“Nggog ni Gimed e Tafager Rog”

1. Uw rogon ni nge chugur e tha’ u thilmew be’?

BA GA’ ni n’en nsom’on ni ngam rin’ me yag ni nge chugur e tha’ u thilmew be’ e aram e ngam rin’ew boch ban’en u taabang. Nap’an ni gimew ra weliy e pi n’en bay u lanin’mew nge tin ke buch romew, ma aram e rayog ni ngam mangew fager. Machane bay yu ngiyal’ nib mo’maw’ ni ngad manged fager rok Jesus. Mang fan?

2. Mang e bin som’on i fan nib mo’maw’ ni ngad manged fager rok Jesus?

² Bin som’on i fan nib mo’maw’ ni ngad manged fager rok Jesus e bochan ndawor da mada’gad Jesus. Boor e Kristiano ko bin som’on e chibog ni ku ireray e magawon rorad. Machane me gaar apostal Peter ngorad: “Ba t’uf romed, ni yugu ara’ rogon ndamur guyed; ma mmich u wun’med, ni yugu ara’ rogon ndamur guyed e chiney.” (1 Pet. 1:8) Ere rayog ni ngad manged fager rok Jesus ni yugu aram rogon ndawor da mada’gad.

3. Mang e bin l’agruw i fan nib mo’maw’ ni ngad manged fager rok Jesus?

³ Bin l’agruw i fan nib mo’maw’ ni ngad manged fager rok Jesus e bochan dabiyog ni ngad nonad ngak. Nap’an ni gad ra meybil ma Jehovah e ir e gad ma non ngak. Riyul’ ni gad ma meybil u daken fithingan Jesus, machane gathi ir e gad ma non ngak. Bin riyul’ riy e, dabun Jesus ni ngad meybilgad ngak. Mang fan? Bochan ni meybil e aram bang ko liyor ni gad ma tay, ma susun e yigoo Jehovah e ngan liyor ngak. (Matt. 4:10) Machane yugu aram rogon, ma rayog ni ngad daged nib t’uf Jesus rodad.

4. Mang e bin dalip i fan nib mo’maw’ ni ngad manged fager rok Jesus, ma mang e gad ra weliy ko re article ney?

⁴ Bin dalip i fan nib mo’maw’ ni ngad manged fager rok Jesus e bochan ni ma par Jesus u tharmiy, ere dabiyog ni ngad rin’ed boch ban’en u taabang. Machane ka rayog ni ngad filed boor ban’en u murung’agen ni yugu aram rogon ndad moyed ko gin bay riy. Gad ra weliy aningeg ban’en nrayog ni ngad rin’ed nra chugurnag e tha’ u thildad Jesus. Machane som’on e ngad guyed fan nib t’uf ni ngad manged fager rok Kristus nrib chugur thildad.

MANG FAN NIB T’UF NI NGAD MANGED FAGER ROK JESUS?

5. Mang fan nib t’uf ni ngad manged fager rok Jesus? (Kum guy fa gal kahol ni kenggin e “Faan Gad Ra Mang Fager rok Jesus Maku Rayog ni Ngad Manged Fager rok Jehovah” nge “Nge Puluw Rogon ni Ngaum Lemnag Jesus.”)

⁵ Ra nge fel’ e tha’ u thildad Jehovah, mab t’uf ni ngad manged fager rok Jesus. Mang fan? Am lemnag l’agruw i fan. Bin som’on e yog Jesus ngak pi gachalpen ni gaar: “En ni Chitamangiy e gimed ba t’uf rok. Gimed ba t’uf rok ni bochan e gub t’uf romed.” (John 16:27) Ki ulul ngay ni gaar: “Dariy be’ nrayog ni nge yan ngak e en ni Chitamangiy ya ke mus ni gag e ra yan rog ngak.” (John 14:6) Ra ngad guyed rogon ni ngad manged fager rok Jehovah ndab da manged fager rok Jesus, ma bod ni gad be guy rogon ni ngad thapgad nga lan reb e naun ndab darod u langan e mab. Ki fanay Jesus ba fanathin nib chugur fan ko biney u nap’an ni yog ni ir “fare mab ni fan ngak e saf.” (John 10:7) Bin l’agruw i fan e bochan ni Jesus e rib fel’ rogon ni m’ug fel’ngin e Chitamangin rok. I yog ngak pi gachalpen ni gaar: “Cha’ ni ke guyeg e ke guy e en ni Chitamangiy.” (John 14:9) Ere reb e kanawo’ nib ga’ fan ni gad ra nang boch ban’en u murung’agen Jehovah riy e aram e ngad filed murung’agen e pi n’en ni i rin’ Jesus. Ra yoor ban’en nda filed u murung’agen Jesus, ma aram e ra gel e t’ufeg rodad ngak. Maku reb e faanra chugur e tha’ u thildad Jesus, ma aram e ra gel e t’ufeg rodad ngak e Chitamangin.

6. Ku mang reb i fan nib t’uf ni ngad manged fager rok Jesus? Mu tamilangnag.

⁶ Ra ngan fulweg taban e meybil rodad, mab t’uf ni ngad manged fager rok Jesus. Re n’ey e be yip’ fan ni ka bay boch ban’en nib t’uf ni ngad rin’ed ko bin ni kemus ni nge taw nga tungun e meybil rodad ma gad yog fapi thin ni “u daken fithingan Jesus.” Ba t’uf ni ngad nanged rogon ni ma fanay Jehovah Jesus u nap’an ni be fulweg taban e meybil rodad. I gaar Jesus ngak e pi apostal: “Gu ra rin’ e pi n’en ni gimed ra ning nga fithingag.” (John 14:13) Yugu aram rogon ni Jehovah e ir e ma motoyil maku ma fulweg taban e meybil rodad, machane ke pi’ mat’awun Jesus ni nge rin’ urngin e tin ke dugliy. (Matt. 28:18) Ere u m’on ni nge n’ag fan e denen rodad, ma ma guy ko kad folgad ko fare fonow ni pi’ Jesus fa danga’. Bod ni gaar Jesus: “Faanra mu n’iged fan u wun’med e kireb ni ke rin’ boch e girdi’ ngomed, ma ku er rogon e Chitamangimed nu tharmiy nra n’ag fan u wan’ e kireb ni kam rin’ed. Machane faanra dab mu n’iged fan u wun’med e kireb ni ke rin’ boch e girdi’ ngomed, ma ku er rogon e Chitamangimed nu tharmiy ndabiyog ni nge n’ag fan u wan’ e kireb ni kam rin’ed.” (Matt. 6:14, 15) Aram fan nib t’uf ni ngad daged e ngongol ko girdi’ ni bod rogon e ngongol ni ma dag Jehovah nge Jesus ngodad!

7. Mini’ e piin nra yib angin fare biyul ni maligach ngorad?

⁷ Kemus ni yigoo piin yad ra mang fager rok Jesus nib chugur thilrad e ra yib angin fare biyul ni maligach ngorad. Uw rogon ni kad nanged e re n’ey? I yog Jesus nra “pi’ e pogofan rok ni fan” ko pi fager rok. (John 15:13) Pi tapigpig rok Jehovah ni yad ba yul’yul’ ni ur moyed u m’on ni nge yib Jesus nga fayleng e ku yad ra fil murung’agen miki t’uf rorad. Boch e pumoon nge ppin ni bod Abraham, nge Sarah, nge Moses, nge Rahab ni yira fasegrad ko yam’ e yugu aram rogon ni yad boch e tapigpig rok Jehovah, machane kab t’uf ni ngar manged boch e fager rok Jesus ni faanra nge yag e yafos ni manemus ngorad.​—John 17:3; Acts 24:15; Heb. 11:8-12, 24-26, 31.

8-9. Faanra gadad boch e fager rok Jesus, ma mang boch ban’en nrayog ni ngad rin’ed nrogon ni bay ko John 15:4, 5? Mang nib ga’ fan e re n’ey?

⁸ Gad ma felfelan’ ni gad ma maruwel Jesus u taabang ni gad be machibnag ma gad be fil fare thin nib fel’ ni murung’agen Gil’ilungun Got ko girdi’. Nap’an ni immoy Jesus u fayleng ma ir reb e tamachib. Ma ka nap’an e ngiyal’ ni sul nga tharmiy ke mada’ ko chiney, ma ke par ni ir lolugen e ulung ni be pow’iy fare maruwel ni ngan machibnag e girdi’ ma yibe fil e tin riyul’ ngorad. Be guy rogon e athamgil ni ga be tay ni ngam ayuweg urngin e girdi’ nrayog rom ni ngar nanged murung’agrow e Chitamangin, ma kub ga’ fan e re n’ey u wan’. Bin riyul’ riy e, taare kanawo’ nrayog ni ngad mu’naged e re maruwel ney riy e aram e nge ayuwegdad Jehovah nge Jesus.​—Mu beeg e John 15:4, 5.

⁹ Be tamilangnag e Thin rok Got ngodad ni faanra ngad fel’gad u wan’ Jehovah ma thingari par nib t’uf Jesus rodad. Ere chiney e ngad weliyed aningeg ban’en nrayog ni ngad rin’ed ya nge yag nda manged fager rok Jesus.

ROGON NI NGAD MANGED FAGER ROK JESUS

10. Mang e n’en nsom’on nib t’uf ni ngad rin’ed ni faanra ngad manged fager rok Jesus?

¹⁰ (1) Ngam nang rarogon Jesus. Rayog ni ngad rin’ed e re n’ey ni aram e ngad beeged fapi babyor rok Matthew, Mark, Luke, nge John ni bay u lan e Bible. Nap’an ni gad ra fal’eg i lemnag boch e thin nu Bible ni be weliy murung’agen e pi n’en ni i rin’ Jesus, ma aram e rayog ni nge t’uf rodad ma gad tayfan ni bochan rogon e ngongol ni i dag ko girdi’ u fithik’ e sumunguy. Bod ni yugu aram rogon ni ir e Masta rok pi gachalpen, machane da i ngongol ngorad ni gowa yad boch e sib. Ya i weliy ngorad e pi n’en be lemnag nge tin bay u gum’irchaen. (John 15:15) Nap’an ni kireban’ pi gachalpen, maku arrogon ir ni ki kireban’ miki un ngorad ko meyor. (John 11:32-36) Mus ko pi toogor rok ni kur guyed ni ke mang fager rok e piin ni m’agan’rad ko thin ni i machibnag. (Matt. 11:19) Ere faan gad ra folwok rok Jesus u rogon e ngongol ni i dag ngak pi gachalpen, ma aram e rayog ni nge mon’og e tha’ u thildad yugu boch e girdi’, me fel’ u wan’dad e tin bay rodad, me gel boch e felfelan’ rodad, miki gel boch e t’ufeg nge tayfan rodad ngak Kristus.

11. Mang e bin migid nib t’uf ni ngad rin’ed ni faanra ngad manged fager rok Jesus, ma mang nib ga’ fan e re n’ey?

¹¹ (2) Ngam lem mag ngongol ni bod Jesus. Ra yoor ban’en nda nanged u murung’agen rogon ni ma lem Jesus ma gad folwok riy, ma aram e rayog ni ngari chugur e tha’ u thildad. (1 Kor. 2:16) Uw rogon ni ngad folwokgad rok Jesus? Am lemnag reb e ban’en nrayog ni ngad rin’ed. Jesus e ma lemnag rogon nrayog ni nge ayuweg yugu boch e girdi’ ko bin nge lemnag rogon ni nge rin’ e tin baadag. (Matt. 20:28; Rom. 15:1-3) Bochan ni aray rogon e lem rok, ma aram fan ni ir be’ ni ma pag fan u boch ban’en, maku ma n’ag fan e kireb ni yima rin’ ngak. Gathi ba papey ni ma aw nga laniyan’ e pi n’en ni i weliy e girdi’ u murung’agen. (John 1:46, 47) Ku der ma pag e oloboch ni ke rin’ be’ kafram ni nge thilyeg rarogon facha’ u wan’. (1 Tim. 1:12-14) I gaar Jesus: “Faanra um pired nib t’uf bigimed rok bigimed, ma aram e urngin e girdi’ ni yad ra nang ni gimed pi gachalpeg.” (John 13:35) Ere ba fel’ ni ngam fithem ni nge lungum, “Gu be folwok ko n’en ni i rin’ Jesus ni aram e gu be rin’ urngin ban’en nrayog rog ya nge yag ni par ni bay e gapas u thilmad e pi walag, fa?”

12. Mang e bin dalip e n’en nib t’uf ni ngad rin’ed ni faanra ngad manged fager rok Jesus, ma uw rogon ni ngad rin’ed e re n’ey?

¹² (3) Ngam ayuweg pi walagen Kristus. Ma tay Jesus ni pi n’en gad ma rin’ ni fan ngak pi walagen ni kan dugliyrad e bod ni ir e gad be rin’ ni fan ngak. (Matt. 25:34-40) Bin th’abi ga’ fan e kanawo’ ni gad ma ayuweg e piin kan dugliyrad riy e aram e gad ma un ngorad i rin’ fare maruwel ni tay Jesus chilen ngodad ni ngad rin’ed ni aram e ngad machibgad ma gad be fil e tin riyul’ ko girdi’ u rogon nrayog rodad. (Matt. 28:19, 20; Acts 10:42) Kemus nu daken e ayuw ni be pi’ “yugu boch e saf” e rayog ni ngan mu’nag fare maruwel ni machib riy ni yibe rin’ u ga’ngin yang e fayleng e ngiyal’ ney. (John 10:16) Faanra gab muun nga yugu boch e saf ma urngin yay ni ga ra un i rin’ e re maruwel ney, ma aram e gathi kemus ni ga be dag nib t’uf rom e piin kan dugliyrad ya ka ga be dag nib t’uf Jesus rom.

13. Uw rogon ni ngad folgad ko fare fonow rok Jesus ni bay ko Luke 16:9?

¹³ Ku rayog ni ngad manged fager rok Jehovah nge Jesus ni aram e ngad pied boch e salpiy ni ayuw ni fan ko fare maruwel ni yow be pow’iy. (Mu beeg e Luke 16:9.) Bod nrayog ni ngad pied e salpiy ni ayuw ni fan ko fare maruwel ni machib ni yibe rin’ u ga’ngin yang e fayleng. Pi salpiy ney e rayog ni nge pi’ e ayuw ni ngan machibnag fare thin nib fel’ u boch e binaw nib palog, min toy boch e Tagil’ e Liyor rodad ara ku boch e naun ni fan ko liyor rodad ma yibe fal’eg e yungin ke kireb riy, maku yibe ayuweg e piin ke gafgow ni bochan e yoko’ ara durru’ ara yugu boch ban’en ni ma yib ni yima gafgow riy. Ku rayog ni ngad pied e salpiy ni ayuw ni fan ko ulung rodad nge piin gad manang nib t’uf e ayuw rorad. (Prov. 19:17) Ireray boch e kanawo’ nrayog ni ngad ayuweged pi walagen Kristus riy.

14. Mang e bin aningeg e n’en nib t’uf ni ngad rin’ed ni faanra ngad manged fager rok Jesus nrogon ni bay ko Efesus 4:15, 16?

¹⁴ (4) Ngam fol ko yaram ko ulung rok Jehovah. Ra chugur e tha’ u thildad Jesus ni ir lolugen e ulung ni faan gad ra fol ko piin ke tay ni ngar ayuweged gadad. (Mu beeg e Efesus 4:15, 16.) Bod ni chiney e gad be guy rogon ni ngan fanay e pi Tagil’ e Liyor rodad nib fel’ rogon. Ere aram fan ni yibe puthuy boch e ulung nga taabang, ma yibe thilyeg ga’ngin e gin be machib reb e ulung riy nge reb. Bochan e re yaram ney ma ke yag ni ngan ayuweg boor e salpiy ni be pi’ e girdi’ ni ayuw ko ulung rok Jehovah. Machane bay boch e walag nib t’uf ni ngar thilyeged rogon e par rorad ni nge m’ag ko pi n’en ni kan thilyeg. Pi walag ney ni yad ba yul’yul’ e rayog ni ke yoor e duw ni kar pigpiggad u reb e ulung ma kari chugur e tha’ u thilrad e pi walag ko re ulung nem. Machane chiney e ka nog ngorad ni nga ranod nga yugu reb e ulung nib thil. Rib felfelan’ Jesus ngay ni be guy pi gachalpen ni yad ba yul’yul’ ni yad be fol ko re yaram ney!

PIIN YAD RA MANG FAGER ROK JESUS NI MANEMUS

15. Uw rogon nra gel e chugur ko tha’ u thildad Jesus boch nga m’on?

¹⁵ Piin kan dugliyrad nga gelngin Got nib thothup e bay e athap rorad ni ngar pared rok Jesus ni manemus mar uned ngak ko gagiyeg u Gil’ilungun Got. Yad ra guy Kristus, mar nonad ngak, maku yad ra rin’ boch ban’en u taabang. (John 14:2, 3) Piin yad be athapeg e par u fayleng e ku ra dag Jesus e t’ufeg ngorad maku ra i ayuwegrad. Yugu aram rogon ndab ra guyed Jesus machane ra gel e chugur ko tha’ u thilrad, mi yad felfelan’ ko bin baaram e yafos nra pi’ Jehovah nge Jesus ngorad.​—Isa. 9:6, 7.

16. Mang boch e tow’ath nra yag ngodad u nap’an ni gad ra mang fager rok Jesus?

¹⁶ Boor e tow’ath nra yag ngodad u nap’an ni gad ra mang fager rok Jesus. Bod ni ngiyal’ ney e ma dag e t’ufeg ngodad maku be ayuwegdad. Ku bay e athap rodad nrayog ni ngad pared ni manemus. Ma bin th’abi ga’ fan riy e faan gad ra mang fager rok Jesus maku rayog ni ngad manged fager rok Jehovah ni Chitamangin. Ri gad ba tow’ath nrayog ni nga nog ni gadad boch e fager rok Jesus!