Boch Ban’en Nrayog ni Nga Nog

Uw e Rayog ni Ngad Pirieged e Fulweg Riy u Boch e Deer nib Ga’ Fan?

Mu pi’ fagi tract ngak facha’ ya nge yag ni guy e thin ni bay u wuru’, me lungum: “Siro’. Gamad be wereg e gi babyor ney u ga’ngin yang e fayleng ya bay boch e thin riy nib ga’ fan. Ireray e gi rom e babyor.”

Faanra ngam tay e gi tract ney u reb e tabinaw nde moy be’ riy, mag guy bang ni ngam tay riy ndabi guy e girdi’ ni be yan u kanawo’, maku reb e dab mu tay e gi tract ney ni kam t’ar u lukngun.

Faanra kam man nga tafen be’ ni baadag e machib, ma rayog ni ngam fith rogon laniyan’ ko fare deer ni bay u wuru’ e re gi tract ney. Ngemu’ mag pithig nga baan langgin, ma ga dag ngak e n’en ni be yog e Psalm 119:144, 160. Mog ngak ni bay boch ban’en ko re tract ney ni be weliy murung’agen ba Web site nrayog ni nge ayuweg ni nge nang e fulweg u boch e deer rok ni bay rogon ko Bible. Ma faanra bay e tayim rok ma rayog ni ngam playnag fare video ni Mang Fan ni Ngam Fil e Bible? nge yaliy. U m’on ni ngam chuw, ma ga beeg ngak fa dalip i deer ni bay u barba’ e re tract ney, ma ga fith ngak ko bin ngan e baadag ni nge nang e fulweg riy. Ma gog ngak e rofen ni ka ga ra sul ni ngam weliy e fulweg ko re deer ney ngak ni ga be fanay e jw.org. Nap’an ni ga ra sul mi gimew weliy e fulweg riy u tan fare thin ni BIBLE TEACHINGS > BIBLE QUESTIONS ANSWERED.

Faanra yibe wereg e invitation ni fan ko convention, ma rayog ni ngam pi’ fare invitation ngak facha’ u tomuren ni kam pi’ fare tract ngak me lungum, “Ku baaray reb e invitation ni gamad be wereg ni fan nga reb e muulung ni bay nni tay nib puf mat’awun urngin e girdi’ ngay.”

Fare Wulyang ko Damit August 1

Faanra kam pi’ Fare Wulyang ko Damit ko Sabado ara Madnom, ma rayog ni nge lungum: “Ka gamow baadag ni nggu piew reb e magazine romad ni kab beech ngom. Re ke babyor ney ni Fare Wulyang ko Damit e be pi’ e fulweg ko re deer ni baaray ni be gaar, Ba Ga’ Fam u Wan’ Got, Fa?”