Ke Thap Ngak Got, Ni Gathi Kemus Ni Bochan E Maruwel, Ya Bochan E Gol Nib Gel Rok Got
“Yu daken e runguy rok Got ngodad e ir e ke thapegmed riy ngak, ni bochan e ke mich Jesus u wan’med . . . Dariy ban’en ko pi n’en ney ni ngam ufanthingad ngay, ni fan e gathi ban’en ni gimed e mmaruweliyed ngam yogniged.”—EFESUS 2:8, 9.
1. Murung’agen e n’en ni ke rin’ e girdi’, uw rogon nib thil e Kristiano ko oren e girdi’, ma mang fan?
GIRDI’ e ngiyal’ ney e ri yad ma felfelan’ ko pi n’en ni kar rin’ed ma kar mu’naged, ma baga’ ni ri yad ma uf ngay nib papey. Pi Kristiano e yad bathil. Dubrad ni ngar ufgad ko n’en ni ka ra rin’ed kar mu’naged, ni mus ko pi n’en ni bay rogon ko liyor nib riyul’. Yugu aram rogon ni yad ma felfelan’ ko n’en ni ke rin’ e girdi’ rok Jehovah ni yad gubin, ma gathi ri yad ma weliy e n’en ni kar rin’ed ni be’ nge be’. Yad ma nang ni ngan pigpig ku Jehovah, e lem nib puluw e kab ga’ fan ko tin ni ke rin’ be’. Urngin e girdi’ ni ran taw’athnag ko yafas ni manemus, ni gathi bochan e n’en ni ke rin’ be’, ya daken e michan’ nge runguy rok Got nib gel.—Luke 17:10; John 3:16.
2, 3. Mang e n’en ni ke uf Paul ngay, ma mang fan?
2 Paul ni apostal e ri manang e re n’en ney. Tomren ni ke meybil ni dalip yay ni nge chuw rok e “liliy nib gel e amith riy,” me fulweg Jehovah ngak ni gaar: “Ayuw rog ngom e ke mus e taareb n’en ni ir e thingari yog ngom; ya gelngig e rib gel ko ngiyal’ ni gab meewar.” Me fol Paul ko n’en ni ke dugliy Jehovah u fithik’ e sobut’an’ ni gaar: “Ere kari gu felfelan’ ni nggu uf ko meewar rog, ni fan e nggu thamiy rog ni ke yib gelngin Kristus ngog ni nge mang yoror rog.” Lem rok Paul nib sobut’an’ e aram e n’en ni ngada folwokgad riy.—2 Korinth 12:7-9.
3 Yugu aram rogon ni rib gel e maruwel ko Kristiano ni tay Paul, ma manang ni tin ni ke rin’ e gathi bochan e salap rok. U fithik’ e sobut’an’, me yog ni gaar: “I gag e th’abi sobut’ u fithik’ urngin e girdi’ rok Got; machane ke pi’ Got ngog e re gaf i maruwel ney ndariy rogog ni ngan pi’ ngog, ni nggu fek fare thin Nib fel’ ni yib rok Got i yan ngak e piin ni gathi yad piyu Israel, ni murung’agen e flaab rok Kristus ndariy ko fol.” (Efesus 3:8) Thin rok e be dag ni dariy e lem rok nib ufanthin ma de thothupnag ir. “I Got e ma togopuluw ngak e piin nib tolangan’rad, ma ma ayuweg e piin nib sobut’an’rad.” (James 4:6; 1 Peter 5:5) Gur, gad ma fol ko ngongol ni dag Paul, ni gad ma taydad ni gadad e th’abi sobut’ ko urngin e pi walagdad?
“Dabi Finey Bigimed ni Ir e Ba Sorok Ngak Boch e Girdi’”
4. Mang fan ni yu ngiyal’ e mo’maw’ ni ngada ted boch e girdi’ ni kab fel’ ngodad?
4 I fonownag Paul ni apostal e piin ni Kristiano ni gaar: “Dabi suk’ ngan’med ni ngam muruweliyed ban’en ni gimed e ngam m’onod riy ni fan e nga nognimed riy ni gimed e soromed, ara bochan e nge yib ufan ngomed; machane nge bigimed me sobut’nagan’, ma dabi finey bigimed ni ir e ba sorok.” (Filippi 2:3) Dabiy siy ni mo’maw’ e re n’ey ni baga’ nfaanra bay e maruwel rodad ni gad be ayuweg e ulung. Sana mo’maw’ ni ngan sobut’an’ ya bochan e lem ko fayleng e chiney ni ri yad ma tagenging ma ke af boch ngodad. Rayog, ni nap’an ni ka gad ba bitir min fil ngodad ni ngada tagengingad ngak pi walagdad u tabinaw, ara ngak e piin ni gad nga ba thal e skul. Rayog ni yima pi’ e athamgil nga lanin’dad ni ngada maruweliyed ni ngada salapgad ko gosgos ara ngad manged e ani th’abi llowan’ u skul. Riyul’, nib fel’ ni ngad rin’ed e tin th’abi fel’ ni rayog rodad ko urngin ban’en nib puluw. Machane, ma rin’ e Kristiano ni aram rogon, ni gathi ngan pining e sorok ngorad, ya bochan ni ngari fel’ rogorad riy, nge ku boch e girdi’. Machane, nge guy rogon be’ ni ngan pining e sorok ngak ni ir e th’abi fel’ e ra yib e riya’ riy. Uw rogon?
5. Faanra dabni yal’uweg, ma lem ni tagenging e ra pow’iyey ko mang?
5 Faanra de yog ni ngan yal’uweg, ma ngongol ni tagenging mab siin e rayog ni nge k’aring be’ ni nge dabki tay fan e girdi’ me ufanthin. Ma ra awan’ ngak boch e girdi’ nbochan e salap nge taw’ath rorad. Proverbs 28:22 e be yog ni gaar: “Ani ta awan’ e ma k’aring laniyan’ ni nge adag e tin nib tolang puluwon, machane de nang ni gafgow e nge yib ngak.” Maku rayog ni nge guy rogon ni nge yog ngak e liw ndariy rogon ni nge yan ngay. Fan ni nge mat’awnag e tin be rin’, ma ra tabab ni nge gun’gun’ ma ma gay e kireb rok boch e girdi’—ban’en ni thingari siyeg e Kristiano. (James 3:14-16) Yugu demtrug rogon, ma rayog ni nge gel e ngongol nib fel’ ngak nbochan e n’en ni be rin’.
6. Uw rogon ni be ginang e Bible murung’agen e lem ni tagenging?
6 Bible e be fonownag e pi Kristiano ni gaar: “Ma thingari dab da ufanthingad, ara i k’aring bagadad e damumuw ngak bagadad, ara i awan’ bagadad ngak bagadad.” (Galatia 5:26) I weliy John murung’agen e Kristiano nib tamilang ni aram rogon e ngongol rok. I yog ni gaar: “Kug yoloy bangi babyor ngak girdien e galesiya nib ngoch e thin ni ba’ riy; machane Diotrefes, ni be’ ni ba adag ni ir e nge yog e thin rorad e dabun ni nge fol ko thin ni ku gog. Bay gub mu gu weliy ngomed urngin ban’en ni ke rin’: ni pi n’en nib kireb ni ke yog ni murung’agmad nge urngin e tin ni be yog nde riyul’! Machane gathi ke mus i ira’; ya mmudugil ni gathi bayi changar ngak e piin ni walagdow ni girdien Kristus ko ngiyal’ ni bay ra bad.” Rib gel e kireban’ ni ra yib ngak reb e Kristiano ni ke aw ko magawon ni aram rogon!—3 John 9, 10.
7. Mang tagenging u tabon e maruwel e chiney e nga i pilo’ reb e Kristiano riy.
7 Riyul’, ni de puluw ni ngan lemnag ni rayog ni nge siyeg reb e Kristiano ni nge dabki un ko tagenging ni polo’. Ni bod e maruwel rok, e sana bay rogon ko tin be rin’ boch e girdi’ ara fol chuway’ ni ma pi’ ban’en ni chuway’ ni taareb rogon ko tin ma rin’ boch e girdi’. Machane, ra buch rok reb e Kristiano e n’en ni aram rogon, ma baadag ni nge ulul ko fol chuway’ rok u fithik’ e tay fan, nge t’ufeg, nge gol. Ra n’ag e ngongol ni de puluw ko Kristiano me siyeg ni nge dabi mang be’ ni yimanang ni ma tagenging ni kemus ni ir e be lemnag ir. Dabi lemnag ni nge mang be’ ni th’abi fel’—ko urngin ban’en—ma ireray ban’en ni th’abi ga’ fan ko yafas. Faanra ireray e n’en ni ma rin’ be’ ko tin ni dariy rogon ko tirok Got ban’en, ma uw feni thingari rin’ nga rogon e liyor ku Got.
“Me Siy i Puluwnag e Ngongol ni Ke Rin’ Yugu Be’”
8, 9. (a) Mang fan ni dariy fan ni piin ni piilal e ngar taareb rogonnaged bagayad ngak bagayad? (b) Mang fan ni thin ni bay ko 1 Peter 4:10 e fan ngak urngin e tapigpig rok Got?
8 Fare lem ni susun e nge yog ngak e piin ni Kristiano e be dag ko pi thin n’ey ni kan thagthagnag ni gaar: “Ra be’ ma nge mang ir e changar ngak nge fal’eg i yaliy e ngongol rok ara pangin. Ma faanra ba fel’ e ngongol rok, me ere rayog ni nge felfelan’ ko ngongol ni ke rin’, me siy i puluwnag e ngongol rok ko ngongol ni ke rin’ yugu be’.” (Galatia 6:4) Bochan ni piin ni piilal u lan e ulung e yad manang ni dariy e tagenging u fithik’rad, ma yad ma maruwel u taabang ni bod ba dowef. Yad ma felfelan’ ko ayuw ni ma pi’ be’ nge be’ ni nge fel’ rogon e ulung ni polo’. Ere yad ma pilo’ ko tagenging ni ma kirebnagey mar daged ngak boch e girdi’ u lan e ulung rogon ni ke taareban’rad.
9 Bochan yangaren boch e piilal, nge tin ni kar filed, nge salap rorad, ma rayog ni ngar cheggad ngak boch i yad, ara bay e tamilangan’ rorad nib gel. Bochan e re n’ey, ma ba thilthil e maruwel ko piin ni piilal u lan e ulung rok Jehovah. Darur ma taareb rogonnaged bagayad ngak bagayad, ya yad ma lemnag fare fonow ni gaar: “Ra be’ ma tow’ath rok ni ke pi’ Got ngak ni nge gagiyegnag e thingari maruwel ngay nge yib fan ngak boch e girdi’.” (1 Peter 4:10) Tin riyul’ riy, e re thin nu Bible ney e fan ngak urngin e tapigpig rok Jehovah, ya bochan ni yad urngin ma ke yog ngorad boch e tamilangan’ nib puluw ma urngin i yad e ba felfelan’ ni ngar uned ko maruwel ko Kristiano ni ngan machib.
10. Kemus ni uw rogon ma ra fel’ e pigpig rodad nib thothup u wan’ Jehovah?
10 Ra fel’ e pigpig rodad nib thothup u wan’ Jehovah ni kemus ni faanra gad ma rin’ u fithik’ e t’ufeg ngu fithik’ e yul’yul’, ma gathi bochan ni ngad tolangniged gadad ngak boch e girdi’. Ere baga’ fan ni nge par nib thabthabel rogon e lem rodad ko maruwel ni gad be ayuweg e liyor nib riyul’. Yugu aram rogon ni dariy be’ ni rayog ni nge yog nrib puluw murung’agen e lem rok yugu boch e girdi’, ma Jehovah e “ma guy gum’irchaey.” (Proverbs 24:12, NW; 1 Samuel 16:7) Ere, yu ngiyal’ ma thingarda fithed gadad ko, ‘Mang e be k’aringeg gu be pigpig ku Jehovah?’—Psalms 24:3, 4; Matthew 5:8.
Lem nib Puluw ko Pigpig Rodad
11. Mang e gali deer u murung’agen e maruwel rodad ko machib nib puluw ni ngan weliy?
11 Faanra maruwel rodad e gathi bin nib m’on ni ngada fel’ gad riy u wan’ Jehovah, ere susun nge uw rogon feni ga’ fan u wan’dad e pigpig ni gad ma ta’? Gur faanra gad be machib u fithik’ e lem nib puluw mab t’uf ni ngad yoloyed nga babyor e n’en ni gad ma rin’ ara oren? Ba puluw e gali deer ney, ya bochan dub dad ni ngad ted oren e pigpig ni gad ma ta’ nge m’on ko pigpig ngak Jehovah ara rogon murung’agen felngin e maruwel rodad ni ngan weliy e ir e th’abi ga’ fan u wan’dad ko maruwel rodad ni gadad e Kristiano.
12, 13. (a) Mang boch i fan ni ngad yoloyed ma ngad ayuweged babyoren e maruwel ni gad ma tay? (b) Mang e pi n’en ni fan ni ngeb e felfelan’ ngodad u nap’an ni gad be yaliy e n’en ni kan yoloy u murung’agen e maruwel rodad ko machib ni polo’?
12 Mu lemnag e n’en ni yog fare babyor ni Organized to Do Jehovah’s Will ni gaar: “Pi gachalpen Jesus Kristus kakrom e kar adaged murung’agen e mon’og ko machib ni yi be ta’. (Mark 6:30) Fare babyor u Bible ni Acts e be yog ni immoy 120 e girdi’ u nap’an ni kan puog fare kan ni thothup nga daken pi gachalpen Jesus ko Pentecost. De n’uw nap’an nga tomur riy me taw ko 3,000 pi gachalpen me yan nga taw ko 5,000. . . . (Acts 1:15; 2:5-11, 41, 47; 4:4; 6:7) Susun e ka ri pi’ e re thin ney ni murung’agen e mon’og e athamgil nga laniyan’ pi gachalpen!” Ku arfan, ni Pi Mich Rok Jehovah e ngiyal’ ney e yad be athamgil ni ngar yoloyed nga babyor ma ngar chaariyed e n’en ni kan rin’ u fayleng ni ga’ngin ni be lebuguy e thin ni yog Jesus ni gaar: “Ma re Thin rok Got ney Nib Fel’ ni murung’agen e gagiyeg rok Got e bay ni machibnag u gubin yang u fayleng ni nge urngin e girdi’ me nang, ma aram mfini taw nga tomuren e fayleng.” (Matthew 24:14) Thin ara namba ni kan yoloy nga babyor e ra dag rogon e tin riyul’ e maruwel ni kan rin’ u fayleng ni ga’ngin. Ma ra dag ko u uw e gin nib t’uf e ayuw riy nge ba miti mang babyor e ba t’uf ma uw urngin e ba t’uf ni fan ni nge mon’og e maruwel ko machib.
13 Ere, ngan weliy ara ngan yoloy nga babyor e maruwel rodad ko machib e ra ayuwegdad ni ngada machibnaged e thin nib fel’ ko Gil’ilungun nib manging’. Maku, gathi ra felan’dad u nap’an ni gad ra rung’ag e n’en ni be rin’ e pi walagdad u yu yang u fayleng? Thin ni be weliy murung’agen e mon’og ni be buch u ga’ngin e fayleng e ra felfelan’nagdad, ma ra k’aringdad ni ngad gelniged boch e maruwel rodad, ma be k’aring ni ngari pagan’dad ko pi taw’ath ni yib rok Jehovah. Ri ma pi’ e felfelan’ ngodad ni ngada nanged ni n’en ni kad rin’ed ma kad yoloyed nga babyor e kan uneg ko urngin ni kan rin’ u fayleng ni ga’ngin! Tin ni kad rin’ed e ba achichig ni ra ngan taareb rogonnag ko urngin ni kan rin’, machane manang Jehovah e n’en ni kad rin’ed. (Mark 12:42, 43) Dab mu pag talin, ni ra dam yoloy nga babyor ngam pi’ e n’en ni kam rin’, ma dabiyog ni ngan nang urngin e n’en ni kan rin’ u fayleng ni ga’ngin.
14. Mang e n’en nib muun ko ngan machib min fil e Bible ngak e girdi’ ni bang ko liyor rodad ku Jehovah?
14 Riyul’, ni boor ban’en ni ma rin’ urngin e Mich Rok Jehovah ni be lebuguy e maruwel rok ni ir be’ ni ke ognag e yafas rok ni reb e tapigpig rok Jehovah e der ma ta’ ko re babyor nem. Ni bod ni, dabni tay ngay e fol Bible ni yima tay ni ra be’ ma ir rok, nge muun ko pi muulung min un ko tin yi ma rin’ riy, nge pi maruwel u lan e ulung, nge ayuw ni yima pi’ ngak e walag nfaanra ba t’uf, nge ayuw ko salpiy ni fan ko maruwel ko Gil’ilungun ni yima rin’ u fayleng ni ga’ngin, nge boch ban’en. Ere, yugu aram rogon ni baga’ fan fare babyor ni kan yoloy ngay e tin kad rin’ed ko machib, ma rogon ni gad ra par ni gad ba pasig ko machib ma dab da malmalgad, e thingari par nib thabthabel e lem rodad riy. Dab da lemnaged ni ireray e babyor rodad, ni be dag ni rayog ni nge yog ngodad e yafas ni manemus.
“Pasig ko Pi Maruwel nib Fel’”
15. Yugu aram rogon ni kemus ni goo maruwel e dabi thapegdad ngak Got, ere mang fan ni ba t’uf?
15 Ba tamilang, ni yugu aram rogon ni goo maruwel e dabi thapegdad ngak Got, machane baga’ fan. Arfan ni ka nog e piin ni Kristiano ni “ba ulung i girdi’ ni kar machalboggad nib mil farad ngak me pasigan’rad ni ngar rin’ed e tin nib fel’’’ ngorad min pi’ e athamgil nga lanin’rad ni “nge bagayad ma ngi i ayuweg bagayad ma be dag nib t’uf rok ma be rin’ e tin nib fel’ ngak.” (Titus 2:14; Hebrews 10:24) Reb e tayol Bible, ni James, e ke yoloy e thin nib gel ni gaar: “Ni bod rogon e dowef nra dariy e pogofan riy ma ba yam’, ere ku er rogon e michan’ ngak Got nra de chag e ngongol ngay ma ba yam’ fare michan’.”—James 2:26.
16. Mang e kab ga’ fan ko maruwel, machane mang e thingar da kol ayuwgad riy?
16 Ri feni ga’ fan e maruwel nib fel’ e ku er feni ga’ fan e n’en ni ke k’aringey kan rin’. Ere ffel’ ni ngad yaliyed yu ngiyal’ e n’en ni be k’aringdad ngada pigpiggad ku Got. Bochan ni dariy be’ ni ri manang e n’en ni be lemnag boch e girdi’, ere, thingar dab da turguyed e kireb nga daken boch e girdi’. “I gur mini’ ni ngam turguy e kireb nga daken e tapigpig rok be’?” kan fithdad, ni bay e fulweg riy nib tamilang ni gaar: “Ya Masta rok e ir e bayi turguy ko yog rok fa de yog rok e tin ni nge rin’.” (Roma 14:4) Jehovah, ni ir e masta ko urngin ban’en, nge faen ni ke duguliy ni nge mang Tapuf Oloboch, i Kristus Jesus, e ra pufthinnagdad, ni gathi kemus ni be yan u rogon e maruwel rodad ya ku be yan u rogon e n’en ni be k’aringdad, nge kanawo’ ni kan bing ngodad, nge t’ufeg, nge yul’yul’ rodad. Kemus ni Jehovah nge Kristus Jesus e ri bay rogon ni ngar pufthinnagew gadad ko kad rin’ed e tin ni ka nog ni nge rin’ e Kristiano, ni aram e thin ni yog Paul ni apostal ni gaar: “Mu athamgiliy u rogon nrayog rom nge par e maruwel rom nrib fel’ u mit Got, ni bod rogon be’ ni girdien e maruwel nder tamra’ ko maruwel rok, ni ir be’ ni ma machibnag e thin rok Got nrogon.”—2 Timothy 2:15; 2 Peter 1:10; 3:14.
17. Yugu aram rogon ni gad be athamgil ni ngad rin’ed e tin th’abi rayog rodad, ma mang fan ni thingar da lemnaged e James 3:17?
17 Jehovah e ba fel’ rogon ni be lemnag e tin rayog ni ngada rin’ed. Rogon ni yog ko James 3:17, “fare gonop ni yib u tharmiy” e ma “sumunguynigey,” nib muun ngay boch ban’en. Gur, gathi kanawoen e gonop e ram, maku ra fel’ rogodad riy, ni ngada folwokgad rok Jehovah? Ere, thingar dab da guyed rogon ni ngada nameged ban’en nib pag rogon ma dabiyog rodad fa rok e pi walagdad.
18. Mang e rayog ni ngad sapgad ngay nga m’on ni faanra ba thabthabel rogon ni gad be changar ko maruwel ni gad be tay nge gol nib gel rok Jehovah?
18 Gad ra par nib thabthabel rogon ni gad be changar ko pigpig ni gad be tay nge gol nib gel ni ma dag Jehovah ngodad, ma rayog ni ngad pared ni gad ba felfelan’ ni aram e pow ko pi tapigpig rok Jehovah nib riyul’. (Isaiah 65:13, 14) Gad ra felfelan’ ni bochan ni be flaabnag Jehovah e girdi’ ni ba ulung, nyugu demtrug ko uw urngin e rayog ni ngad rin’ed ni be’ nge be’. Ngaum “meybil ngak Got ngam ning ngak e tin ni nge yog ngom, ma gubin ngiyal’ ni nguum ning ngak ni ga be pining e magar ngak u lanin’um,” gad ra wenig ngak Got ni nge ayuwegdad ni ngada rin’ed e tin th’abi fel’ nrayog rodad. Ngemu, ma dariy e maruwar riy, ni “gapas rok Got ndabi chuchugur ni nge nang e girdi’ fan e ra yororiy gum’irchamed nge tafinay romed ngi i par rok Kristus Jesus.” (Filippi 4:4-7) Arrogon, rayog ni nge fal’eg lanin’dad me pi’ e athamgil nga lanin’dad ni gad ra nang ni rayog ni ngad thapgag ngak Got, ni gathi kemus ni bochan e maruwel, ya bochan e gol nib gel rok Jehovah!
Rayog ni Ngam Weliy ko Mang Fan ni Piin ni Kristiano e
• dab ra ufgad ko tin ni kar rin’ed ni be’ nge be’?
• ngar siyeged ni ngar taareb rogonnaged bagayad ngak bagayad?
• ngar yoloyed nga babyor e n’en ni kar rin’ed ko machib?
• dab ra turguyed e kireb nga daken e pi walagrad u lan e ulung?
[Picture on page 23]
“Gol rog nib gel ni fan ngom e ke gaman”
[Pictures on page 25]
Piin ni piilal e yad ba felfelan’ ko ayuw ni ma pi’ be’ nge be’ ni nge fel’ rogon e ulung
[Pictures on page 27]
Ra dariy fare babyor ni be yog e n’en ni kam rin’, ma dab ni nang urngin ban’en ni kan rin’ ko machib