Ngad Mon’oggad ko Machib​—Mu Non ngak e Girdi’ u Fithik’ e Sabethin Ya Nge Yag ni Ngam Machibnagrad

Ke yag ni nge machibnag Jesus fare pin nu Samaria u fithik’ e sabethin ni bochan e som’on e gay rogon ni ngar sabethingow. Faan gad ra gay rogon ni ngad nonad ngak e piin ndad nanged owcherad, ma uw rogon nra ayuwegdad e re n’ey ni ngad mon’oggad ko machib?

• Mu gol ngak e girdi’ ni ga be mada’nagrad mag non ngorad. Yugu aram rogon ni ke aw parawon Jesus, machane me gay rogon ni nge non ngak fare pin nu Samaria ni aram e ning e ran ngak ni nge unum. Ere ku arrogom nrayog ni ngam non ngak be’ ni aram e nga mog e kammagar ara fel’ e kadbul. Ku rayog ni ngam weliyew ban’en u murung’agen e yafang, ara boch ban’en ni ka fini buch. Dab mu pagtalin ni n’en ni ga be nameg e ngam sabethingow facha’, ere rayog ni ngam weliyew boch ban’en nra adag ni nge nang murung’agen. Machane faanra dabun facha’ ni ngam nonow, ma dabi mulan’um. Ya ku rayog ni ngkum non ngak yugu be’. Mmeybil ngak Jehovah ni nge ayuwegem ya nge yag ni ngam rin’ e re n’ey ndab mu rus.​—Ne 2:4; Ac 4:29.

• Mmotoyil nib fel’ rogon u nap’an ni gimew be sabethin ya nap’an nra mab e kanawo’ ngom, mag machibnag. Machane dab mu rin’ e re n’ey u fithik’ e gurgur. Mu pag ni ngam sabethingow. Faan ga ra towasariy facha’ ni nge non, ma aram e rayog ni nge magagawon ni nge un ngom ko sabethin, ma ra munmun me tal ndab ki non ngom. Machane dabi mulan’um ni faanra mus e sabethin romew ma dawori yag ni ngam machibnag. Faanra ga be rus ni ngam machib u fithik’ e sabethin, ma rayog ni ngam guy rogon ni ngam sabethingow be’ ndamur lemnag ni ngam machibnag. [Ngan pag e bin som’on e video ngemu’ min weliy murung’agen u taabang.]

• Rayog ni ngam gay rogon ni ngam machibnag be’ ni aram e ngam weliy ban’en ngak ni bay rogon ko michan’ rom nrayog ni nge k’aring ni nge fith e deer ngom u murung’agen. Ke weliy Jesus murung’agen boch ban’en ni k’aring fare pin nu Samaria ni nge fith boch e deer. Ere nap’an ni tabab ni nge machibnag, ma kemus ni be pi’ e fulweg ko pi deer ni fith fare pin. [Ngan pag min weliy e bin l’agruw e video u taabang, ngemu’ mu kun pag e bin dalip e video min weliy murung’agen u taabang.]