Urngin Yay Nra Mab e Kanawo’ Ngomed ma Ngam Machibnaged fare Thin nib Fel’

Fa binem e duw ko 2014 ma ke gaman 1,945,487,604 e awa ni ke un e Pi Mich Rok Jehovah riy ko machib. Ireray e mich riy ni gadad gubin ni kad dugliyed ni ngad pared ni gad be tedan’dad ko fare maruwel ni pi’ Jehovah ngodad ni ngad rin’ed! (Ps. 110:3; 1 Kor. 15:58) Bochan ni “daki yoor e tayim ni ke magey” ni ngad rin’ed e re maruwel ney riy, ma aram fan ni ngad fanayed e tayim rodad ni ngad machibnaged gubin e girdi’.​—1 Kor. 7:29.

Faanra ngad fanayed e tayim rodad ko machib nib fel’ rogon mab t’uf ni ngad thilyeged boch ban’en u rarogon e machib ni gad ma tay. Bod ni faanra ba ga’ ni ga ma yan u mit e tabinaw ko machib ni taareb e awa, mab mo’maw’ ni ngam pirieg e girdi’ ni ngam machibnagrad, me ere gur, gathi be yip’ fan e re n’ey nthingar mu thilyeg e biney e yaram ya nge yag ni ngam pirieg e girdi’ ni ngam machibnagrad? Ra reb e binaw ma rogon e machib ni yima tay riy, machane faanra yira fol ko pi kanawoen e machib ni baaray, ma rayog ni ngam fanay e tayim rom nib fel’ rogon, ya nge yag ni ngam bod be’ ni girdien e tug nder “adbey e tug rok.”​—1 Kor. 9:26.

• Machib u Mit e Tabinaw i Yan: Ke yoor e duw nib ga’ nra kakadbul ma ma yan e pi walag u mit e tabinaw ko machib. Machane, ba ga’ ni boor e girdi’ ni yad ma maruwel ni rran. Ere, gathi bfel’ ni ngam un ko machib u mit e tabinaw ko mithigyal’ ara blayal’ u nap’an ni ke sul e pi girdi’ ney nga tabinaw rorad ma yad be toffan? Rayog ngki yib angin e machib ni gad be tay ni faan gad ra machib u tabon e maruwel i yan ara u kanawo’.

• Machib u Fithik’ e Girdi’ ni Yoor: Rayog ni ngan tay e pi tebel nge cart ni bay e babyor riy ko yungi n’en ni ma yan boor e girdi’ riy ko pi binaw ni ma machib e ulung rom riy. (Mu guy fare Machib Ko Gil’ilungun ko July 2013, ko p. 5.) Faanra kan tay fare tebel ara cart nga bang ni daki yoor e girdi’ ni be yan riy, ma rayog ni nge mel’eg fare Congregation Service Committee ni ngkun tay nga bang ni boor e girdi’ riy.

• Piin ni Gad ma Sul Ngorad nge Piin ni Gad ma Fil e Bible Ngorad: Gur, gathi ba puluw ni ngam man mu guy e piin ni ga ma sul ngorad ara piin ni ga ma fil e Bible ngorad ko ngiyal’ nder yag ni ngam pirieg e girdi’ u tabinaw rorad u nap’an e machib? Bod ni faanra rayog ni ngam pirieg e girdi’ u tabinaw ko Sabado ni kakadbul, ma aram e rayog ni ngam guy e Bible study rom ko misiw’ ara blayal’. Ara reb e nap’an ni yibe yan ko return visit, mab fel’ nra reb e karrow ma kemus ni in e walag e kar uned ngay ya nge yag ni ngar guyed urngin e return visit rorad.

Yugu aram rogon ni gubin ngiyal’ ni nga darod ko machib ma rayog ni ngad theeged e awa rodad, machane ra gel e felfelan’ rodad ni faan gad ra athamgil ni ngad machibnaged be’. Ere, faanra kam pirieg ni bay ban’en u rogon e machib ni ga be tay ni gathi ri be yib angin e ngiyal’ nem, mag guy rogon ni ngam thilyeg. Mu ning e ayuw ngak Jehovah “ni ir e suwon e re woldug” nem u daken e meybil ni nge pow’iyem ni nge yag ni ngam fanay e tayim rom ni fan ko machib nib fel’ rogon!​—Matt. 9:38.