Ke Gaman Raay e Duw ni Kan Weliy Murung’agen Gil’ilungun Got!
1. Mang e kan pi’ e athamgil nga laniyan’ e pi tapigpig rok Jehovah ni ngar rin’ed ni ke chugur ni nge gaman raay e duw ni ke yan?
1 “Am sapgad, be gagiyeg fare Pilung! Gimed e pi tamachib rok. Ere, ngan machibnag, ngan machibnag, ngan machibnag, murung’agen fare Pilung nge gil’ilungun.” Pi thin ney ni yog Brother Rutherford ni ke chugur ni nge gaman raay e duw ni ke yan e ir e ke pi’ e athamgil nga laniyan’ e pi tapigpig rok Jehovah ni ngar weliyed fare thin nib fel’ ni murung’agen Gil’ilungun Got u gubin yang u fayleng. Ma aram e n’en ni kad rin’ed! Kad machibnaged fare thin nib fel’ ni murung’agen Gil’ilungun Got “ngak urngin e girdi’ u fayleng,” ni bod rogon ni rin’ e pi Kristiano kakrom. (Kol. 1:23) Mang e kad rin’ed ko fa binem e chibog ni ke yan ya nge yag nda weliyed murung’agen Gil’ilungun Got ko girdi’? Uw rogon ni ngad ululgad i weliy murung’agen e re am ney ko girdi’ u nap’an ni gad be chugur ko ngiyal’ nra gaman 100 e duw ni ke gagiyeg Gil’ilungun Got riy?
2. Uw rogon ni ma weliy e pi babyor rodad murung’agen Gil’ilungun Got?
2 Pi N’en ni Kad Rin’ed Kafram: Ke yoor e duw ni gad ma ngongliy boch e babyor ni be weliy murung’agen Gil’ilungun Got. Ka nap’an e duw ni 1939 ni kad ngongliyed fare magazine ni kenggin e: Fare Wulyang ko Damit Ni Be Weliy Morngaagen Gil’ilungun Jehovah. Re magazine ney e ba ga’ ni ma weliy murung’agen Gil’ilungun Got nge n’en nra rin’ boch nga m’on. Fare magazine ni yima yog e Awake! ngay e be tamilangnag ni kemus ni Gil’ilungun Got e rayog ni nge ayuweg e girdi’. Ere, chiney e ke yan i par ni ireray e gal ke magazine nth’abi yoor ni yibe pilyeg, ngemu’ min wereg u ga’ngin yang e fayleng!—Rev. 14:6.
3. Mang boch e kanawo’ ni kad weliyed murung’agen Gil’ilungun Got riy?
3 Boor rogon ni ke weliy e pi tapigpig rok Jehovah murung’agen Gil’ilungun Got. Kafram e un fanay boch e karrow ni ka nog e sound cars ngay, ara un non u radio, ara un fanay boch ban’en ni ka nog e portable phonographs ngay. Ireray e pi n’en ni i ayuweg e pi tapigpig rok Got kakrom ni ngar wereged fare thin nib fel’ ko girdi’ u nap’an ndawori yoor e tamachib. (Ps. 19:4) Ma chiney e kan tay boch ban’en ko jw.org ni nge ayuweg bokum milyon e girdi’ ni ngar nanged murung’agen Gil’ilungun Got, ni ki mada’ ko tin baaray e nam ni kan taleg e machib riy.
4. Mang boch e kanawo’ ni gad ma machib riy?
4 Ku bay boch e kanawo’ ni ma machibnag e pi tapigpig rok Jehovah fare thin nib fel’ riy ni murung’agen Gil’ilungun Got. Bod ni, nap’an ni taw nga lukngun e pi duw u thilin e 1990 nge yan i mada’ ko 1999, ma gad athamgil ni ngkud yoornaged e kanawo’ ni gad be machib riy, ya nge yan i aw ni gathi kemus ni yigoo machib u mit e tabinaw e ngaun tay. Aram e ngiyal’ nni tabab ko machib u park, ngu lan e parking lot, ngu tagil’ e siyobay. Maku dawori n’uw nap’an ma kan tabab ko machib ko yungi n’en ni ma muulung e girdi’ ni yoor ngay ko pi nam ni gagang’ u fayleng i yan. Yugu aram rogon ma ka gad ma tay ni machib u mit e tabinaw e aram e re mit i machib nib ga’ ni gad ma tay.—Acts 20:20.
5. Mang boch ban’en nrayog ni ngad rin’ed u nap’an e bin nib beech e service year?
5 Boch Ban’en ni Bay Nga M’on: Nap’an e pul ni September e aram e ngiyal’ nra tabab e bin nib beech e service year, ma boor e girdi’ ni yad ra un ko regular pioneer. Ere, rayog ni ngam un ngay, fa? Ma faanra dabiyog, ma gur, rayog ni ngam un ko pioneer ni ayuw, fa? Demtrug ko rayog ni ngam un ko pioneer fa danga’, ma dariy e maruwar riy nra tow’athnagem Jehovah ko pi n’en ni ga ra pag fan ya nge yag nim un i weliy murung’agen Gil’ilungun.—Mal. 3:10.
6. Mang fan ni fare pul ko October ko duw ni 2014 e aram reb e pul ni yugu ba thil?
6 Ra taw ko October ko duw ni 2014 ma ke gaman 100 e duw ni ke tabab Gil’ilungun Got ko gagiyeg. Fare Wulyang ko Damit ko re pul nem e ra weliy murung’agen Gil’ilungun Got. Ere, mang ndab mu athamgil ni ngam wereg e re ke babyor ney ngak urngin e girdi’ nrayog ni ngam wereg ngorad? Ere, chiney ni gad be athapeg e pi n’en ni bay nga m’on e ngad athamgilgad ni nge bagadad me ulul i machibnag fare ‘Thin Nib Fel’ ni murung’agen e gagiyeg rok Got’ ngak urngin e piin ni yad ra motoyil ngay.—Acts 8:12.