Rogon ni Ngad Lemnaged e N’en ni Gad Ra Yog Nra Pug e Tafinay ku Be’
1. Uw feni ga’ fan ni nga dogned boch ban’en nra pug e tafinay ku be’ ni kad mada’naged?
1 Faan ga ra yog boch ban’en nra pug e tafinay ku be’ ni kam mada’nag, ma aram e ra mom ni ngam weliyew boch e thin nu Bible. Rayog ni nge thilthil n’umngin nap’an ni ngam non ara n’en ni ngam weliy, machane bin nib ga’ fan riy e thingar mu fal’eg i lemnag u m’on riy e n’en nib fel’ ni nga mog, ni bod rogon ni ga be fal’eg rogon ba mit e ggan ya nge yan i aw nib fel’ lamen. (Prov. 15:28) Ere, uw rogon ni nga dogned boch ban’en nra pug e tafinay ku be’ ni kad mada’naged?
2. Uw rogon ni ngad lemnaged e n’en ni nga dogned ku be’ u nap’an e machib nra adag ni nge motoyil ngay?
2 Mmel’eg Boch Ban’en Nra Pug e Tafinay Rok Be’: Thingar da weliyed boch ban’en nra pug e tafinay rok faen ni ka darod nga tafen, ya faanra danga’ ma ra dabuy facha’ ni nge motoyil ngodad. Ere, nap’an ni gad be fal’eg rogodad ni fan ko machib, ma ngad lemnaged boch ban’en nra adag e girdi’ ko gin ni gad ma machib riy ni ngar motoyilgad ngay. Baadag e girdi’ u lan binaw ni ngan weliy murung’agen e am nib fel’, ara tabinaw nib fel’, ara rogon nra chuw e mahl, fa? Girdi’ e ba ga’ ni yad baadag ni ngar weliyed lanin’rad u boch ban’en, ere ba fel’ ni ngad lemnaged boch e deer ni ngad fithed ngorad ni ngar weliyed lanin’rad riy. Gur, rayog ni ngam fanay boch e thin ni bay ko bin tomur e page ko Machib ko Gil’ilungun mag guy rogon ni nge m’ag ko gin ni ga be machib riy? Mang ndab mmarod chon e tabinaw rom u daken e pi n’ey u nap’an e Fol Bible ni Tabinaw?
3. Uw rogon ni ngad guyed rogon ni nge puluw e n’en ni ngad weliyed ko yalen rok be’ ni gad be machibnag ara gin ni ke yib riy?
3 Mu Lemnag Rogon e Yalen rok Facha’ nge Gin ni Ke Yib Riy: U boch e binaw, e nnap’an ni yira yan nga tafen be’ ma som’on e thingar ni weliy fan ni kan yan e ngaram. Mu boch e binaw e ba kireb ko yalen riy ni ngam man nga tafen be’ ma dab mu fith salpen, ma ku dab mu weliy boch ban’en u murung’agem u m’on ni ngam weliy fan ni kam man e ngaram. Ku bay boch e binaw nib mom ni ngan weliy murung’agen e Bible riy ni bochan e yooren e girdi’ e bay e teliw rorad. (Acts 2:14-17) Machane, faanra kam mada’nag be’ ni ma un nga reb e teliw ndarur rogned ni yad e Kristiano, ara be’ nder ma un nga barba’ e teliw, ma sana ba fel’ ni ngam weliy murung’agen e Bible u nap’an ni ga ra sul ni ngkum guy bayay, ko bin ni nga yugu mmada’gow mag weliy murung’agen e Bible ngak.—Acts 17:22-31.
4. Mang boch ban’en ni ngad fal’eged i lemnag u murung’agen e n’en ni nga dogned ngak be’ ko som’on?
4 N’en ni Nga Mog ko Som’on: Mu fal’eg i lemnag e n’en ni nga mog ko som’on. De fel’ ni nga dogned boor ban’en, ma kub fel’ ni nga dogned boch ban’en nib mom ni yira nang fan. Kub ga’ fan ni ngad lemnaged rogon ni gad ra non. Ma susun ni ngkud nonad u fithik’ e pasig. Ma nap’an ni gad be non mab fel’ ni ngad siminmingad, ma gad dag ngorad nriyul’ ni gad baadag ni ngad nonad ngorad. Faan gad ra fol ko pi thin ney ma ra ayuwegdad ni ngad weliyed boch e thin nra k’aring e girdi’ ni ngar adaged ni ngar “abichgad u tebel rok” Jehovah.—1 Kor. 10:21.