Mu Pi’ e Pi Magazine ni Ke N’uw Nap’an

Susun ni ngad guyed rogon ni ngad wereged e pi magazine ni bay rodad ni ke n’uw nap’an, ya dabi yib angin ko girdi’ ni faanra yugu da chaariyed ara da n’aged. Rayog ni nge k’aring taab ken e magazine be’ ni nge adag e tin riyul’ me pining fithingan Jehovah. (Rom. 10:13, 14) Baaray boch e kanawo’ nrayog ni ngad pied e pi magazine riy ni ke n’uw nap’an.

• Nap’an ni ga be machib ko yungi n’en ni gathi ri gad ma yan ngay ko machib ni gubin ngiyal’, ma sana rayog ni ngam tay ba ken ko pi tabinaw ndariy be’ riy.

• Nap’an ni ga be machib ko gin ni ma muulung e girdi’ ni yoor ngay, ni bod rogon e yungi n’en ni yima sonnag e bus riy ara aspital, ma rayog ni ngam fith e girdi’ ko yad baadag ni ngar beeged ba ken e babyor fa danga’. Ngemu’, ma ga dag boch e magazine ngorad ni ke n’uw nap’an ma gog ngorad ni ngar feked e ken ni yad baadag ni ngar beeged riy.

• Nap’an ni ga bay u laundromat, ara nap’an ni kam man nga aspital ma rayog ni ngam tay yu ken e pi babyor ney ko gin ni ma son e girdi’ riy. Ba ga’ nib fel’ ni ngam fith be’ u m’on ni ngam tay e pi babyor ney. Faanra kam guy ni bay boch e magazine rodad ni ke tay be’ u rom, ma dab kum tay boch.

• Nap’an ni ga be fal’eg rogom ni ngam sul ngak be’, ma ga lemnag e n’en ni baadag facha’ ni ngam weliyew. Bay e tabinaw rok, fa? Baadag ni ma chur, fa? Baadag e milay’, fa? Mu yaliy boch e article ko pi magazine rodad ni ke n’uw nap’an ni ga be lemnag nra adag ni nge beeg. Ma nap’an ni ga ra sul ni ngam guy, ma ga dag ngak.

• Faanra kam pirieg be’ u tafen ni ke yoor yay ni ga ma guy rogon ni ngam mada’gow machane der yag, ma ga dag ngak boch e magazine rodad u boch e pul ni ke yan nde yag ni ngam pi’ ngak.