Kam Fal’eg Rogom ni Ngam Machib u Fithik’ e Sabethin?
1. Mang e be dag nrayog ni nge yib angin e machib u fithik’ e sabethin?
1 Rayog ni nge yib angin e machib u fithik’ e sabethin. Boor e thin nu Bible ni be weliy murung’agen boch e girdi’ ni ur machibgad u fithik’ e sabethin, mab ga’ angin ni yib. (John 4:7-15) Mang e rayog ni ngad rin’ed ni ngad fal’eged rogodad ko mit ney e machib?
2. Uw rogon nrayog ni ngad machibnaged be’ ni bochan rogon e munmad ni gad ma tay nge rogon yaadad?
2 Rogon ni Ngam Munmad nge Rogon Yaam: Faanra gubin ngiyal’ nib yalen e munmad rodad nge rogon yaadad, ma aram e rayog ni ngad weliyed e michan’ rodad ngak e girdi’ nib fel’ rogon. (1 Tim. 2:9, 10) Ma faanra gad be tamra’ nga rogon yaadad ma dabisiy ni gad ra magawon ni ngad machibnaged be’. Machane faanra i guy e girdi’ ni gad ba beech, ma rayog ni nge pug e tafinay rorad ngar adaged ni ngar motoyilgad ko n’en ni gad ma machibnag. Immoy ba wu’ e mabgol ni yow l’agruw e Mich nra chuwgow ko mad nib yalen u nap’an ni yow be milekag. Nap’an nranow nra parew nga tooben reb e pumoon nib Muslim me guy fare moon nib thil rogon e munmad ni ke tay fagal wu’ i mabgol. Ma aram me fith ko yow e Kristiano, ma aram me tabab fagal wu’ i mabgol i machibnag fare moon, mi yad non u lan dalip e awa.
3. Mang e ra ayuwegdad ni ngad tababnaged e sabethin ngak be’?
3 Rogon ni Ngan Tababnag e Sabethin: Nap’an ni mada’nag Jesus fare pin nu Samaria u charen e luwed ku Jakob me ning e ran ni nge unum. Ku taareb rogon nrayog ni ngad tababnaged e sabethin ni faanra da weliy murung’agen ban’en fa da fithed reb e deer ngak be’ ni kad mada’naged. Sana yu ngiyal’ e gad be magagawon ni ngad nonad ngak be’, machane faanra pagan’dad ngak Jehovah ma rayog ni nge ‘pi’ e athamgil nga lanin’dad’ ni ngad nonad ngak be’ ndab da rusgad.—1 Thess. 2:2.
4. Uw rogon ni ngad fal’eged rogod ni ngad machibgad u fithik’ e sabethin?
4 Ngan Gay e Kanawo’: Boor e publisher ni kar pirieged boch e kanawo’ nrayog ni ngar machibnaged e girdi’ u fithik’ e sabethin. Mu lemnagem, ma ga lemnag e piin ni ga ma mada’nag ni gubin e rran. Gubin ngiyal’ ni ngaum man ma ga be fek e Bible rom nge boch e babyor nrayog ni ngam pi’. Mu um fal’eg i yaliy e girdi’ ko gin ni ga ma yan riy i yan. Ma nap’an nra mab e kanawo’ ngom ma rayog ni ngam machib.—Fil. 1:12-14; 1 Pet. 3:15.
5. Mang nrib ga’ fan ni ngan machib u fithik’ e sabethin?
5 L’agruw fan ni ngad gayed rogon ni ngaud machibgad u fithik’ e sabethin, ni aram e t’ufeg rodad ngak Got nge girdi’. (Matt. 22:37-39) Chiney e gad be gurnag e re maruwel ney, ere dab da lemnaged nde ga’ fan e re n’ey. Ya susun ni ngad fal’eged rogodad ni ngad machibnag fare thin nib fel’ ngak gubin e girdi’ u m’on ni nge sagaal.—Rom. 10:13, 14; 2 Tim. 4:2.