Deer
◼ Mang fan nib t’uf ni ngan gonopiy rogon ni ngan fanay e telefon ni nge motoyil e girdi’ riy ko muulung?
Boor e ulung ni yad ma ayuweg e piin ndabiyog ni ngar uned ko muulung ni bochan e m’ar fa yugu boch e magawon ni ngar motoyilgad ko muulung u telefon. Ba t’uf ni ngan gonopiy min yarmiy ni nge par e re n’ey ni goo fan ngak e piin nri dabiyog ni ngar uned ko muulung. Ere piin piilal nib milfan e biney e maruwel ngorad e thingar ra guyed rogon ni ngan rin’ “nib fel’ rogon ma ba yaram.”—1 Kor. 14:40.
Susun ni nge guy e piin piilal rogon ni ngan ayuweg e tin baaray e walag ndabiyog ni ngar uned ko muulung ni bochan e keb ba mit e m’ar ngorad ni ke mo’maw’ ni ngar golgad riy fa kar awgad nga but’ ndabkiyog ni ngar uned ko yan fa ranod nga bang. Ku rayog ni ngan ayuweg e piin yad ma fil e Bible ni yad be mon’og i yan machane dabiyog ni nga ranod nga bang ni bochan boch e magawon. Faanra de gaman e telefon ni ngan fanay, ma rayog ni ngan recordnag e pi welthin ni kan pi’ u nap’an e muulung ni nge motoyil boch i yad ngay.
Machane bin th’abi fel’ e ngan un ko muulung, ya faanra ud chaggad pi walagdad u taabang ma ra “fel’ rogodad ko michan’ rorad” maku rayog ni nge ayuweg e piin ni ka yad ba beech ni ngar nanged feni ga’ fan ni ngaun un muulung. Gad ra un ko muulung ma ka boor ban’en ni gad ra fil ko pi demonstration ni yima pi’, maku rayog ni nge ayuwegdad e piin piilal u boch ban’en, maku reb e rayog ni ngad thamiyed e t’ufeg ni bay u thilin e pi walag u lan e ulung. Rriyul’ e n’en ni yog reb e walag nib pin ni ke pillibthir u tomren ni yan i gumuchmuch reb e walag ngak u Kingdom Hall ni gaar: “Dabiyog ni ngan rin’ e re n’ey u telefon!”—Rom. 1:11, 12.
Ngiyal’ ney e boor e walag ni kar pilibthirgad ni yad ma athamgil ni ngar uned ko muulung ni gubin ngiyal’ ni bod rogon Anna ni “der pag e tempel ni rran nge nep’.” (Luke 2:36, 37) Rayog ni ngad folwokgad ko pi walag ney ma ud athamgilgad ni ngad uned ko muulung ni gubin ngiyal’ nge yog nda liyorgad ngak Jehovah ni Got rodad u taabang.—Ps. 95:1-3, 6; 122:1.