Rogon ni Nge Yib Angin e Machib u Kanawo’
1. Mang reb e kanawo’ nrayog ni ngad folwokgad rok Jesus riy?
1 Nap’an ni i machib Jesus u fayleng, ma da i tuntun ni nge machibnag e girdi’ ni i mada’nag u kanawo’ ngu tagil’ e yoor. (Luke 9:57-61; John 4:7) Baadag ni nge weliy fare thin nib fel’ ngak urngin e girdi’ nrayog. Machib u kanawo’ e aram reb e kanawo’ nib fel’ ni ngan ayuweg e girdi’ riy e ngiyal’ ney nge yog e gonop rok Got ngorad. (Prov. 1:20) Ra yib angin e maruwel ni gad ma tay ni faanra gadad e som’on ni ngad nonad ko girdi’, maku gad gonopiy rogon ni ngad rin’ed.
2. Uw rogon ni nge mang gadad e som’on ni ngad nonad ngak be’ u nap’an ni gad be machib u kanawo’?
2 Gadad e Som’on ni Ngad Nonad Ngak Be’: Ba ga’ nib fel’ ni nga darod da nonad ko girdi’ ko bin ni kemus ni ngaud sak’iygad ara da pared nga but’ ngad sonnaged be’ ni nge yib i non ngodad. Ngam sap ngak be’ mag siminmin ma ga dag ngak ni ga baadag ni ngam non ngak. Faanra gimed be maruwel boor e walag u taabang mab fel’ ni nge bigimed me non ngak be’. Kub t’uf ni ngam athamgil ngam gay e kanawo’ ni ngkum non ngak e piin ni kam machibnagrad bayay. Faanra rayog mu nap’an ni kam mu’gow ko numon ma ga fith ngak rogon nrayog ni ngkum mada’gow bayay. Boch e walag e yad ma machib u taab yang i ban’en ni gubin ngiyal’, aram fan nrayog ni ngar nonad ngak taabe’ ni boor yay mar ayuweged ni nge adag e machib.
3. Uw rogon ni ngad gonopiyed rogon ni ngad nonad ko girdi’ ni gad be machibnag u kanawo’?
3 Ngam Gonopiy: Ngam gonopiy e gin ni ngam sak’iy riy nge piin ni ngam non ngorad. De t’uf ni ngam non ngak urngin e girdi’ ni yad be yib ranod u toobem. Mu fal’eg i yaliy e girdi’. Faanra ga be guy be’ ni be gurgur mab fel’ ni dab mu taleg. Nap’an ni ga be machib u mit e kantin ara bang ni yima siyobay riy, mag guy rogon ni nge dab mu magawonnag e maruwel ni yibe tay ya nge dabi puwan’ e en ga’ ko maruwel. Ba ga’ nib fel’ ni ngam machibnag e girdi’ ni kar sulod ko fa gin ni tagil’ e siyobay, ma gathi piin ni yad be yan e ngaram. Mu guy rogon ni nge dabi gin e girdi’ ara ra rusgad u nap’an ni ga ra non ngorad. Kub fel’ ni ngam gonopiy rogon e babyor ni ga be pi’, ya faanra ga be guy ni gathi ri baadag e girdi’ e machib ma rayog ni ngam pi’ e tract ngorad.
4. Mang fan ni machib u kanawo’ e aram reb i kanawoen e machib nra yib angin ma yima felfelan’ riy?
4 Machib u kanawo’ e ra momnag ngodad ni ngad wereged boor awochngin e tin riyul’ u ba ngiyal’ nde n’uw nap’an. (Ekl. 11:6) Rayog ni ngad mada’naged boch e girdi’ nib mo’maw’ ni ngad pirieged yad u tabinaw rorad u nap’an ni gad be machib u mit e tabinaw. Ere, mang ni dab mu guy rogon ngam un ko machib u kanawo’ ni aram reb i kanawoen e machib nra yib angin ma yima felfelan’ riy?