Rayog ni Ngam Machib u Fithik’ e Sabethin!

1. (a) Mang e machib u fithik’ e sabethin? (b) In e girdi’ ni kar uned ko re muulung ney e som’on ni kar rung’aged e machib e nap’an ni yad be sabethin be’?

¹ In e girdi’ u lan e ulung rom e som’on ni kar rung’aged e machib e nap’an ni yad be sabethin be’? Sana ga ra gin nga urngin. Ngan machib u fithik’ e sabethin e aram e ngan weliy e thin nib fel’ ko girdi’ ni gad ma mada’ u reb e rran ngu reb, ni bod u nap’an ni gad be milekag, ngu nap’an ni ka darod ni ngad guyed e girdi’ rodad, ngu nap’an ni ka darod ko chuw’ay, ngu nap’an ni gad be un ko skul ara maruwel nge yugu boch ban’en. Bay reb e ulung nib pag 200 e Pi Mich riy ni 40 percent i yad e som’on ni kar rung’aged e machib e u fithik’ e sabethin! Ere ku ma yib angin e mit ney e machib.

2. Mang e be weliy e Bible u murung’agen e machib u fithik’ e sabethin?

² Pi tamachib u nap’an e bin som’on e chibog e yad ma machib u fithik’ e sabethin. Bod nu nap’an ni be milekag Jesus u lan yu Samaria me machibnag be’ ni ppin ni be l’ing e ran ko luwed rok Jakob. (John 4:6-26) I tababnag Filip e sabethin ngak reb e tayugang’ nu Ethiopia ni be beeg e babyor rok Isaiah me fith ni gaar: “Mog ga be nang fan e pi n’ir ni ga be beeg?” (Acts 8:26-38) Nap’an ni immoy apostal Paul u kalbus u Filippi me machibnag fa en pilungen e kalbus. (Acts 16:23-34) Ma nap’an ni kan kalbusnag Paul u tabinaw rok ma “urngin e girdi’ nra yib ni nge guy ma be felfelan’ ngorad ni karbad. Mi i machibnag murung’agen e gagiyeg rok Got ma be machibnag murung’agen faanem i Somol Jesus Kristus.” (Acts 28:30, 31) Ku rayog ni ngam machib u fithik’ e sabethin ni yugu aram rogon ni gur be’ ni gab tatamra’. Uw rogon?

3. Mang e ra ayuwegdad ngad gelgad ko tamra’?

³ Rogon ni Ngan Tabab: Boor i gadad e ba mo’maw’ rok ni ngar sabethingow be’ nde nang. Mus ko piin ni gad manang ma ba mo’maw’ ni ngad weliyed e thin nriyul’ ngorad. N’en nra k’aringdad ni ngad machibgad e ngad lemnaged fel’ngin Jehovah nge tirok ban’en ni ke pi’ ko pi tapigpig rok, nge rarogon e girdi’ ni be gafgow. (Jonah 4:11; Ps. 40:5; Matt. 13:52) Maku reb e rayog ni ngad ninged e ayuw rok Jehovah ni nge pi’ gelngidad ‘ndabda rusgad.’ (1 Thess. 2:2) Be’ ni ke un ko skul u Gilead e gaar: “Gu ma pirieg ni meybil e ma ayuwegeg ko ngiyal’ nib mo’maw’ ni nggu non ngak be’.” Faanra gab tamra’ ni ngam non ku be’ ma ngam meybil u lanin’um nib ngoch nap’an.​—Neh. 2:4.

4. Mang e ngad nameged ni ngad rin’ed ko som’on, ma mang fan?

⁴ Rogon e machib u fithik’ e sabethin e de t’uf ni ngam dugliy u m’on riy e n’en ni ngam weliy ngak be’ ara reb e thin nu Bible. Sana ba fel’ ni ngad nameged ni ngad tababnaged e sabethin ma gathi ngad machibgad ko som’on. Boor e publisher ni ka rogned ni faan yad ra rin’ ni aray rogon ma ra mom ngorad ni ngar weliyed fare thin nib fel’ ngak be’. Faanra dabun be’ ni nge un ko sabethin ma dabni towasariy. Ngam fingichgow ma ga yan.

5. Mang e ke ayuweg reb e walag ni ppin nib ta tamra’ ni nge machib u fithik’ e sabethin?

⁵ Nap’an ni be yan reb e walag ni ppin nib ta tamra’ ko chuway’ ma som’on e ma guy rogon ni nge sap nga owchen be’ me siminmin. Faan ku ra siminmin facha’ ma rayog ni nge yog ban’en ngak. Faanra ke fel’ u wan’ facha’ ma rayog ni nge pagan’ ni ngar sabethingow. Ra motoyil nib fel’ rogon ma rayog ni nge nang ko mang e ba fel’ ni nge weliy ngak. Ke rin’ ni aram rogon ma ke wereg boor e babyor me tababnag e fol Bible ngak e girdi’.

6. Uw rogon nrayog ni ngad tababnaged e sabethin?

⁶ Ngan Tababnag e Sabethin: Mang e rayog ni nga dogned ko som’on? Nap’an ni ke non Jesus ngak fare pin ni bay ko fare luwed me ning boch e ran ngak ni nge unum. (John 4:7) Ere rayog ni nga mog ban’en ngak be’ ara fith ban’en ngak. Nap’an ni ga be non ma ga ra guy nrayog ni ngam uneg reb e thin nu Bible u fithik’ e sabethin rom. (Ekl. 11:6) Boch e girdi’ e kar weliyed ban’en ni ma pug e tafinay ko girdi’ ma aram mi yad fith boch ban’en. Susun, nap’an ni ga be sonnag e togta, ma rayog ni ngam tababnag e sabethin ni ngam gaar, “Gu ra falfalan’ ko ngiyal’ ndabkug m’ar.”

7. Uw rogon ma faan gad ra yaliy boch ban’en ma ra ayuwegdad ni ngad machibnaged e girdi’ u fithik’ e sabethin?

⁷ Faanra gad ra par ni gad be fal’eg i yaliy urngin ban’en ma ra ayuwegdad ni ngad tababnaged e sabethin. Faan gad ra guy e gallabthir nib llowan’ e bitir rorow ma rayog ni nga dogned nib fel’ rogon ni kar chuguliyew fakrow ma ngad fithed ko ‘Uw rogon ni kar ayuwegew e bitir rorow ma ke yib angin?’ Reb e walag ni ppin e ma motoyil ko pi n’en ni be yog e piin ni yad nga maruwel ma aram me weliy e n’en nra pug e tafinay rorad. Nap’an ni ke nang ni reb e ppin u tabon e maruwel e ra un ko mabgol ma ke pi’ e Awake! ngak ni be weliy ko uw rogon ni ngan fl’eg rogon e madnom ko mabgol. Aram e ke yog ni ngki weliy e thin nu Bible.

8. Uw rogon nrayog ni ngad fanayed e pi babyor rodad ni ngad tababnaged e sabethin?

⁸ Ku reb e kanawo’ ni ngad tababnaged e sabethin e ngad beeged boch e babyor rodad u nap’an ni yibe guydad. Reb e walag e ma pithig e Wulyang Ntagil’ E Damit ara Awake! ko reb e article ni kenggin e ma pug lanin’uy ma ma beeg u laniyan’. Faanra guy ni bay be’ ni be sap ko fare babyor rok me fith ban’en ngak ara weliy boch ban’en u murung’agen fare babyor. Ma aram e rayog ni ngar sabethingow me machibnag faanem. Faan gad ra tay e babyor rodad ko gin nrayog ni nge guy e girdi’ riy me pug e tafinay rorad ma ra k’aringrad ni ngar fithed boch ban’en u murung’agen.

9, 10. (a) Uw rogon nrayog ni ngad fal’eged rogodad ni ngad machibnaged e girdi’ u fithik’ e sabethin? (b) Uw rogon ni kam rin’ e re n’ey?

⁹ Ngan Gay Rogon ni Ngan Rin’: Bochan nrib ga’ fan e maruwel ko machib, ma susun dabda lemnaged ni machib u fithik’ e sabethin e aram ban’en nde t’uf ni ngad rin’ed. Ya susun ni ngad gayed rogon ni ngad machibnaged e girdi’ ni gubin ngiyal’. Ngam lemnag u m’on riy e girdi’ ni ga ra mada’nagrad nge rogon ni ngam non ngorad. Nguum man ma bay e Bible rom nge boch e babyor nrayog ni ngam pi’ ko girdi’ ni baadag e machib.​—1 Pet. 3:15.

¹⁰ Boor e publisher ni kar pirieged rogon ni ngar machibnaged e girdi’ u fithik’ e sabethin. Reb e walag ni ppin ni ma par u reb e apartment ni bay e matanag riy e ma yan i par nga bang ko re naun nem nga i fal’eg e puzzle ni yaan boch ban’en ni bay u toobdad. Nap’an nra guy e girdi’ fare puzzle mi yad yog nib fel’ yaan ma aram me tabab fare pin ni nge weliy e thin nu Bible ni be micheg e “bin beech e tharmiy nge fayleng.” (Rev. 21:1-4) Rayog ni ngam lemnag boch e kanawo’ ni ngam machibnag e girdi’ riy u fithik’ e sabethin, fa?

11. Uw rogon nrayog ni ngad non ngak be’ biyay u nap’an e machib u fithik’ e sabethin?

¹¹ Ngan Non Ngak Be’ Biyay: Faanra ke motoyil be’ ngom ma ngam guy rogon ni ngkum nonow biyay. Faanra ba puluw ma ngam gaar: “Kug felfalan’ ni kad nonow. Ra diin miki yog ni ngad nonow biyay?” Boch e publisher e ma pi’ e address nge namba ko telefon rok me gaar: “Kug felfalan’ ni kad sabethingow. Faanra ga baadag ni ngkum nang boch murung’agen e n’en ni kad weliyew ma baaray rogon ni ngam non ngog.” Faanra dabiyog ni ngam non ngak facha’ biyay ma ga fal’eg fare babyor ni Please Follow Up (S-43) ngam pi’ ko secretary ko ulung min yarmiy ni ngan sul ngak facha’.

12. (a) Mang fan ni susun ni ngad reportnaged e tayim ni kad ted ko machib u fithik’ e sabethin? (b) Mang boch angin e machib u fithik’ e sabethin ni kan tay? (Mu guy fare kahol ni “Ma Yib Angin e Machib u Fithik’ e Sabethin!”)

¹² Susun ni ngad ted ko report rodad e tayim ni kad machibnaged e girdi’ u fithik’ e sabethin. Ere ngam yoloy nga but’ ni mus ni buchuuw e minit u reb e rran. Mu lemnag: Faanra un reb nge reb e publisher ko machib u fithik’ e sabethin lal e minit gubin e rran, ma aram e ra pag 17 milyon e awa ni yira machib riy u gubin e pul!

13. Mang e susun ni nge k’aringdad ni ngad machibnaged e girdi’ u fithik’ e sabethin?

¹³ Ba ga’ fan ni ngad uned ko machib u fithik’ e sabethin ya ba t’uf Got nge girdi’ rodad. (Matt. 22:37-39) Faanra gad ma tayfan pi fel’ngin Jehovah nge tin nib m’agan’ ngay ma ra k’aringdad ni ngad weliyed murung’agen “feni sorok e gagiyeg ni be tay.” (Ps. 145:7, 10-12) Faanra ba t’uf e girdi’ rodad ma ra k’aringdad ni ngad weliyed fare thin nib fel’ ngorad e ngiyal’ ney ni ka bay e tayim. (Rom. 10:13, 14) Gad ra fal’eg rogodad ma rayog ni ngad machibnaged e girdi’ u fithik’ e sabethin ma rayog ni ngad felfalan’gad ya kad ayuweged be’ nib yul’yul’ nge nang e tin riyul’.

[Caption on page 4]

Ngam nameg ni ngam mada’nag e girdi’ ma ngam tababnag e sabethin

[Caption on page 5]

Boch e publisher e kar gayed e kanawo’ ni ngar machibnaged e girdi’ riy u fithik’ e sabethin

[Caption on page 5]

Boch e Kanawo’ ni Ngan Tababnag e Sabethin

◼ Ngan meybil ni ngan tabab

◼ Ngan mel’eg e piin ni yad ba gol ni gathi yad be gur

◼ Ngan sap nga owchen e girdi’ min siminmin, mi nog murung’agen ban’en nra pug e tafinay rok

◼ Ngan motoyil nib fel’ rogon

[Caption on page 6]

Ma Yib Angin e Machib u Fithik’ e Sabethin!

• Nap’an ni be sonnag reb e walag e karrow rok ni yibe fal’eg me machibnag e girdi’ u rom me pi’ e babyor ngorad ni be piningrad ni ngar uned ko welthin ni fan ko yoor. Reb e duw nga tomren u nap’an ni ke un fare walag ko convention me yib reb e walag ngak nde nang owchen nge pining e magar ngak u fithik’ e felfelan’. Fare walag e aram bagayad fapi girdi’ ni pi’ e babyor ngak u tafen e mongongol karrow! Fare moon e yan i un ko motoyil ko fare welthin ni fan ko yoor ma ke pi’ fithingan ni ngan fil e Bible ngak. Yow leengin e kar unew ko taufe.

• Bay reb e walag ni ppin ni ke nang e tin nriyul’ ya kan machibnag u fithik’ e sabethin, ere ke turguy ni ku aram e n’en ni nge rin’ u nap’an ni yow ra weliy be’ murung’agen dalip i bitir ni fak. Territory rok e ba muun ngay e piin buguli yoror rok, nge pi gallabthir ni ma mada’nag u skul ngu nap’an e pi muulung ko gallabthir u skul. Nap’an ni ma non ngak be’ ma ma weliy nrib ga’ fan e thin ko Bible ya be ayuweg ni nge chuguliy e bitir rok nrogon, ma aram e ra weliy yugu reb e ban’en. Ma aram e ngiyal’ ni ke mab e kanawo’ ni nge weliy murung’agen e Bible. Ke rin’ ni aram rogon ma ke ayuweg 12 e girdi’ ni ngar uned ko taufe.

• Bay reb e walag ni ppin ni ke yib reb i girdien e insurance nga tafen, ma ke machibnag. Ke fith ngak ko baadag ni nge ba ngiyal’ ma dab ki yib e m’ar ngak, me par ni manemus u fithik’ e felfelan’. Ke yog ni baadag, ma aram me fith ngak ko gin ngan e motochiyel ko insurance e ram ni be weliy murung’agen. Ma aram me dag e thin nu Bible ngak ni be micheg e pi n’em ma ke pi’ e babyor ngak ma ke beeg fare moon u lan taareb e nep’. Kan yarmiy ni ngan fil e Bible ngak. Ma ke un ko muulung me munmun me un ko taufe.

• Reb e walag ni ke un u sikoki e non ngak reb e ppin ni bay u tooben. Nap’an ni tal fare sikoki me pi’ fare walag e address nge namba ko telefon rok ngak fare pin me pi’ e athamgil nga laniyan’ ni nge un ko fol Bible ko ngiyal’ nra yib e Pi Mich Rok Jehovah nga tafen. Bin migid e rran ma l’agruw e Mich ni ka ranow nga tafen fare pin. Ma aram me un ko fol Bible ma ke mon’og ko machib me un ko taufe. De n’uw nap’an nga tomren me fil e Bible ngak dalip e girdi’.

• Bay reb e walag ni pumoon nib malmit ni raay e duw rok ni ma par u nursing home ma gubin ngiyal’ e ma gaar, “Ba t’uf Gil’ilungun Got rodad.” Aram e n’en ni ke pug e tafinay ko pi nurse ni yad ma maruwel u rom nge pi m’ar ni yad ma par u rom, ma ke weliy ngorad ko mang fare Gil’ilungun. Reb e ppin ni ma maruwel u rom e ke fith ngak fare moon ko mang e ra rin’ u Paradis, ma ke fulweg ni gaar, “Gu ra guy ban’en biyay mug un ko yan, ngemu’ mu gu urfeg e wheelchair rog.” Bochan nib malmit ma ma yog ko fare pin ni nge beeg e pi magazine nge rung’ag. Nap’an ni yib be’ nib pin ni fak fare walag ni nge guy me fith fare nurse ko rayog ni nge fek fapi magazine nga tabinaw rok nge beeg boch. Ma reb e nurse e gaar ngak fare pin ni fak fare moon, “N’en nib ga’ ni gamad ma yog u roy e chiney e: ‘Ba t’uf Gil’ilungun Got rodad.’”

• Reb e walag ni ppin e bay ko line ni be son ni nge yan nga lan tafen e damunmun ma ke rung’ag ni be weliy boch e girdi’ ni kar pumoongad murung’agen e politics. Bagayad e ke yog ni dabiyog ko am ni nge pithig e pi magawon rodad. Ma aram me gaar fare pin u laniyan’, ‘Aray e ngiyal’ ni susun ni nggog ban’en.’ Ke meybil me yan ngorad. Me yog fithingan, ma ke weliy ngorad murung’agen ba am nra pithig e magawon ko girdi’ ni aram Gil’ilungun Got ma ke pi’ ngorad e babyor ni bay rok. Ka yad be non me yib e manager ko fare tafen e damunmun. Ma aram me lemnag fare walag ni bayi yog ngak ni nge chuw u rom. Machane me yog ngak ni ke motoyil ko n’en ni be yog ma ba adag reb e babyor. Ma be’ ni ma maruwel u rom e ki yib ngak ni be yor, ya ka i fil e Bible kafram ma baadag ni ngki fil e Bible bayay.