Rayog ni Nge Yib Angin e Machib u Telefon
1. Mang nib ga’ fan e machib u telefon?
1 Mang fan nib fel’ ni ngad machibgad u telefon? Ya aram reb e kanawo’ nrayog ni ngad ayuweged e girdi’ nge yog nra nanged e tin riyul’ nra yognag e yafas ni manemus ngorad. (2 Pet. 3:9) Yugu aram rogon nib ga’ ni gad ma machibnag fare thin nib fel’ u mit e tabinaw, machane rayog ni ngkud gayed boch e kanawo’ ni ngad machibgad riy ya nge yog nda ayuweged e girdi’ nib ga’ ndar moyed u tabinaw rorad.—Matt. 24:14; Luke 10:1-7; Rev. 14:6.
2. Uw rogon ni yima yarmiy rogon e machib u telefon?
2 Rogon ni Yima Yarmiy: Rayog ni ngan pi’ ngak e piin publisher e yungi n’en nrayog ni ngar call gad ngay ni ngar machibgad, ni bod rogon e territory ni yima yarmiy ni ngan yan ngay ko machib. Rayog ni nge rin’ taabe’ e re n’ey. Maku rayog ni ngan yarmiy l’agruw ara dalip ni’ ni ngar rin’ed. Susun ni ngan rin’ e re n’ey u bang nib gapas. Boor e walag ni kar pirieged nib mom ngorad ni ngar machibgad ni faanra gubin e babyor nib t’uf rorad e bay u toobrad.
3. Mang boch ban’en ndab da paged talin u nap’an ni gad be machib u telefon?
3 Rogon ni Ngan Machib u Telefon: Faanra ngad machibgad u telefon, ma ngad guyed rogon ni nge yan i aw ni gonap’an e gad be sabethin faen ni kad callnaged. Piin ni ka fin ra uned ko machib u telefon e rayog ni ngar yoloyed nga but’ e n’en ni nga rogned mar guyed rogon ni ngar nonad ngak faen ni kar callnaged ni gowa yad be sabethin. Rayog ni ngad fanayed boch e thin u lan fare babyor ni Reasoning, ara Machib Ko Gil’ilungun, nge fare tract ni kenggin e Ga Baadag ni Ngam Nang e Tin Nriyul’? Nap’an ni ga be fal’eg rogon e n’en ni nga mog, ma ga dugliy ko mang kenggin e machib ni ngam weliy, nge deer ni ngam fith, nge thin nu Bible nib m’ag ko fapi deer ni ga ra fith. Rayog ni ngam pi’ e babyor ni kag ma wereg u nap’an e machib u mit e tabinaw. Dab mu pagtalin ni ngam rin’ e pi n’en ni baaray: Dab mu rus ma gguy rogon ni ngam non nib sagaal. Mu non u fithik’ e sumunguy nge ta’ fan, mag gum’an’nagem, ya pi n’ey e rayog ni nge nang faen ni gimew be non u telefon. Mmotoyil’ u nap’an ni be weliy faen ni gimew be non ban’en, mag pining e magar ngak ko n’en ni ke weliy. Dab mu weliy murung’agen e ayuw ni salpiy ni yima pi’ ko babyor, ya ra lemnag ni gad be callnag ni nge chuw’iy e babyor rodad.
4. Mang angin e machib u telefon?
4 Sana en ni gimew ra non u telefon e be’ nib m’ar ara be’ nib mo’maw’ ni ngan mada’nag u tabinaw rok ni bochan e ma maruwel. Ma boch e girdi’ e yad ma par u boch e binaw ni bay e yoror riy ara apartment ni dabiyog ni nga i yan e yug girdi’ ngay. Ere ngad gayed rogon ni ngad machibgad u telefon ya nge yog nda rin’ed e maruwel rodad nib fel’ rogon mab mus rogodad riy.