Gubin Ngiyal’ ni Gad e Pi Mich
1. Mang e gad ra fil ko n’en ni rin’ Jesus ni faani machibnag be’ nib pin u tooben e luwed?
1 Ba n’uw yang ni ke yan Jesus riy ma ke magar ma ke belel. Ke yan pi gachalpen ni ngar chuw’iyed e ggan, ere ke yan i par nga tooben ba luwed u wuru’ e mach nu Samaria ni be toffan. Gathi ke yan Jesus nga Samaria ni nge machib; ya kemus ni ke yan u tooben e re mach nem ni be sor i yan nga Galilee ni nge machibnag e girdi’ u rom. Machane nap’an ni bay u rom u tooben e luwed me machibnag be’ nib pin ni keb e ngaram ni nge l’eng e ran. (John 4:5-14) Mang fan? Ya gubin ngiyal’ ni ir fare “mich nib yul’yul’ ma ba riyul’.” (Rev. 3:14) Ere ku arrogodad ni gad ma folwok rok Jesus ya gubin ngiyal’ ni gadad e Pi Mich Rok Jehovah.—1 Pet. 2:21.
2. Uw rogon ni ngad fal’eged rogodad ni ngad machibnaged e girdi’ u fithik’ e sabethin?
2 Ngam Fal’eg Rogom: Faanra gubin yang ni gad be yan riy ma gad be fek e pi babyor rodad ma rayog ni ngad machibnaged e girdi’ u fithik’ e sabethin. Boor e publisher ni yad ma fek e tract ni ngaur pied ko girdi’ ni ma maruwel u kantin, ara gas station, nge ku yugu boch e girdi’ ni kar mada’naged. (Ekl. 11:6) Bay reb e walag nib pin ni ma milekag ni gubin ngiyal’. Ere ra yan ma bay e Bible nge fare babyor ni Bible Teach u lan e kabang rok ni ke fek ni nge fanay u nap’an ni be machibnag e piin ni yad bay u charen.
3. Uw rogon ni ngad tababnaged e sabethin?
3 Mu Tababnag e Sabethin: Nap’an ni gad be machib u fithik’ e sabethin ma de t’uf ni ngad weliyed murung’agen ban’en u Bible ko som’on. Bod Jesus, nap’an ni tabab ni nge non ngak fare pin u tooben e luwed ma de yog ngak ni ir fare Messiah. Ya n’en ni rin’ e ning bu uw e ran ni nge unum, ma aram e n’en ni pug e tafinay rok fare pin. (John 4:7-9) Reb e walag nib pin e ke yog ni baadag ni nge tababnag e sabethin u nap’an nra fith be’ ngak murung’agen reb e madnom ko fayleng. Dar ma yog nder un ngay ni bochan e ir reb e Mich Rok Jehovah, ya n’en ni ma yog e ma gaar: “Kug dugliy u wan’ug ndab gu un ngay.” Nap’an nra fulweg ni aram rogon mab ga’ ni ma fith e girdi’ ko mang fan. Ma aram e ngiyal’ ni ma tabab fare walag ko machib.
4. Mang fan ni be pi’ fare thin nu Matthew 28:18-20 e athamgil nga lanin’um ni ngam machibnag e girdi’?
4 Yugu aram rogon ni ke mu’nag Jesus e maruwel rok u fayleng, machane ri kab ga’ fan u wan’. (Matt. 28:18-20) Ere gadad e gad bod Jesus ni gubin ngiyal’ ma kad fal’eged rogodad ni ngad weliyed murung’agen e tin ni ke michan’dad ngay.—Heb. 10:23.