Reb e Kanawo’ nib Manigil Ma Kab Beech Nrayog ni Ngan Machibnag e Girdi’ ni Yoor Riy
1. Mang e yima pi’ e athamgil nga laniyan’ e pi walag ko pi ulung ni yad ma machib ko yungi n’en ni boor e girdi’ ni ma yan riy ni ngar rin’ed?
1 Yima pi’ e athamgil nga laniyan’ e pi walag ko pi ulung ni yad ma machib ko yungi n’en ni boor e girdi’ ni ma yan riy ni ngar machibnaged e girdi’ ni yoor ni yad be fanay e tebel ara cart. Faanra yibe fanay e cart, ma rayog ni nge sak’iy ara par reb e walag u tooben. Machane, faanra tebel e yibe fanay, ma thingari par l’agruw e walag riy. Piin ni yad be par ko pi tebel nge cart ney e thingar ra golgad ko girdi’, mar daged e ngongol nra guy e girdi’ mar adaged ni ngar feked e babyor rodad. Faanra keb i tal be’ be yaliy reb fapi babyor, ma rayog ni nge non bagayow fagali walag ni bay ko fare tebel ara fare cart ni nge gaar, “Ka am lemnag ko mang e be yog e Bible u murung’agen e re thin nir?” Ma bagayow e rayog ni nge par u bang nib chugur ngak fare walag, me guy rogon ni nge machibnag boch e girdi’ u fithik’ e sabethin.
2. Mu weliy ban’en ni ke buch ni be dag feni ga’ fan e machib ni gad ma tay ko yungi n’en ni boor e girdi’ riy.
2 Boor e walag ni ke yag ni ngar tababgad i fil e Bible ngak boch e girdi’ ni bochan e biney e kanawoen e machib ni yibe tay. Immoy reb e ppin ni ma un nga reb e skul nib tolang ni mel’eg ni nge yoloy boch ban’en u murung’agen e Pi Mich Rok Jehovah nga bangi babyor ni be fal’eg ni fan ko skul rok, machane de yag ni nge pirieg e gin ni bay e Kingdom Hall riy. Faani bin migid e wik riy, me guy reb e pi tebel ney ni keb i tay boch e walag ko gin ni ma skul riy ni bay boch e babyor rodad riy. Tomuren e re n’ey, ma aram me un e re ppin ney ko fol Bible, ma chiney e ke un ko taufe, ma ma un ko pi walag ko machib ko yungi n’en ni boor e girdi’ riy.
3. Mang e ke yog boch e walag u murung’agen e biney e kanawo’ ni yibe machib riy?
3 Bay reb e walag nib pin ni baadag ni ma un ko mit ney e machib ni yima tay ni yog ni gaar: “Boch e girdi’ e yad ma tal ni ngar feked e pi magazine ni kab beech. Ma bay boch e girdi’ ndawor ra rung’aged murung’agen e Pi Mich Rok Jehovah ni kan weliy. Kug guy ni boor e girdi’ nrayog ni ngan machibnag ko biney e kanawo’.” Ki yog reb e walag nib pin ni gaar, “Ireray reb e kanawo’ nib manigil ma kab beech nrayog ni ngan machibnag e girdi’ ni yoor riy ni bochan e kemus ni ngam par ngam sonnag e girdi’ ni ngar bad ngom. Mus ni faanra dubrad ni ngar feked e babyor, machane yad baadag ni ngar nanged ko mang e gamad be rin’.”
4. Mang fan nib fel’ ni ngaun tay e pi tebel nge cart ney u taab yang i ban’en ni gubin ngiyal’, mu kun dugliy e tayim ni ngaun tay riy?
4 Ba fel’ ni ngaun tay e pi tebel nge cart ney u taab yang i ban’en ni gubin ngiyal’. Ma kub fel’ ni nge mudugil e tayim ni ngaun tay riy u gubin e wik. Faan yira rin’ ni aray rogon, ma rayog ni nge mecham u owchen e girdi’, ma rayog ni nge puf rogorad ni ngar bad ra fithed boch e deer ara ra feked boch e babyor. Ere, ke yarmiy e ulung rom ni ngaun machib ko yungi n’en ni boor e girdi’ ni ma yan riy fa dawor? Faanra kan yarmiy, ma rayog ni ngam guy rogon ni ngam un ko biney e kanawo’ ni yibe machib riy ni fan e nge yag nni “machibnag ngak e girdi’ murung’agen e gagiyeg rok Got.”—Luke 9:60.