Mu Ayuweg e Bitir Rom ni Ngar Pared nib Gel e Michan’ Rorad ngak Faen ni Ke Sunmiy Urngin Ban’en

Pi n’en ni ke sunmiy Jehovah e be pining e sorok ngak. (Ps 19:1-4; 139:14) Machane, be fil e re fayleng rok Satan ney ngak e girdi’ boch e machib nde puluw u rogon ni sum e yafos, ma pi machib ney e be darifannag Got. (Ro 1:18-25) Ere uw rogon ni ga ra ayuweg pi fakam ni nge dabi mich e pi machib ney u wan’rad? Rayog ni ngam tabab i fil ngorad u nap’an ni ka yad ba bitir ni bay Jehovah ni ir e bin riyul’ e Got ni ma lemnagrad. (2Ko 10:4, 5; Efe 6:16) Mu guy rogon ni nge tamilang u wan’um e n’en ni be lemnag e bitir rom ni bay rogon ko pi n’en ni yibe fil ngak u skul, mag fanay e pi n’en ni ke ngongliy e ulung rok Jehovah ni ngam ayuweg ni nge taw e tin riyul’ nga gum’irchaen.​—Pr 20:5; Jas 1:19.

NGAN YALIY FARE VIDEO NI KENGGIN E WHAT YOUR PEERS SAY​—BELIEF IN GOD, NGEMU’ MIN WELIY E FULWEG KO PI DEER NI BAARAY:

• Mang reb e ban’en nde riyul’ u murung’agen Got nib ga’ nib mich u wan’ e girdi’?

• Mang e yima fil ngom u skul?

• Mang e mich riy nriyul’ ni bay Jehovah?

• Uw rogon ni ga ra ayuweg be’ ni nge mich u wan’ ni Got e ir e sunmiy urngin ban’en?