Ngad Mon’oggad ko Machib—N’en Nrayog ni Nga Nog ngak Be’ ni Kam Mada’nag u Nap’an e Machib nib Damumuw

Fan nib Ga’ Fan: Boor e girdi’ ni gad ma mada’ u nap’an e machib ni yad ba gol. Machane, i yiiynag Jesus ni bay boch e girdi’ ni yad ra fanenikaydad. (John 17:14) Ere, susun ndab da gingad ngay ni faanra kad mada’naged be’ nib damumuw u nap’an e machib. Faanra kad mada’naged be’ ni aray rogon, ma gad baadag ni ngad nonad ngak u reb e kanawo’ nib puluw ko n’en nib m’agan’ Jehovah ngay ni ir faen ni gad be fek fithingan i yan. (Rom. 12:17-21; 1 Pet. 3:15) Faan gad ra rin’ e re n’ey, ma rayog ni nge dabi gel e damumuw rok faen ni kad nonad ngak. Ma re n’ey e ku rayog ni nge k’aring faen ni ga be non ngak nge yugu boch e girdi’ ni ngar guyed e ngongol rodad nib fel’, ma ra yay ni migid ni ku ra yan e Pi Mich Rok Jehovah ni ngan guyrad ma sana yad ra motoyil.—2 Kor. 6:3.

Rogon ni Ngan Rin’:

Mu guy rogon ni ngam par nib gapas lanin’um, ma ga be dag e ngongol nib sumunguy. Ga ra rin’ e re n’ey, ma rayog ni nge dabi gel e damumuw rok faen ni gimew be non. Mu guy rogon ni nge dabi kireb lanin’um ni bochan e n’en nra yog ngom. (Ekl. 7:9) Sana ba damumuw ni bochan e bay e magawon rok ara bochan nib kireb e tayim ni kam mada’gow. Sana rayog ni be damumuw ni bochan e ke rung’ag boch ban’en u murung’agdad nde riyul’.—2 Kor. 4:4.
Mu non ngak faen ni kam mada’gow u fithik’ e sumunguy. (Prov. 15:1) Gur, faen ni kam man nga tafen e be mol ma kam pug, ara kam magawonnag u nap’an ni be rin’ boch ban’en? Yugu aram rogon ni darud siro’gad ni bochan fare maruwel ni machib ni gad be rin’, machane rayog ni ngam siro’ ngak faen ni kam mada’gow ni bochan ni kam man u ba ngiyal’ nib magawon. Gur, ke damumuw ni bochan ban’en nde riyul’ ni ke rung’ag u murung’agdad? Faanra aray rogon, ma rayog ni nge lungum ngak: “Kug nang ko mang fan ni kam damumuw. Machane, re n’ir ni kam rung’ag u murung’agmad e de riyul’. Rayog ni nggu weliy ngom ngam nang fan?” Gur, bay reb e machib u Bible nde mich u wan’ ni bod fare yaram ni yima tharbog be’ ko ulung ara racha’ ndab ni fanay? Rayog ni nge lungum: “Kug nang fan e tafinay rom. Ya ku bay boch e girdi’ ni ku aray rogon e n’en ni yad ma lemnag. Rayog ni nggu dag ngom ko mang e be weliy e Bible u murung’agen e re n’ir?”
Faanra kam mada’nag be’ nrib gel e damumuw rok, ma sana bfel’ ndab mu fulweg lungun mag yan ngam chuw. Ma faanra yog ni dakuriy ba ngiyal’ ni nge yan e Pi Mich Rok Jehovah nga tafen, ma gog ngak ni yira tayfan e n’en ni ke yog.

Mu Gay Rogon ni Ngam Rin’ e Re N’ey u Lan e Re Pul Ney:

Mu rin’ed chon e tabinaw rom e re n’ey u nap’an e fol Bible ni tabinaw.
Tomuren ni kam chuwgow u tafen be’ nib damumuw, mi gimew weliy ko mang e bin nib puluw e kanawo’ ni susun ni ir e bfel’ ni ngam nonow riy ngak facha’.