Ngan Machib u Mit e Tabinaw Iyan
1. Mang deer ni sum ko machib u mit e tabinaw, ma mang fan?
1 “Taab laniyan’ e piin ni ur wereged fare Thin Riyul’ ni ngan wereg fare babyor ni MILLENNIAL DAWN ko machib u mit e tabinaw, ni aram e kanawo’ ni bin th’abi fel’ ni ngan wereg i machibnag fare Thin Riyul’.” Pi thin nem e bay ko Zion’s Watch Tower ko July 1, 1893, ni ke tamilangnag ko uw fene ga’ fan e machib u mit e tabinaw. Ke tamilang u wan’ e girdi’ u fayleng iyan ni aram yalen e Pi Mich Rok Jehovah. Ngiyal’ ney ma ba mo’maw’ ni ngan pirieg e girdi’ u tabinaw rorad ere ka ba ga’ fan e re kanawo’ ney ko machib fa?
2. Ba uw u Bible e be weliy u murung’agen e machib u mit e tabinaw?
2 Ba Thin nu Bible mab Ga’ Fan: Machib u mit e tabinaw e bay u Bible. I l’og Jesus 70 i gachalpen ni nga ranod ni yad lal’agruw ko pi naun rok e girdi’. (Luke 10:5-7) Tomren ni yim’ Jesus, be yog e Bible u murung’agen pi gachalpen Jesus ni gaar: “Ma aram e urngin e rran nra ul’ulgad ngay nguur filed ngak e girdi’ ma yad be machibnag ngak e girdi’ fare Thin nib Fel’.” (Acts 5:42) Ku aram rogon apostal Paul ni ke pasig i machibnag fare thin nib fel’ u mit e tabinaw.—Acts 20:20.
3. Mang angin nra yib riy ko machib u mit e tabinaw?
3 Machib u mit e tabinaw e ka be yan ni aram e kanawo’ nib ga’ fan ni ngan wereg fare thin nib fel’ ko ngiyal’ ney. Ya be ayuwegdad ngad “gayed” e piin nib bay rogorad riy u rogon nib yaram. (Matt. 10:11) Baga’ ni ma par e girdi’ u tabinaw rorad ni yad ba toffan. Faan gad ra non ngorad—ngad rung’aged lamrad, ngad guyed owcherad, ma ngad guyed rogon e par rorad—ma ra ayuwegdad ngad nanged e tin ni yad baadag nge tin ni be m’agafan’rad ngay. Baga’ nra ayuwegdad ngad machibnaged be’ nib n’uw nap’an boch.
4. Mang e ngad rin’ed nge yib angin e machib u mit e tabinaw?
4 Ngan Thiliyeg Boch Ban’en: Mm’agan’ apostal Paul ngay ni nge thiliyeg boch ban’en rok ni “fan ko Thin nib Fel’.” (1 Kor. 9:23) Sana rayog ni ngad thiliyeged e ngiyal’ ni ngad uned ko machib ko ba ngiyal’ ni bay e girdi’ u tabinaw rorad, ni bod ba ngiyal’ ni balayal’, ara Sabado nge Madenom, ara ba holiday. Nga mu fl’eg e babyor ko pi tabinaw nde moy e girdi’, ma ga guy rogon ni ngam sul u yugu reb e rran ara u yugu ba ngiyal’.
5. Uw rogon nrayog ni nge un e piin nib m’ar ko machib u mit e tabinaw?
5 Mus ko girdi’ ni bay mit e m’ar rok e rayog ni nge un ko machib u mit e tabinaw. Sana rayog ni ngad yarmiyed ni ngar uned ngodad ngad feked yad ko boch e tabinaw nib mom ni ngar ranod ngay, ma ngad paged ni ngar maruwelgad u rogon nib mom rorad. Reb e walag ni ppin e bay e m’ar rok ni ba mo’maw ni nge pogofan me ere goo taareb e naun nrayog ni nge yan ngay ko balay e awa. Machane, kari gel e falfalan’ rok ya kan pining ni nge un ngak e pi walag nga ranod ko machib u mit e tabinaw u taabang!
6. Mang fan e susun ni ngad uned ko machib u mit e tabinaw u gubin e wik?
6 Ka yibe pirieg e piin ni yad bod e saf ko machib u mit e tabinaw. Reb e publisher e ke yan nga reb e tabinaw ma kan nog ngak: “Moy. Gu manang ko gur mini. Kug yibilay ngak Got ni nge l’og be’ nge yib i ayuwegeg, ma gu rung’agem u wen. Ke rung’ag Got lamag me l’ogem ngam mub i guyeg.” Angin ni ke yib riy e be micheg ni be flaabnag Jehovah e re kanawo’ ney ko machib. (Matt. 11:19) Mu dugliy u wan’um ni ngam un ko machib u mit e tabinaw u gubin e wik.