rin’ riy.​—Acts 17:17; 20:20, 24.

3, 4. Mang boch e kanawo’ nrayog ni ngad thilyeged rogon e machib ni gad ma tay riy, ma mang angin nra yib riy?

³ Mu Puluwnag e Machib ni Ga Ma Tay Nga Rarogon e Girdi’: Pi tafita’ e yad ma thilthilyeg rogon e fita’ ni yad ma tay ya nge yog nra koled e nig ni boor. Ere, gadad e uw rogon ni ngad machibnaged fare Thin nib Fel’ u rogon nib m’ag ko girdi’ ko gin ni gad ma machib riy? Thingar da gayed rogon ngad nanged laniyan’ e girdi’ nge yog nda weliyed ban’en ni yad ra adag ni ngar motoyilgad ngay ma gad motoyil nib fel’ rogon ko n’en ni yad ra yog riy. (James 1:19) Rayog ni ngad fithed boch e deer u rogon e n’en ni yad be lemnag. (Proverbs 20:5) Faan gad ra rin’ ni aray rogon ma aram e rayog ni ngad puluwniged e machib rodad nga rarogon e girdi’ me yog ni taw e thin ni gad be weliy nga gum’ircharad ni bod Paul ni mang “urngin mit e girdi’ ngak urngin mit e girdi’.” (1 Korinth 9:22) Riyul’ ni ireray reb e kanawo’ nra taw e thin riy nga gumir’chaen e girdi’.

⁴ Ri gad be felfelan’ ni gad be un i machibnag fare “thin nib fel’”! (Isaiah 52:7) Ere manga yugu da rin’ed ‘urngin ban’en ni fan ko fare Thin Nib Fel’’ nge yog ni taw e machib ngak urngin e girdi’ nrayog.​—1 Korinth 9:23.