Uw Rogog u Wan’ Jehovah?
1. Mang fan nrayog ni ngan taareb rogonnag e Bible ko therek?
1 Uw urngin yay ni ga ma yaliy yaam nga therek? Yooren i gadad e ma yaliy yaan nga therek ni gubin e rran, ya bochan nre n’ey e ra ayuwegdad ni ngad guyed boch ban’en u rarogon yaadad nib t’uf ni ngad thilyeged. Kan taareb rogonnag e Bible ko therek. Ra ud beeged e Thin rok Got, ma ra ayuwegdad ni ngad nanged e bin riyul’ i rarogodad, ni aram e n’en ni ma yaliy Jehovah. (1 Sam. 16:7; Jas. 1:22-24) Thin rok Got e rayog ni nge “pufthinnag e n’en ni yima yim’ ni bochan nge tin ni yima lemnag.” (Heb. 4:12) Ere, faanra ud beeged e Bible ni gubin e rran ma gad be fal’eg i lemnag e thin riy, ma uw rogon nra ayuwegdad ni ngad nanged e pi n’en nib t’uf ni ngad thilyeged u rarogodad ya nge yag nda manged boch e tamachib nib fel’?—Ps. 1:1-3.
2. Uw rogon nrayog ni nge ayuwegdad e Bible ni ngad fal’eged i yaliy rarogodad?
2 Mu Yaliyem nga Fithik’ e Thin rok Got ni Bod ni Ga Be Yaliy Yaam nga Therek: Pi thin nu Bible ni be weliy murung’agen e pi tapigpig rok Jehovah ni yad ba yul’yul’ e be dag rarogon e miti fel’ngin ni baadag Got ni nga i m’ug rodad. Bod ni, David e ba pasig ni i fek fithingan Got. (1 Sam. 17:45, 46) Me Isaiah e de rus ni nge ognag ir ni nge machib u reb e binaw nib mo’maw’ e machib riy. (Isa. 6:8, 9) Bochan nri ma t’ufeg Jesus e Chitamangin ni bay u tharmiy ma aram fan ni i felfelan’ ko machib ni i tay, ma de lemnag ni kaygi mo’maw’ e re maruwel nem. (John 4:34) Ku er rogon e pi Kristiano ko bin som’on e chibog ni ur machibgad u fithik’ e pasig, mu ur taga’gad ngak Jehovah, mar dugliyed u wan’rad ndab ra talgad. (Acts 5:41, 42; 2 Kor. 4:1; 2 Tim. 4:17) Gad ra fal’eg i lemnag e pi n’ey, ma ra ayuwegdad ni ngad yaliyed rarogodad nge rogon ni ngad mon’oggad ko pigpig ni gad be tay.
3. Mang fan ndab da sagaalgad ni ngad thilyeged e tin nib t’uf ni ngad thilyeged u rarogodad?
3 Mu Yal’uweg e Pi N’en nib T’uf ni Ngam Yal’uweg: Faan gad ra yaliy yaadad nga therek, ma dab da thilyeged e pi n’en nib t’uf ni ngad thilyeged u rarogodad, ma ra yan i aw nib m’ay fan ni kad yaliyed yaadad ko fagi therek. Ere, rayog ni nga dogned ngak Jehovah ni nge ayuwegdad ni ngad yaliyed gadad ma gad thilyeg e tin nib t’uf ni ngad thilyeged u rarogodad. (Ps. 139:23, 24; Luke 11:13) Bochan ndaki yoor e tayim ni ke magey, ma aram fan nthingar da gurgad ngad thilyeged e tin nib t’uf ni ngad thilyeged u rarogodad.—1 Kor. 7:29; 1 Tim. 4:16.
4. Mang e buch ko fare pumoon ni faani yaliy ir nga fithik’ e Thin rok Got, me thilyeg e pi n’en ni ke guy nib t’uf ni nge thilyeg?
4 Bin riyul’ i rarogon be’, ara fithik’ i laniyan’ be’ e aram e n’en ni ma sap Jehovah ngay, ma kab ga’ fan e re n’ey nga rarogon facha’ nrayog ni nge guy e girdi’. (1 Pet. 3:3, 4) Mang e buch ko fare pumoon ni faani yaliy ir nga fithik’ e Thin rok Got, me thilyeg e pi n’en ni ke guy nib t’uf ni nge thilyeg? Cha’nem e “gathi ke mus ni motoyil” ko thin rok Got me pag talin, “ya be maruwel ngay—cha’nem ni aram rogon e Got e ra ayuweg ko tin ni be rin’.” (Jas. 1:25) Arrogon, faanra “gal ramaen Somol rodad ni ke af rok ngodad,” ma aram e rayog ni ngad pared ni gad ba felfelan’ ma gad mang boch e tamachib nib fel’.—2 Kor. 3:18.