Rogon ni Ngan Pi’ e Ayuw u Tomuren ni Ke Buch Ban’en ni Kan Gafgow Riy

Ngiyal’ ney e be yoor e yoko’ nge durru’ nge boch ban’en ni be buch ni yima gafgow riy. Nap’an nra buch reb e pi n’ey, mab t’uf ni ngan pi’ e ayuw u reb e kanawo’ nib yaram mab fel’ rogon. Ere aram fan ni ke yarmiy fare Ulung ni Ma Pow’iyey nra reb e branch ofis ma bay reb e Disaster Relief Department riy.

Nap’an nra nang e pi walag ni pumoon ni yad ma maruwel ko re department ney ni ke aw e yoko’ ara durru’ ara ke buch ban’en ni kan gafgow riy u bang, ma ka chingiyal’ nem mi yad non ko piin piilal ko re gin’em ni ngar nanged e n’en nib t’uf ko pi walag. Faanra boor ban’en ni ke kireb ndabiyog ko pi walag ko gin’em ni ngar fal’eged ni yigoo yad, ma aram e ra yarmiy e branch ni nge yan boch e walag ni pumoon ni ngar pied e ayuw. Rayog ni nge yog e pi walag ney ngak yugu boch e walag ni ngar pied e ayuw, ara ngar pied boch ban’en nib t’uf ko pi walag, ara ranod ra chuw’iyed boch ban’en nib t’uf ko pi walag ngar pied ngorad.

Boor angin nra yib ko re n’ey. Ya ra ayuwegey ni nge dabin n’ag e tayim nga boch e maruwel ndariy rogon ni ngan rin’, min k’aring e girdi’ ni nge balyangan’rad ko mang e ngan rin’, min adbey e salpiy nge boch e chugum. Pi n’ey e rayog ni nge buch ni faanra guy e pi walag rogon ni ngar rin’ed boch ban’en ni yad rorad.

Pi walag ni pumoon ni ke dugliy e branch e rayog ni ngar dugliyed urngin e salpiy nib t’uf ni ngan fanay nge urngin e walag nib t’uf ni ngar pied e ayuw. Ku rayog ni ngar guyed rogon ni ngar nanged boch i girdien e am nrayog ni ngar pied e ayuw ya nge yag nrin’ e maruwel nib papey. Ere susun e dabi kunuy be’ e salpiy ni ngan pi’ ni ayuw, ara pi’ boch e chugum, ara milekag ko gin ke buch ban’en riy ni kan gafgow riy ni faanra dawor nog ngak ni nge rin’.

Nap’an nra buch ban’en ni kan gafgow riy, ma gad baadag ni ngad pied e ayuw. (Heb 13:16) Ba t’uf pi walagdad rodad! Ere mang e rayog ni ngad rin’ed? Bin th’abi ga’ fan riy e rayog ni ngad yibilayed e piin kar gafgowgad nge piin yad be pi’ e ayuw. Ku rayog ni ngad pied e salpiy ni ayuw ni fan ko fare maruwel ni yibe rin’ u ga’ngin yang e fayleng. Bochan ni be fol e branch ofis u rogon ni be pow’iyrad fare Ulung ni Ma Pow’iyey, ma aram fan ni yad manang e bin th’abi fel’ e kanawo’ ni ngan fanay e pi salpiy ney riy. Ma faanra gad baadag ni ngad pied e ayuw, ma rayog ni ngad ngongliyed bang fare babyor ni Local Design/Construction Volunteer Application (DC-50).

NGAN YALIY FARE VIDEO NI DEVASTATING FLOODING IN BRAZIL, NGEMU’ MIN PI’ E FULWEG KO RE DEER NEY:

Mang e ga baadag u rogon e ayuw ni pi’ e Pi Mich Rok Jehovah ngak e pi walag u tomuren ni tharey e ran daken e binaw u Brazil ko duw ni 2020?