Ngad Mon’oggad ko Machib—Mu Guy Rogon ni Ngam Non ku Be’ Ya Nge Yag Nim Machibnag u Fithik’ e Sabethin

Fan nib Ga’ Fan: Nap’an ni gad ra un ko machib u mit e tabinaw, mab ga’ ni boor e tabinaw ni gad ma yan ngay ndariy be’ riy. Machane, bayi n’en ma gad mada’nag e pi girdi’ ney u bus, ara taxi, ara u aspital, ara nap’an ni yibe toffan u tabon e maruwel, ara u skul. Ba m’agan’ Jehovah ngay ni ngan weliy fare thin nib fel’ ni murung’agen Gil’ilungun ngak urngin girdi’. (1 Tim. 2:3, 4) Machane, ba ga’ ni faanra gad baadag ni ngad machibnaged e girdi’, ma gadad e som’on nthingar da nonad.

Rogon ni Ngan Rin’:

Mmel’eg e piin ni ngam non ngorad. Ga be guy ni facha’ e ir be’ nib gol ma baadag ni ngam nonow? Rayog ni ngam nonow nib fel’ rogon ko gin ni gimew bay riy? Bay boch e walag ni yad ma guy rogon ni nge puluw e changar rorad facha’, ngemu’ mi yad siminmin. Ma faanra ki siminmin facha’, ma aram mi yad guy rogon ni ngar nonad ngak.
Faanra ga be rus ni ngam non ngak facha’, mag meybil ngak Got u lanin’um.—Neh. 2:4; Acts 4:29.
Som’on e rayog ni nga mog buchuuw e thin ngak. Som’on ni non Jesus ngak fare pin nu Samaria, ma de weliy murung’agen Gil’ilungun Got ngak. (John 4:7) Ere, bay yu ngiyal’ nrayog ni ngad guyed ban’en nib fel’ ni be rin’ be’, ma gad yog ngak. Bod nrayog ni nge lungudad ngak: “Rib llowan’ e bitir rom!” Maku reb e, rayog ni ngad fithed reb e deer ngak ni nge lungudad: “Kam yaliy e news fowngan?”
Faanra ke yag ni ngam sabethingow, mag guy rogon ni ngam weliy fare thin nib fel’ ngak. Machane, dab mu gur ngam rin’ e re n’ey. Mu guy rogon ni nge fel’ rogon e sabethin romew. Sana rayog ni nga mog ban’en nra k’aring facha’ ni nge lemnag boch ban’en ara fith reb e deer ngom. Bod ni faanra gimew be weliy murung’agen e tabinaw, ma rayog ni nge lungum, “Ku ug beeg boch ban’en nrayog ni nge pagan’uy ngay nra ayuweg e gallabthir u rogon ni ngar chuguliyed e bitir rorad.” Ma faanra gimew be weliy murung’agen ban’en ko news, ma rayog ni nge lungum, “Bay boch ban’en ni ku ug beeg nib manigil nib thil ko n’en ni ka un weliy murung’agen ko news.” Dabi mulan’um ni faanra mmu’gow ko non, ma dawori yag ni ngam machibnag.
Mu fek boch e tract ara boch e babyor nrayog ni ngam pi’ ngak be’ ni kam mada’nag ni baadag e machib.

Mu Gay Rogon ni Ngam Rin’ e Re N’ey u Lan e Re Pul Ney:

Gubin e wik ni ngam guy rogon ni ngam sabethingow be’, ya nge yag nim machibnag u fithik’ e sabethin.