Rayog ni Ngam Un ko Machib ni Blayal’, Fa?

1. Mingiyal’ e ma yan Paul ko machib u mit e tabinaw nrogon ni bay u ba ken e babyor?

¹ Rogon nib bay u ba ken e babyor e ba ga’ ni ma machib apostal Paul u mit e tabinaw ko “4 e kolok ni blayal’ nge mada’ ko lukngun e nep’.” (Daily Life in Bible Times) Dariy bagadad ni manang ko ri aray rogon e n’en ni ma rin’ fa danga’, machane n’en ni gad manang e ba m’agan’ Paul ngay ni nge rin’ gubin e pi n’em ni “fan ko fare thin nib fel’.” (1 Kor. 9:19-23) Re n’ey e ba muun ngay ni nge fal’eg rogon ni nge yan ko machib u mit e tabinaw ko ngiyal’ nrayog ni nge pirieg e girdi’ riy.

2. Mang fan ni blayal’ e aram ba ngiyal’ nib fel’ ni ngan yan riy ko machib?

² Boor e walag ko pi nam i yan ni yad ma yan ko machib u mit e tabinaw ko kakadbul u lan e wik. Machane, ireray e ngiyal’ nib fel’ ni ngan yan riy ko machib ko gin ni ga ma par riy, fa? Reb e pioneer e weliy murung’agen e gin ni ma machib riy ni gaar: “Ba ga’ ndariy e girdi’ u tabinaw ni rran. Machane, yooren e girdi’ e bay u tabinaw ni blayal’.” Sana yira yan ko machib ni blayal’ ma aram e ngiyal’ nrayog ni ngan mada’nag boch e girdi’, nib ga’ ni piin pumoon, min weliy fare thin nib fel’ ngorad. Aram e ngiyal’ ni be toffan e girdi’ ma rayog ni ngan non ngorad. Faanra ba fel’ ni ngan rin’ e re n’ey, mab fel’ ni nge yarmiy e piin piilal e muulung ni fan ko machib ni blayal’.

3. Uw rogon ni ngad gonopiyed rogon e machib ni gad be tay ko blayal’?

³ Ngan Gonopiy Rogon ni Ngan Rin’: Ba ga’ fan ni ngan gonopiy rogon e machib ni yibe tay ni blayal’. Bod ni faanra kam man nga tafen be’ ma be abich ko blayal’, mab fel’ ni nga mog ngak ni bay fin kum sul reb e rran. Ma faanra kam man nga tafen be’ ni ke nep’, mag sak’iy u bang nra guyem riy, ma gog ko gur mini’ nge fan ni kam man nga tafen. Kub fel’ ni ngan yan ni lal’agruw e girdi’ ara yi boor, min machib ko kanawo’ ni bay raen e magal riy, ma gathi yungi n’en nib talumor. Dab mman ni ke n’uw e nep’ ngam magawonnag e girdi’ ni yad be n’en ni ngar molod. (2 Kor. 6:3) Faanra bay bang ni gathi rib fel’ ni ngan yan ngay ni ke nep’, min machib riy ko blayal’ ndawori nep’—Prov. 22:3.

4. Mang boch e tow’ath nra yib ngak e piin ni yad ra un ko machib ni blayal’?

⁴ Tow’ath: Ba gel e felfelan’ ni gad ra tay ko machib nfaanra yag ni ngad machibnaged be’. Ma faanra yoor e girdi’ nda machibnaged, ma aram e rayog ni ngad ayuweged boch e girdi’ ni ‘ngar thapgad ngak Got mi yad nang e tin riyul’.’ (1 Tim. 2:3, 4) Ere, rayog ni ngam pithig puluwom nge yag nim un ko machib ni blayal’, fa?