Rogon ni Ngan Machib ni Yibe Fanay e Tebel ara Cart ni Bay e Babyor Riy

Machib ni yibe fanay e cart ara tebel ni bay e babyor riy e be yib angin ngak e piin ni yad baadag ni ngar nanged e tin riyul’. (John 6:44) Ma bochan e re n’ey, ma aram fan ni kan pi’ e athamgil nga laniyan’ e piin piilal ni ngar yarmiyed ni nge machib e pi walag ko yungi n’en ni boor e girdi’ ni be yan riy. Maku bochan ni fare tebel ara cart e aram ban’en nrayog ni ngan thilyeg tagil’, ere ba ga’ ni faanra bay bang ni kan dugliy ni ngan tay ngay ma de t’uf ni nga nog ngak e en ni ir e ga’ ko gin’em. Ere, chon mini’ e rayog ni ngar uned i rin’ e mit ney e machib? Rayog ni nge un e pi walag ni yad ba gonop, ma yad ma tay fan e girdi’, ma yad ba salap ko welthin. Chiney e gad ra weliy boch e kanawo’ nib puluw ni yira rin’ e re n’ey riy nge boch nde puluw.

Pi N’en nib Puluw ni Ngan Rin’:

Mu gol ko girdi’, mag pining e magar ngorad u nap’an ni yad ra fek reb e babyor rodad, mag gay rogon ni ngam pi’ e fulweg ngak be’ u nap’an ni ke fith reb e deer u murung’agen reb e babyor ni ke mel’eg ni nge fek. Boch e walag e yad ma pi’ e changar nib fel’ ma yad ma non u fithik’ e gol. Faanra bay be’ ni be chugur i yib ma be sap ko fare tebel ara cart ma rayog ni ngam non ngak ni nge lungum, “Rayog ni ngam fek reb ko pi babyor ney ni faanra ga baadag.”
De fel’ ni ngam sak’iy nrib chugur ko fare tebel ara cart. Ke yib angin e miti ney e machib u boch e binaw ni faanra dabi sak’iy reb e walag nrib chugur ko fare tebel ara cart. Maku bay boch e walag ni kar guyed ni bay e girdi’ ni yad ma magawon ngorad, ere aram fan ni yad ma sak’iy ni kub palog boch nga orel ko fare tebel ara cart nge mada’ ko ngiyal’ ni ke chugur be’ i yib. Ma nap’an ni ke guy bagayow be’ ni ke fek reb fapi babyor, ma fin aram e ra gay rogon ni nge fith reb e deer ngak facha’ ni nge gaar, “Bay ba ngiyal’ ni kaam lemnag e re deer nir, fa?”
Faanra rayog mag weliy reb e thin nu Bible.
Rayog ni ngam ognag e fol Bible ngak be’ ni ke fek reb ko fapi babyor rodad ni gad ma fanay ko fol Bible ni bod rogon fare babyor ni kenggin e Mang e Ri Be Fil e Bible? Mog ngak ni faanra baadag ma rayog ni ngam playnag fare video ni kenggin e Mang Fan ni Ngam Fil e Bible? ko ipad ara cell phone rom ni nge guy.
Faanra rayog mag fith fithingan nge namba rok nge gin ni ma par riy. Ma faanra der ma par ko binaw rom, ma rayog ni ngam fal’eg fare babyor ni ka nog e Please Follow Up (S-43) form ngay ngam pi’ ngak fare secretary ko ulung rom nib papey.

Pi N’en nde Puluw ni Ngan Rin’:

Dab mu damumuw, ma dab mu towasariy be’ ni nge fek e pi babyor rodad, maku dab mu sak’iy u tooben fare tebel ara cart ni gowa gur reb i girdien e matanag.
Dab mu lemnag ni kemus ni ngam wereg e babyor ngak e girdi’. Ya n’en ni gad be nameg e ngad pirieged be’ nrayog ni ngad filed e Bible ngak. Ere, susun ni ngad gayed rogon ni ngad nonad ngak e girdi’.
Dab mu sak’iy u bang nra mo’maw’nag ko girdi’ ni ngar guyed e pi babyor rodad nib fel’ rogon, maku dab mu parew reb e walag ni gimew be sabethin, ma dab mu tiyan’mew ko girdi’ ni yad be yib. Ma faanra ba t’uf ni ngam fanay e cell phone rom, mab fel’ ni ngam palog u tooben fare tebel ara cart.
Faanra ke togopuluw be’, ma dab mu un ko maluagthin. Faanra ke yib be’ ni nge togopuluw ngomew, ma yu ngiyal’ e bfel’ ni ngam marow ngam parew nga bang nib thil.