Mu Gay e Kanawo’ Nrayog ni Ngam Machibnag fare Thin nib Fel’ Riy!
1. Mang e rayog ni ngad filed rok David?
1 David ni Pilung e ir bagayad e piin nda i pag e pi magawon rok ni nge taleg ndab ki rin’ boch ban’en nib t’uf ni nge rin’. Baadag ni nge toy e tempel rok Jehovah. Machane, nap’an ni buch boch ban’en ni taleg ndaki yag ni nge rin’ e n’en ni ke lemnag ni nge rin’, ma aram me thilyeg boch ban’en ya nge yag ni fal’eg rogon e re maruwel nem ni nge rin’ Solomon. (1 Ki. 8:17-19; 1 Kron. 29:3-9) Gathi tin ndabiyog ni nge rin’ e ir e i lemnag, ya i lemnag e tin nrayog ni nge rin’. Uw rogon nrayog ni ngad folwokgad rok David u nap’an ni gad be gay boch e kanawo’ nrayog ni ngad wereged fare thin nib fel’ riy?
2. Mang boch ban’en nrayog ni ngad fal’eged i yaliy u rarogodad?
2 Mu Rin’ e Tin Nrayog Rom: Boor e walag ni kar thilyeged rogon e par rorad ni bochan e nge lich pa’ nga puluwrad me yag nra uned ko pioneer ni ayuw ara regular pioneer. (Matt. 6:22) Ere, rayog ni ngkum rin’ e re n’ey fa dabiyog? Faan ga ra meybil, mag fal’eg i yaliy rarogon e par rom, ma dabisiy ni ga ra pirieg boch e “kanawo’” nrayog ni ngam rin’ e re n’ey riy. Ma faanra kam guy nrayog rom, ma ga rin’!—1 Kor. 16:8, 9.
3. Mang boch e kanawo’ nrayog ni ngad machibgad riy ni yugu aram rogon ndabiyog ni ngad uned ko pioneer ni bochan rarogodad?
3 Machane, uw rogon ni faanra dabiyog ni ngam un ko pioneer ni bochan rarogom? Kum lemnag boch ban’en nrayog ni ngam rin’. Bod ni faanra bay boch e girdi’ nib thil e michan’ romed ni gimed ma maruwel u taabang, ma rayog ni ngam guy rogon ni ngam machibnagrad. Fa reb e faanra keb ba mit e m’ar ngom, mab ga’ ni ga ma yan mu guy e pi togta rom, maku rayog ni ngam machibnagrad. Dab mu pagtalin ni ki mada’ ko piin ndabiyog ni ngar uned ko machib nib fel’ rogon ni bochan e kar pilibthirgad ara kar m’argad e rayog ni ngar yoloyed 15 e minit ko report rorad u gubin e pul. Nap’an ni ga be yoloy e report rom u tungun e pul, ma dab mu pagtalin ni ngam uneg ngay e awa ni kam fanay u nap’an ni ga be machib u fithik’ e sabethin nge babyor ni kam pi’ ni kub muun ngay e tract, nge invitation ko Puguran nge convention. Chuuw i tayim nem ni ga ma machib riy e dabi n’uw nap’an mag gin ngay ni ke yoor!
4. Mang e kam dugliy u wan’um ni ngam rin’?
4 Demtrug rarogodad, ma ngad gayed e kanawo’ nrayog ni ngad machibnaged fare thin nib fel’ riy. Faan gad ra rin’ ni aray rogon, ma aram e rayog ni ngad felfelan’gad ni bochan e gad manang ni gad be rin’ e tin nrayog rodad ni fan nga Gil’ilungun Got.—Mark 14:8; Luke 21:2-4.