Boch Ban’en Nrayog ni Nga Nog

Rogon ni Ngan Tabab i Fil e Bible ngak Be’ ko Bin Som’on e Sabado ko Pul ni January

“Ra be’ ma rogon ni ma lemnag Got. Boch e girdi’ e yad ma lemnag nib mo’maw’ ni ngan nang rarogon Got. Boch e girdi’ e yad ma tay ni Got e ir e Chitamangirad ni bay u tharmiy. Me gur e, uw rogon Got u wan’um?” Mmotoyil ko n’en nra yog. Mag dag e thin ni bay u wuru’ fare Wulyang ko Damit ko January 1, mi gimew weliy e thin ni bay u tanggin e bin som’on e deer nge reb e thin nu Bible ni bay riy. Mu pi’ fare magazine ngak, mag yarmiy e rofen ni ngkum sul ngam weliyew e bin migid e deer riy.

Fare Wulyang ko Damit January 1

“Daba’ e gamad be weliy murung’agen ban’en nib ga’ ni ma magawonnag boor e girdi’, ni aram e nap’an nra yim’ be’ nib t’uf rodad. Uw rogon u wan’um, gathi riyul’ nnap’an nra yim’ reb e fager rodad ara reb e girdi’ rodad, ma rib gel e kireban’ ni gad ma tay? [Mmotoyil ko n’en nra yog.] Boor e girdi’ ni ma fal’eg e re thin ni baaray lanin’rad. [Mu beeg e Isaiah 25:8.] Re ke babyor ney e be weliy e n’en ni ke micheg e Bible ni aram e ra boch nga m’on ma dab ku unim’ ma yira faseg e piin ni kar m’ad ni yad ba t’uf rodad.”

Rogon ni Ngan Tabab i Fil e Bible ngak Be’ ko Bin Som’on e Sabado ko Pul ni February

“Girdi’ ni gamad ma mada’nagrad e ba thilthil rogon ni yad ma lemnag e Bible. Boch i yad e ba mich u wan’rad ni Bible e Thin rok Got, ma boch i yad e ma lemnag ni taareb rogon e Bible nga yu ken e babyor. Uw rogon e Bible u wan’um?” Mmotoyil ko n’en nra yog. Mu dag ngak e thin ni bay ko bin tomur e page ko fare Wulyang ko Damit ko February 1, mi gimew weliy e thin ni bay u tan e bin som’on e deer nge reb e thin nu Bible riy. Mu pi’ fare magazine ngak, mag yarmiy ni ngkum sul ngam weliyew e bin migid e deer.

Fare Wulyang ko Damit February 1

“Yooren e girdi’ e yad baadag ni ngar guyed ni ke tal e mahl. Ga be lemnag ma rayog ni nge yib e gapas nga fayleng? [Mmotoyil ko n’en nra yog.] Am tay fanam i yan ko n’en ni be micheg e Bible ngodad. [Mu beeg e Psalm 46:9.] Pi n’en ni ke buch u nap’an e Bin Som’on e Mahl ko Fayleng ngu tomuren e be micheg ndab ki n’uw nap’an me lebguy Got e re yiiy ney me taleg e mahl ndariy n’umngin nap’an. Re magazine ney e be weliy murung’agen e re n’ey.”