Boch e Yaram nib Beech ni Ngan Machib u Fithik’ e Girdi’ ni Yoor
1. Mang e rin’ e pi Kristiano ko bin som’on e chibog, nrayog ni ngad folwokgad riy?
1 Pi Kristiano ko bin som’on e chibog e gathi kemus ni ur machibgad u mit e tabinaw i yan. Ya kur machibgad u fithik’ e girdi’ ni yoor. (Acts 20:20) Ni bod ni u ranod nga tempel ko gin ni yira pirieg boor e girdi’ riy. (Acts 5:42) Nap’an ni immoy Paul u Athens me machibnag e girdi’ ni gubin e rran u bangi n’en ni ma muulung e girdi’ ngay. (Acts 17:17) Ngiyal’ ney e ba ga’ ni gad ma machib u mit e tabinaw i yan. Machane, ku gad ma machib ko gin ni yima tay e karrow riy, nge tagil’ e siyobay, nge park, nge bang i kanawo’ ni boor e girdi’ riy, nge ku yu yang nrayog ni ngan pirieg e girdi’ riy. Yugu aram rogon ni yibe pi’ e athamgil ngak e pi publisher ni ngar machibgad u fithik’ e girdi’ ni yoor, maku bay boor i yad nra un nga l’agruw e yaram ko machib nib beech.
2. Mang yaram ko machib nib beech e kan tababnag ko November 2011?
2 Machib u Fithik’ e Girdi’ ni Yoor ko Pi Mach nib Ga’: Rogon ni bay ko fare Yearbook ko 2013 ko page 16 nge 17 e bay reb e yaram ko machib ni ke tabab ko mach nu New York ko November 2011. Boch e tebel nge cart e kan tay boch ban’en nga daken nib fel’ yaan nge boch e babyor u boor mit e thin, min tay u yu yang ko fare mach ni boor e girdi’ ni be yan u rom. Gubin e rran ni boor e girdi’ ni be yan u rom, nib muun ngay e piin ni yad ma par ko pi naun ni darur paged e Pi Mich ni ngar machibgad riy nge girdi’ nib mo’maw’ ni ngan piriegrad u tabinaw rorad. Boor e girdi’ e yad baadag e pi babyor rodad. U lan reb e pul ndawori n’uw nap’an ma ke gaman 3,797 e pi magazine nge 7,986 e pi babyor ni kan pi’ ngak e girdi’. Ma boor e girdi’ ni ka rogned ni yad baadag ni ngar uned ko fol Bible. Bochan ni n’en ni yibe nameg e ngan tababnag e fol Bible, ma aram fan ni urngin e address ni ke pi’ e girdi’ ni yad baadag e fol Bible e ke pi’ e pi walag ko pi ulung nib chugur ko tabinaw ko pi girdi’ nem, ya nge yag ni nge yan e pi walag ko re ulung nem i guyrad.
3. Uw rogon ni ke garer e re yaram ney?
3 Bochan ni ke yib angin e gal yaram ney ko machib, ma aram fan ni kan rin’ u yugu boch e mach nib ga’ u ga’ngin yang u fayleng. Pi branch ofis e yad ra dugliy ko bin ngan e mach e ngan tay e re yaram ney riy. Ba ga’ ni ireray e pi mach ni boor ban’en ni yibe rin’ riy ara boor tagil’ e ofis riy ara boor e naun ko girdi’, ere ba ga’ ni boor e girdi’ ni be yan u rom. Ma aram e branch ofis e ra yol ngak e pi ulung ni yad ra un ko re yaram ney, ma ngkur weliyed ko mang e pi n’en ni ngar rin’ed. Ba ga’ ni yima fanay e regular pioneer nge special pioneer ko re maruwel ney, machane yu yang e ku yima fanay e pioneer ni ayuw.
4. Uw rogon e machib ni yima tay ko pi mach nib ga’?
4 Rogon ni Yibe Machib: Piin ni yad ma un ko machib u lan e pi mach e ba ga’ ni yad ma sonnag e girdi’ ni ngar bad ko fare tebel ni bay e pi babyor riy. Ma nap’an nra yib be’, ma yima pining ni nge fek e bin baadag e babyor. Pi pioneer e rayog ni ngar pied e fulweg ko deer rok ni yibe fanay e Bible. Ma faanra fek be’ reb e babyor ma dab ni weliy ngak murung’agen e salpiy ni yima pi’ ni ayuw. Machane, faanra ra fith ko uw e ma yib e salpiy riy ni ngan rin’ e re maruwel ney, ma rayog ni nge weliy e pi pioneer murung’agen e salpiy ni yima pi’ ni ayuw nrayog ni ngan pi’ ko fare address ni bay ko babyor. Faanra rayog, ma yad ra fith ni nge lungurad: “Ga baadag ni nge guyem be’ u tabinaw rom?” ara “Ga manang ni faan ga ra fek reb e babyor ma rayog ni ngan fil e Bible ngom ndariy puluwon?”
5. Uw rogon ni ke yib angin e re yaram ney nib beech ngak ba wu’ i mabgol?
5 Ra un e girdi’ ko re yaram ney, ma ra yib angin ngorad. I yoloy ba wu’ i mabgol ni gaar: “Ra gu sak’iygow ko tebel ma gamow be guy e girdi’ ni boor ni yad be yanyan ni gubin e rran, ma re n’ey e ke ayuwegmow ni ngguyew fare maruwel nib ga’ ni yibe rin’ u ga’ngin yang e fayleng ni yibe ayuweg e girdi’ ni ngar nanged murung’agen e thin rok Got. Nap’an ni gamow be guy e pi girdi’ ney ni boor, ma gamow be lemnag ko uw rogon ni be ayuweg Jehovah urngin e girdi’ e ke pi’ e athamgil nga lanin’mow ni nggu m’onegew e machib ko yafas romow. Gamow be susunnag ni be fal’eg i yaliy Jehovah gum’irchaen gubin e girdi’ ni yad be yan u tooben fare tebel, ya nge nang ko mini’ e baadag e machib. Kug thamiyew ni ke fel’ e tha’ u thilmad e pi engel.”
6. (a) Mang reb e yaram ko machib e yibe yarmiy u boor e ulung, ma uw rogon nib thil ko machib ni yibe tay ko pi mach nib ga’? (b) Uw rogon ni nge maruwel e pi ulung u taabang u nap’an ni yibe machibnag e girdi’?
6 Machib u Fithik’ e Yoor ni Ke Yarmiy e Ulung: Maku bay reb e yaram ni ke yarmiy e piin piilal ko pi binaw ni yad be machib riy. Pi publisher e yad ma tay e tebel ara ban’en nib mom ni ngan fek nga bang ni boor e girdi’ ko pi binaw ni yad ma machib riy. Ba thil e re n’ey ko machib ko pi mach nib ga’ ya boor e ulung nrayog ni nga ranod nga yu yang u reb e mach ni ke mel’eg e branch ofis.—Mu guy fare thin ni kenggin e “Ba T’uf ni Ngan Fol ko Yaram.”
7. Faanra ba puluw, ma uw rogon nra yarmiy e piin piilal e machib u fithik’ e girdi’ ni yoor u lan e pi binaw ni yad be machib riy?
7 Piin piilal e yad ra dugliy ko bay bang ko fare territory ni yira mada’nag boor e girdi’ riy, ma yad ra dugliy ko rayog ni ngan yarmiy ni ngan machib u fithik’ e girdi’ ni yoor. Yu yang nrayog ni ngan tay e tebel ara ban’en nib mom ni ngan fek ngay e ba muun ngay e gin ni yima sonnag e bus riy, nge public squares, nge park, nge pi kantin nge campus ko skul nge airport nge yu yang ni yima tay boch e madnom riy. Bay angin nib fel’ nfaanra gubin e ngiyal’ ni yira tay e tebel u taabang i ban’en, u taab rran nge tayim. Kan pirieg ni pi tebel ni yima tay ko pi shopping mall e ba ga’ angin nra yib ko pi tebel ni kan tay nga wuru’ reb e kantin nib ga’, ya girdi’ ni ma yan ngay e yad be tiyan’ ko n’en ni ngar chuw’iyed. U yu yang ni bod e sidewalk e rayog ni ngan fanay e cart nib achig boch ni bay e babyor riy. Piin piilal e rayog ni ngar downloadnaged boch ban’en ko Web site ni ngan fanay ni ngan ngongliy boch e display ko Wulyang ko Damit nge Awake!, nge fare babyor ni Mang e Ri Be Fil e Bible? Pi n’ey e kan fal’eg rogon ni fan ko re yaram ney. Piin ni yad ra un ko re n’ey e yad ra rin’ ni taareb rogon ngak e piin ni yad ra un ko machib u fithik’ e girdi’ ni yoor ko pi mach nib ga’, ma ngar folgad ko n’en nra yog e en service overseer. Faanra kan pi’ reb e address ngorad rok be’ ni baadag e machib machane der ma par ko pi binaw ni yad ma machib riy, ma rayog ni ngar fal’eg fare babyor ni Please Follow Up (S-43) nib papey mar pied ko en secretary.
8. Faanra dariy e yaram ko machib u fithik’ e girdi’ ni yoor ko ulung rom, ma mang machib u fithik’ e yoor e rayog ni ngam un ngay?
8 Machib u Fithik’ e Yoor ko Pi Binaw ni Ga Ma Machib Riy: Boch e ulung e sana dariy bang ko territory rorad ni bay e girdi’ riy ni boor ni be yanyan, ya nge yag ni ngan tay e tebel ara cart ngay. Machane, ku yibe pi’ e athamgil ngak e pi publisher ni ngar uned ko machib u fithik’ e girdi’ ni yoor. Bay e shopping mall, ara strip mall ara reb e kantin ni boor e girdi’ ni be yan ngay ko binaw rom? Bay e park ara bang ni ma muulung e girdi’ ngay? Bay boch ban’en ni bay ngal’an ni kan yarmiy ni yima rin’ ni ma un boor e girdi’ ngay u lan e pi binaw ni gimed ma machib riy? Faanra aram rogon maku rayog ni ngam un ko machib u fithik’ e girdi’ ni yoor.
9. Mang fan nthingari ga’ fan u wan’dad ni ngad machibnaged e girdi’ ni yugu demtrug e gin ni yad bay riy?
9 Ba m’agan’ Jehovah ngay ni “urngin e girdi’ ni ngar thapgad ngak ma ngar nanged e tin nib riyul’.” (1 Tim. 2:4) Ere, aram fan ni gad be gay rogon ni ngad weliyed fare thin nib fel’ ni murung’agen Gil’ilungun Got ngak urngin e girdi’ nrayog u m’on ni nge taw e tomur. (Matt. 24:14) U boor e binaw e ba mo’maw’ ni ngan pirieg e girdi’ u tabinaw rorad. Machane, rayog ni ngad nonad ngorad u nap’an nder med u tabinaw rorad. Machib u fithik’ e girdi’ ni yoor e sana kemus ni ireray e kanawo’ nrayog ni nge rung’ag boch e girdi’ fare thin nib fel’. Ere, rayog ni ngad mu’naged e machib ni gad be tay ni faanra ngad machibnaged e girdi’ ni yugu demtrug e gin ni yad bay riy.—2 Tim. 4:5.
[Kahol ko page 5]
Ba T’uf ni Ngan Fol ko Yaram
Ka nog ni yu ngiyal’ ma bay boch e publisher ni kar bad u boch e ulung e yad ma machib u taa bangi ban’en ni bod u tooben e kanawo’, nge gin ni yima tay e karrow riy, nge gin ni yima chuway’ riy, ara gin ni yima sonnag e bus riy. Boch e publisher ni kar bad ko ulung nib thilthil e yad ma tay e pi magazine ko lobby, nge waiting room, ara laundromat, ma taareb tafen e siyobay ni kar machibgad riy. Ma girdien e siyobay nge yug girdi’ e ke chalbarad ni bochan e re n’ey ni yugu aram rogon ni darur machibgad u taa bangiyal’. Ere, aram fan nib fel’ nra reb e publisher ma thingari machib ko gin ni ka nog ni ngan machib riy.
Faanra baadag e pi publisher ni ngar machibgad u yugu reb e territory, mab t’uf ni ngar nonad ngak faen ni ir e service overseer rorad. Ma aram e rayog ni nge non faen ni ir e service overseer ngak e service overseer ko fare ulung ni baadag e pi walag ni ngan machib riy u m’on ni ngan tabab ko machib. Faanra taareb e territory e nge machib e pi walag ko ulung nib thil e thin rorad, ma thingari non e service overseer ko gal ulung nem ya nge yag ni ngan siyeg i rin’ ban’en nra k’aring e damumuw ngak e girdi’. Faanra yira fol ko yaram, ma rayog ni ngan rin’ urngin ban’en “nib fel’ rogon ma ba yaram.”—1 Kor. 14:40.