PI N’EN NI MA RIN’ E PIIN KRISTIANO

Mu Siyeg e Magawon ni Ma Yib u Rogon ni Yima Fanay e Pi N’en ni Bay ko Internet Nrayog ni Ngaud Nonad Boch e Girdi’ Riy

FAN NIB GA’ FAN: Pi n’en ni bay ko Internet nrayog ni ngaud nonad boch e girdi’ riy e bod rogon yugu boch e talin e maruwel ni gad ma fanay ni bochan e rayog ni nge ayuwegdad, maku rayog ni nge magawonnagdad. Boch e Kristiano e yad ma mel’eg ndab ra fanayed e pi n’ey. Ma boch e yad ma dugliy ni ngar fanayed e pi n’ey ni ngar nonad ngak girdien e tabinaw rorad nge pi fager rorad. Machane, baadag Moonyan’ ni ngad fanayed e pi n’ey u boch e kanawo’ nde puluw ni bochan e manang ni gad ra rin’ e re n’ey, ma rayog ni nge kireb thidad miki kireb e tha’ u thildad Jehovah. Rayog ni ngad folwokgad rok Jesus ni aram e ngad fanayed e kenggin e motochiyel u Bible ni nge ayuwegdad ngad nanged e pi n’en nra magawonnagdad ma gad siyeg.—Lu 4:4, 8, 12.

NGAD SIYEGED E PI N’EN NRA MAGAWONNAGDAD:

Ngam fanay e pi n’en ni bay ko Internet nrayog ni ngaud nonad boch e girdi’ riy nib pag rogon. Faan gad ra fanay boor e tayim ni fan ko pi n’ey, ma rayog ni nge magawonnagdad ko pigpig ni gad be tay ngak Jehovah

Kenggin e motochiyel u Bible: Ef 5:15, 16; Fil 1:10
Ngam yaliy boch ban’en nde puluw. Ra yaliy be’ yaan e puwlag, ma rayog ni nge mecham ngak me k’aring ni nge un ko ngongol ndarngal. Ma faanra beeg be’ boch ban’en ni bay ko Internet ni ke yoloy e piin ni kar chelgad yad be togopuluw ko tin riyul’, ma rayog ni nge warnag e michan’ rok

Kenggin e motochiyel u Bible: Mt 5:28; Fil 4:8
Ngam yoloy boch e thin ara ngam tay boch e sasing nde puluw. Bochan nib sasalap gum’ircha’dad, ma aram fan nrayog ni nge adag be’ ni nge yoloy boch e thin ara nge tay boch e sasing nde puluw ko pi n’en ni bay ko Internet nrayog ni ngaud nonad boch e girdi’ riy. Machane faanra nge rin’ ban’en ni aray rogon, ma aram e rayog ni nge kireb thin me war e michan’ rok

Kenggin e motochiyel u Bible: Ro 14:13; Ef 4:29

NGAN YALIY FARE VIDEO NI KENGGIN E BE SOCIAL-NETWORK SMART, NGEMU’ MIN SUL U DAKEN ROGON NRAYOG NI NGAD SIYEGED E PI N’EN NI BAARAY NGA BUT’ NRAYOG NI NGE BUCH RODAD: