Ngan Ayuwegrad ni Nge ‘Gel i Yan e Michan’ Rorad’

Ri gad ba felfelan’ ni gad be guy rogon ni be tow’athnag Jehovah e girdi’ ni be yib nga lan e ulung rok, ya ra reb e duw mab pag 250,000 e girdi’ ni yibe taufenagrad. (Deut. 28:2) Nap’an nra ayuweg reb e walag be’ ni nge un ko taufe, mab ga’ nib mom ni ngar talgow ko fol Bible ngkur gayew boch e girdi’ ni ngar ayuwegew. Maku dabisiy nra adag faen ni kan fil e Bible ngak ni nge tal ko fol Bible ya nge yag ni yoor e tayim rok ni fan ko machib. Machane, rib ga’ fan ni ngari tamilang e tin riyul’ u wan’ be’ ni yibe fil e Bible ngak. Ba t’uf ni ngar tiyed ‘lik’ngirad’ nib toar nga fithik’ Kristus, mi i ‘gel i yan e michan’rad rorad ngak.’ (Kol. 2:6, 7; 2 Tim. 3:12) Ere, tomuren nra un be’ ni yibe fil e Bible ngak ko taufe, ma susun ni ngki ulul i fil e Bible nge taw ko ngiyal’ ni ke mu’ i fil fare babyor ni Mang e Ri Be Fil e Bible nge ‘T’ufeg rok Got.’​—Mu guy e Machib ko Gil’ilungun ko April 2011 ko page 2.