Ngad Mon’oggad ko Machib—Ngan Skulnag e Piin ni Gad Ma Fil e Bible Ngorad ni Ngar Nanged Rogon ni Ngaur Filed e Bible Rorad ni Gubin Ngiyal’

Fan nib Ga’ Fan: Ra nge mon’og e piin ni yibe fil e Bible ngorad ko tirok Got ban’en mab t’uf ni ngki yoor ban’en ko Thin rok Got ni ngkur filed. (Heb. 5:12–6:1) Ba t’uf ni ngan athamgil ngaun fil e Bible. Re n’ey e ba muun ngay ni ngam puthuy e pi n’en ni kam fil ko pi n’en ni ga manang ma aram mag gay rogon ni ngam maruwel ngay u lan e yafos rom. (Prov. 2:1-6) Yira fil rogon ni ngan fal’eg i gay murung’agen boch ban’en nib l’ag rogon ko Bible ma ra ayuweg e piin ni yibe fil e Bible ngorad ni ngar pirieged e fulweg ko pi deer u Bible ni yad be fanay e pi babyor ko ulung. Yad ra athamgil ni ngar rin’ed e tin ni yad be fil ma rayog ni nge ayuwegrad u nap’an ni yad ra mada’nag boch e skeng ni ma mada’nag e piin Kristiano.—Luke 6:47, 48.

Rogon ni Ngan Rin’:

Mu tamilangnag ngak feni rib ga’ fan ni nge ning e ayuw rok Jehovah u daken e meybil u m’on ni nge tababnag e fol Bible.—John 14:26; 1 Kor. 2:10.
U m’on ni ngam tababgow ko fol Bible mag pi’ e athamgil nga laniyan’ ni nge fal’eg rogon u m’on riy. Mu dag ngak e birom e babyor, mag fil ngak rogon ni nge tay e line nga tan fa yu bugithin nib ga’ fan.
Mu ayuweg ni nge pi’ e fulweg ko fapi deer nni thin rok. Mu guy rogon ni gathi kemus ni nga i beeg e fulweg ko deer ni bay u lan e paragraph.
Mu pi’ e athamgil ngak ni nga i beeg bang ko Thin rok Got ni gubin e rran. Mag dag ngak fare Bible reading schedule ni bay ko jw.org ya nge yag ni nge nang rogon ni nga i beeg e Bible rok. Ra ngan beeg Bible ni gubin e rran ma ban’en ni thingar ni dugliy u wan’uy ni ngan rin’, machane yira rin’ ma ra yib angin.—Ps. 1:2, 3.
Mu dag ngak rogon nrayog ni nge pirieg e fulweg u boch e deer u Bible ni be fanay fare Watchtower Library ara Watchtower ONLINE LIBRARY. Mu ayuweg faen ni gimew be fil e Bible ni nge nang ko tin ngan e letra e be yip’ fan reb e babyor nge reb. Bod ni fare letra ni fg e be yip’ fan fare babyor ni Thin nib Fel’ ni Yib rok Got!

Mu Gay Rogon ni Ngam Rin’ e Re N’ey u Lan e Re Pul Ney:

U tomuren ni kam weliyew reb e subheading ara reb e guruy ma gog ngak ni nge weliy ko mang e ke fil riy. Faanra dariy be’ ni gimew be fil e Bible u taabang, mag beeg bang ko Bible rom ara bang ko fare Wulyang ko Damit ya nge yag ni ngam mon’og u rogon ni ga be nang fan e n’en ni kam beeg.