Mu Fanay e Bible ni Bod Bangi Therek

James nreb i gachalpen Jesus e taarebrogonnag e Bible nga bangi therek nra ayuwegdad ni ngad guyed e bin riyul’ i rarogodad. (Jas. 1:​22-25) Uw rogon nrayog ni ngad fanayed e Bible nib fel’ rogon ni bod bangi therek?

Mu beeg nib fel’ rogon. Faanra kemus ni kad sapgad nga mit e therek ma gad fulweg owchedad nib papey, ma dabisiy ndab da guyed ban’en nib t’uf ni ngad thilyeged u rogon yaadad. Ku arrogon ni faanra ngad guyed boch ban’en u rarogodad nib t’uf ni ngad thilyeged, ma aram e ba t’uf ni ngad beeged e Thin rok Got nib fel’ rogon.

Mu yaliy e n’en nib t’uf ni ngam mon’og riy, ma gathi n’en nib t’uf ni nge mon’og be’ riy. Faanra kad cheleged fare gi therek ke sap nga bang, ma sana gad ra guy e n’en nib t’uf ni nge thilyeg be’ u rogon yaan. Ku arrogon nrayog ni ngad fanayed e Bible ni ngad yaliyed thibngin yugu be’. Machane faan gad ra rin’ e re n’ey, ma dabi ayuwegdad ni ngad thilyeged e n’en nib t’uf ni ngad thilyeged u rarogodad.

Nge puluw rogon e lem rom. Faanra yigoo thibngidad e ngad pared ngaud yaliyed ko fagi therek, ma rayog ni nge mulan’dad. Ere ba t’uf ni nge puluw e lem rodad u nap’an ni gad be beeg e Thin rok Got ni aram e dab ud lemnaged ni ngad rin’ed boch ban’en nder lemnag Jehovah ni ngad rin’ed.​—Jas. 3:17.