Ga Be ‘Maruwel ko Tow’ath ni Ke Pi’ Got Ngom’ u Fithik’ e Gol?
“Nge bigimed me t’uf bigimed rok nrogon e walag ni girdien Kristus, ma nge pasigan’med ngay ni nge bigimed mi i ta’ fan bigimed.”—ROM. 12:10.
1. Mang e be puguran e thin rok Got ngodad?
BE PUGURAN e Thin Rok Got ngodad nra ayuwegdad Jehovah u nap’an ni ke mulan’dad ara ke kireban’dad. Bod ni be gaar e Bible: “Ma ayuweg urngin e piin ke yib e gafgow ngorad; ma pi’ e athamgil nga laniyan’ e piin ke mulan’rad. Ma be golnag laniyan’ e piin ke kireban’rad ma be tafalaynag e maad’ad rorad.” (Ps. 145:14; 147:3, BT) Mus ku Jehovah ni ke gaar: “I gag e Somol ni Got rom; i gag e gu ma pi’ gelngim ma be lungug ngom, Dab mu rus; ya bay gu ayuwegem.”—Isa. 41:13, BT.
2. Uw rogon ni ma ayuweg Jehovah e pi tapigpig rok?
2 Uw rogon ni ‘ma pi Jehovah gelngidad’ ni yugu aram rogon ni dabiyog ni ngad guyed? Uw rogon ni ‘ma ayuwegdad u nap’an ni ke mulan’dad? Boor e kanawo’ ni ma ayuwegdad Jehovah riy. Reb, e ma pi’ ‘gelngin nib gel’ mab thothup ngak e pi tapigpig rok. (2 Kor. 4:7) Ere gur, ka ba’ yugu reb e kanawo’ ni ma ayuwegdad Jehovah riy? Gad ra pirieg e fulweg riy ko bin som’on e babyor rok Peter.
“Fene Gol Got e Ma M’ug u Boor e Kanawo’”
3. (a) Mang e ke yog apostal Peter u murung’agen e skeng ni ma yib ngodad? (b) Mang e kan weliy ko 1 Peter guruy ni 4?
3 Nap’an ni be yol Peter ngak e piin ni kan dugliyrad me yog ngorad ni ngar felfelan’gad ya ba’ labgen nib ga’ ni kan tay ni fan ngorad. Miki gaar: “Yugu ara’ rogon e chiney ndabi siy ni nge taganan’med nib ngoch nap’an ni bochan e boor mit e gafgow ni gimed be tay nib skeng ngomed.” (1 Pet. 1:1-6) Nap’an ni yoloy Peter e re babyor ney ma taab bugithin e fanay ni nge weliy fan fare bugithin ni “boor mit”. Re ney e be dag nib thilthil rogon e skeng nra i yib ngorad. Machane yugu de digeyrad Peter ni yad rorad e ngar lemniged rogon ni ngar gelgad ko skeng ni ma yib ngorad. Ya tamilangnag ngorad ndemtrug e re miti skeng nra yib ngak e Kristiano, ma ba’ Jehovah nra ayuwegrad riy. Ku aram e n’en ni yog u tungun e babyor rok u nap’an ni be weliy murung’agen “tungun urngin ban’en.”—1 Pet. 4:7.
4. Mang fan nrib manigil fapi thin ni bay ko 1 Peter 4:10?
4 I yog Peter ni gaar: “Ra be’ ma tow’ath rok ni ke pi’ Got ngak ni nge gagiyegnag e thingari maruwel ngay nge yib fan ngak boch e girdi’.” (1 Pet. 4:10) Ki yog Peter u roy ni, ‘Boor mit e skeng ni ma yib ngodad machane ku boor e kanawo’ ni ma m’ug riy fene rib gol Jehovah.’ Rib manigil e pi thin nem ya be dag ni demtrug e re miti skeng nra yib ngodad ma fene rib gol Got e ra ayuwegdad ni ngad k’adedan’dad u fithik’. Kam tay fanam i yan riy u rogon ni yog Peter ni ma gol Jehovah ngodad? Ma gol ngodad u daken e pi walag ni Kristiano.
Mmaruwel ko Tow’ath Rom nge “Yib Fan Ngak Boch e Girdi’”
5. Ra reb e Kristiano ma mang e ba milfan ngak ni nge rin’?
5 I non Peter ko ulung ni Kristiano kakrom ni gaar: “Re n’en ni ir e th’abi ga’ fan u fithik’ urngin ban’en e ngari bigimed me t’uf rok bigimed.” Miki ulul ngay ni gaar: “Ra be’ ma tow’ath rok ni ke pi’ Got ngak ni nge gagiyegnag e thingari maruwel ngay nge yib fan ngak boch e girdi’.” (1 Pet. 4:8, 10) Ere nge bagadad u lan e ulung me pi e athamgil nga laniyan’ bagadad. Ya ke yog Peter nra bagadad ma tow’ath rok ni ke pi Jehovah ni nge maruwel ngay nge ayuweg boch e girdi’. Ere mang e re tow’ath nem ma uw rogon ni ngad maruwel gad ngay nge “yib fan ngak boch e girdi’”?
6. Mang boch e tow’ath ni kan pi’ ko pi Kristiano nib milfan ngorad ni ngar maruwelgad ngay?
6 Thin Rok Got e be gaar: “Urngin e tin nib fel’ ni be pi’ Got ngodad nge urngin e tow’ath nrib manigil ma be yib u tharmiy ngodad.” (Jas. 1:17) Gubin e tow’ath ni ke pi Jehovah ko pi tapigpig rok e be dag ni ir ba Got nib gol. Reb e pi tow’ath ney e aram gelngin nib thothup. Re tow’ath nem e ma ayuwegdad ngad daged fel’ngin Got ni bod e t’ufeg, fel’ ngak e girdi’ nge sobut’an’. Pi fel’ngin ney e ma k’aringdad ni ngaud lemniged pi walagdad mu ud ayuweged yad. Bin riyul’ e gonop nge tamilangan’ e kub muun ko tow’ath ni ma yog ngodad ni bochan gelngin Got. (1 Kor. 2:10-16; Gal. 5:22, 23) Gelngidad nge salap rodad e ku boch e tow’ath ni kan pi ngodad nrayog ni ngad maruwelgad ngay ni fan e ngan pining e sorok ngak Jehovah. Ere ba milfan ngodad ni ngad maruwelgad ko pi n’ey nge yib fan ngak e piin taareb e michan’ rodad.
Uw Rogon ni Ngan “Maruwel Ngay”?
7. (a) Mang fan fare thin ni yog Peter ‘nra be’ ma tow’ath rok’? (b) Mang deer e ra bagadad ma nge fith ir riy, ma mang fan?
7 Ki yog Peter murung’agen e pi tow’ath ney ni gaar: “Ra be’ ma tow’ath rok ni ke pi’ Got ngak ni nge gagiyegnag e thingari maruwel ngay.” Fare thin ni yog Peter ‘nra be’ ma tow’ath rok’ e be yip’ fan nib thilthil rarogon e tow’ath ni kan pi ngodad. Ere yugu demtrug e re tow’ath ni kan pi ngak bagadad ma nge “maruwel ngay nge yib fan ngak boch e girdi’” ya aram ban’en nthingar da rin’ed. Ere nge bagadad me fith ir: ‘Gu ma fanay e tow’ath ni ke pi’ Jehovah ngog ni nggu ayuweg e piin taareb e michan’ romad fa gu ma fanay ni kemus ni gag e nge yib fan ngog?’ (1 Kor. 4:7; mu taarebnag ko 1 Timothy 5:9, 10.) Gad ra felan’nag Jehovah ni faan gad ra maruwel ko tow’ath rodad “nge yib fan ngak boch e girdi’.”—Prov. 19:17; mu beeg e Hebrews 13:16.
8, 9. (a) Mog boch e kanawo’ ni ma pi’ boch e Kristiano e ayuw riy ngak e piin taareb e michan’ rorad. (b) Walag u lan e ulung rom e uw rogon ni yad ma ayuweged yad?
8 Be yog e Thin Rok Got ni tin som’on e Kristiano e ba thilthil rogon ni ur ayuweged yad ko tow’ath ni kan pi’ ngorad. (Mu beeg e Roma 15:25, 26; 2 Timothy 1:16-18.) Ere ku aray e n’en ni be rin’ e tin riyul’ e Kristiano e ngiyal’ ney. Baaray boch e kanawo’ ni yad ma rin’ e re n’ey riy.
9 Boor e walag e yad ma tay boor e tayim u gubin e pul ni ngar fal’eged rogon e welthin rorad. Nap’an ni yad ra weliy boch ban’en nrib manigil ni kar pirieged u nap’an ni yad be fol Bible ma ri ma pi’ e athamgil nga laniyan’ e girdi’ u lan e ulung. (1 Tim. 5:17) Boor e walag ni yi manangrad ni bochan e t’ufeg rorad ko girdi’ u lan e ulung. (Rom. 12:15) Boch i yad e ma yan i guy e piin ni ke mochuch ngar meybilgad u taabang mi yad pi e athamgil nga lanin’rad. (1 Thess. 5:14) Ma boch i yad e ma yol ngak boch e Kristiano ni keb e skeng ngorad, ngar pied e athamgil nga lanin’rad ngar gelgad ko pi skeng ni yad be yan u fithik’. Maku boch i yad e ma ayuweg e piin nib m’ar nge yog ni ngar uned ko muulung. Ma nap’an nra yib e gafgow nga bang nib gel ma bokum biyu’ e Pi Mich ni yad ma pi’ e ayuw ngak pi walagrad ko fare gin’em ni keb e gafgow ngay. T’ufeg nge ayuw ni ma pi’ e pi walag ney e gubin ni ma m’ug riy fene ba gol Got nge fene ba thilthil e “tow’ath” ni ke pi ngodad.—Mu beeg e 1 Peter 4:11.
Bin Ngan e Ba Ga’ Fan?
10. (a) Mang e gali n’en ni manang Paul nib ga’ fan ko pigpig rok ku Jehovah? (b) Uw rogon ni ngad folwokgad rok Paul?
10 Gathi kemus ni kan pi’ e tow’ath ngak e pi tapigpig rok Got ni ngar maruwelgad ngay ni fan ko piin taareb e michan’ rorad ya kun pi’ fare thin nib fel’ ni ngar wereged ngak e girdi’. Manang apostal Paul nib ga’ fan e gali n’ey ko pigpig rok ngak Jehovah. Ere yol ko ulung nu Efesus u murung’agen ni ke ‘runguy Got ke pi’ e re gaf i maruwel nem ngak ni nge maruweliy ni fan ngorad.’ (Efe. 3:2) Miki yog ni gaar: “Gubin ngiyal’ ni ug welthingad nrogon ni baadag Got ni nggu welthingad, ya ke pagan’ ngomad ma ke pag fan e thin rok ngomad.” (1 Thess. 2:4) Ere ku arrogodad ni gad manang nib milfan ngodad ni ngad machibniged murung’agen Gil’ilungun Got ni bod ni i rin’ Paul. Faan gad ra pasig ko machib ma aram e gad be folwok ku Paul ni ir reb e tamachib nib pasig. (Acts 20:20, 21; 1 Kor. 11:1) Gad manang ni fare thin nib fel’ ni gad be machibnag e ra ayuweg e yafas ko girdi’. Machane kub t’uf ni ngad guyed rogon ngad weliyed e “thin rok Got” ngak e piin taareb e michan’ rodad nge yog nda gelniged yad ko tirok Got ban’en.—Mu beeg e Roma 1:11, 12; 10:13-15.
11. Uw rogon ni ngad lemniged e maruwel rodad ni machib nge ngad pied e athamgil nga laniyan’ pi walagdad?
11 Ere bin ngan ko gali n’ey e ba ga’ fan? Am lemnag e arche’: Ba’ ni ngan i pon e ba ga’ fan? Ba mom ni ngan nang e fulweg riy. Faanra nge changeg ma ba t’uf l’agruw raba’ i pon. Ere ku taareb rogon ngodad nib t’uf ni ngad rin’ed fagali n’en nib ga fan ko pigpig rodad ngak Jehovah. Ere dab da lemniged ni maruwel rodad ni machib nge ngad pied e athamgil nga laniyan’ pi walagdad e l’agruw i ban’en nib thil ya ngad sapgad ngay ni l’agruw nib ga’ fan ni bod ni rin’ apostal Peter nge Paul. Uw rogon nib ga’ fan?
12. Uw rogon ni be fanaydad Jehovah?
12 Gad ma fanay e salap rodad ni ngad gayed rogon ni nge taw fare thin nib fel’ u murung’agen Gil’ilungun Got ni gad be machibnag nga gum’irchaen e girdi’. Gad be rin’ ni bochan e gad baadag ni ngad ayuweged yad ngar manged boch i gachalpen Jesus. Machane, ku gad ma fanay e pi salap ney u daken e thin nge ngongol rodad ni ngad pied e athamgil nga laniyan’ pi walagdad. Gubin e pi n’ey e be m’ug riy fene ba gol Got. (Prov. 3:27; 12:25) Faanra da rin’ed ni aram rogon ma aram e gad be ayuweged yad ni ngar pired ni yad pi gachalpen Jesus nib mudugil. Gad ba tow’ath ni be fanaydad Jehovah ni ngad machibniged e girdi’ ma gad be pi e athamgil nga laniyan’ pi walagdad.—Gal. 6:10.
“Nge Bigimed me T’uf Bigimed Rok”
13. Mang e ra buch ni faanra dab kud maruwelgad ko tow’ath rodad “nge yib fan ngak boch e girdi’”?
13 I yog Paul ngak e piin ni taareb e michan’ rorad ni gaar: “Nge bigimed me t’uf bigimed rok nrogon e walag ni girdien Kristus, ma nge pasigan’med ngay ni nge bigimed mi i ta’ fan bigimed.” (Rom. 12:10) Faanra i t’uf pi walagdad rodad ma aram e rayog ni ngad pigpiggad u polo’ i gum’irchadad ma gad maruwel ko tow’ath rodad ni ke pi Got ngodad u fithik’ e gol. Gad manang ni faanra talegdad Satan ndab kud maruwelgad ko tow’ath rodad “nge yib fan ngak boch e girdi’” ma aram e dab ki taareban’dad. (Kol. 3:14) Faanra dar taareban’uy u lan e ulung ma dabiyog ni ngan pasig ko machib. Manang Satan ni kari mus ni taareb ko gali n’em nib ga fan ko pigpig rodad e ra magawonnag ma dabkiyog ni ngad rin’ed e n’en nib milfan ngodad.
14. Mang angin nra yib ngodad ni faan gad ra maruwel ko tow’ath rodad “nge yib fan ngak boch e girdi’”? Mu weliy reb e n’en ni ke buch.
14 Faan gad ra maruwel ko tow’ath rodad “nge yib fan ngak boch e girdi’” ma gathi kemus ni yad e be gol Got ngorad ya ku arrogodad. (Prov. 11:25) Mu lemnag e n’en ni rin’ Ryan nga Roni nib wu’ i mabgol u bang u Meriken ni ka nog yu Illinois ngay. Nap’an nra nangew ni bay ba yoko’ ni ke aw nga Louisiana ni boor e naun ko Pi Mich Rok Jehovah ni ke kirebnag ma aram mar talgow ko maruwel rorow ngar milekaggow ko gin’em nib palog ni ngar piew e ayuw ngorad. Ra pirew u rom nib pag reb e duw ni yow be fanay e tin ni bay rorow ni ngar ayuwegew e pi walag u rom. Ryan ni 29 e duw rok e gaar: “Ka rug chugur ku Got ni bochan e re maruwel ney. Kug guy rogon ni ma ayuweg Jehovah e girdi’ rok. Maruwel ni kug ted boch e walag nib ilal ngog u taabang e gu nang riy rogon ni nggu ayuweg e pi walag nem. Kug fil ni gamad e piin ni kab fel’ yangarmad e boor ban’en nrayog ni nggu rin’ed u lan e ulung rok Jehovah.” Roni ni 25 e duw rok e gaar: “Kug felfelan’ ngay ni ke yog ni nggu ayuweg boch e girdi’. Dawor gu felfelan’ ni aray gelngin u nap’an e yafas rog. Gu manang ni n’en ni kug rin’ e ra yib angin ngog e chiney i yan ngaram.”
15. Mang fan nrib ga’ fan ni ngad ululgad ngad maruwelgad ko tow’ath ni ke pi’ Got ngodad u fithik’ e gol?
15 Boor e tow’ath nra yib ngodad ni faan gad ra fol ko motochiyel rok Got ni ngad machibniged fare thin nib fel’ ma gad be pi’ e athamgil nga laniyan’ pi walagdad. Piin gad ra ayuweg e rayog ni ngar ululgad ko pigpig ngak Jehovah me yibnag e felfelan’ ngodad ni fare felfelan’ ni ma yib ngak e piin ni ma pi’ ban’en ngak be’. (Acts 20:35) Faanra bagadad u lan e ulung mi i lemnag bagadad ma ra i gel e t’ufeg ko girdi’ u lan e ulung rodad. Ma faanra ud t’ufeged gadad ma yira nang ni gadad e tin riyul’ e Kristiano, ya yog Jesus ni gaar: “Faanra um pired nib t’uf bigimed rok bigimed, ma aram e urngin e girdi’ ni yad ra nang ni gimed pi gachalpeg.” (John 13:35) Faanra i m’ug u daken e pi tapigpig rok Jehovah ni baadag Jehovah ni nge ayuweg e piin nib t’uf e ayuw rorad, ma yira pining e sorok ngak. Rib ga’ fan ni ngad maruwelgad ko tow’ath ni ke pi’ Got ngodad u fithik’ e gol “nge yib fan ngak boch e girdi’”! Ere, ga ra ulul ni ngam rin’ e re n’ey, fa?—Mu beeg e Hebrews 6:10.
Ka Ga Manang?
• Mang kanawo’ e ma pi’ Jehovah gelngin e pi tapigpig rok riy?
• Mang e ba milfan ngodad ni ngad rin’ed?
• Mang boch e kanawo’ ni ngad pied e ayuw riy ngak e piin taareb e michan’ rodad?
• Mang e ra k’aringdad ni ngad maruwelgad ko tow’ath rodad “nge yib fan ngak boch e girdi’”?
[Pictures on page 17]
Ga ma fanay e “tow’ath” ni ke pi’ Jehovah ngom ni ngam ayuweg e piin taareb e michan’ romed, fa ga ma fanay ni kemus ni gur e nge yib fan ngom?
[Pictures on page 19]
Gad ma machibnag fare thin nib fel’ ngak e girdi’ ma gad be ayuweg e pi walagdad ni Kristiano
[Picture on page 20]
Ngad pininged e magar ko piin ni yad be ayuweg boch e walag ni keb e gafgow ngorad