Ngam Pi’ e Athamgil nga Laniyan’ e Girdi’ ni Ngar Rin’ed e Tin nib Fel’

Fare thin ni bay ko Hebrews 10:24 e be pi’ e athamgil nga lanin’dad ni nge bagadad ma “ngi i ayuweg [“nge pi’ e athamgil nga laniyan’,” NW] bagadad ma be dag ngak nib t’uf rok ma be rin’ e tin nib fel’ ngak.” Ere rayog ni ngad pied e athamgil nga laniyan’ e pi walag u daken e ngongol nge thin rodad. Ere mu weliy ngorad e pi n’en ni ke buch rom u nap’an ni ga be machib. Mu dag ngorad rogon e felfelan’ ni ga be tay ni bochan e ga be pigpig ngak Jehovah. Machane ngam kol ayuw, ya de fel’ ni ngam taarebrogonnag e pi n’en ni kam rin’ ko n’en ni kar rin’ed. (Gal. 6:4) Ya n’en nib fel’ ni ngam rin’ e aram e ngam rin’ urngin nrayog rom ni ngam pi’ e athamgil nga laniyan’ e pi walag ni nge bagayad me dag e ‘t’ufeg rok ma be rin’ e tin nib fel’,’ ma gathi nge rin’ e tin nib fel’ ni bochan ni yibe towasariy. (Mu guy fare ke babyor ni Ministry School, ko p. 158, par. 4.) Faanra riyul’ ni ga be pi’ e athamgil nga laniyan’ e girdi’ u fithik’ e t’ufeg ma aram e pi n’en ni ga be rin’ ni bod ni ga be pi’ e tin nib t’uf ko girdi’ ara ga be machibnagrad e ga ra rin’ u fithik’ e felfelan’.​—2 Kor. 1:24.