“Gag e Bay Gu Gayiy e Saf Rog”

1. Mang fan ni ke taarebrogonnag Jehovah ir ngak reb e matin ni ka be tathuthnag fak?

“GUR rayog rok be’ ni ppin ni nge pag talin fak ni kabran?” Ireray ba deer ni fith Jehovah u nap’an Isaiah ni profet. I yog Got ngak e girdi’ rok ni gaar: “Gomanga ra pag be’ ni ppin talin fak, machane gag e dab gu pag talimed.” (Isa. 49:15) Ba ga’ nder ma taarebrogonnag Jehovah ir ngak reb e matin, machane i rin’ e re n’ey e ngiyal’ nem. I weliy Jehovah murung’agen e tha’ u thilin reb e matin nge fak ni ngari tamilangnag rogon feni t’uf rok e pi tapigpig rok. Yooren e matin e taareb rogon e lem rorad ngak reb e walag nib pin ni ka nog Jasmin ngak ni yog ni gaar: “Nap’an ni ga ra tathuthnag fakam, ma bay ba tha’ ni ma sum u thilmew ni ma par u n’umngin nap’an e yafos romew.”

2. Nap’an nra tal reb e tapigpig rok Jehovah ko muulung nge machib, ma uw rogon e re n’ey u wan’?

² Nap’an nra tal reb e tapigpig rok Jehovah ko muulung nge machib, ma manang e re n’ey. Ere ba mudugil nrib gel e kireban’ ni ma tay ni be guy bokum biyu’ e pi tapigpig rok ni yad be tal ko muulung nge machibb u gubin e duw.

3. Mang e baadag Jehovah?

³ Boor ko pi walag ney e kar sulod bayay ko ulung rodad, ma ri gad ba felfelan’ ni kar rin’ed e re n’ey! Baadag Jehovah ni ngar sulod ko ulung maku arrogodad. (1 Pet. 2:25) Uw rogon ni ngad ayuweged e pi walag ney? U m’on ni ngad pied e fulweg ko pi deer ney, mab fel’ ni ngad nanged ko mang fan ni ke tal boch e walag ko muulung nge machib.

MANG FAN NI KE TAL BOCH E WALAG KO PIGPIG NGAK JEHOVAH?

4. Mang e ma buch rok boch e walag ni bochan e maruwel ni yad ma un ngay ni nge yag e salpiy ngorad?

⁴ Bay boch e walag ni kar paged e maruwel ni yad ma un ngay ni nge yag e salpiy riy ni nge m’on u wan’rad. Bay reb e walag ni pumoon ni ma par u Southeast Asia ni ka nog Hungc ngak ni yog ni gaar: “Ug fanay boor e tayim nge gelngig ni fan ko maruwel nug ma un ngay ni nge yag e salpiy riy. Gub balyang ya gu lemnag ni faanra yoor e salpiy rog, ma aram e rayog ni nggu pigpig ngak Jehovah nib fel’ rogon. Ere boor e awa ni ug maruwel riy, ma aram mug tabab ni ngaug pag e muulung nge mada’ ko ngiyal’ nrug tal nda ku ug un ko muulung. Ma fanay Satan e re fayleng ney ni nge chafeg laniyan’ e girdi’ nga orel rok Got, ya nge munmun mar talgad ko pigpig ni yad be tay ngak.”

5. Mang e rin’ reb e walag nib pin ni bochan e pi magawon ni i mada’nag?

⁵ Bay boch e walag ni boor e magawon ni yad be mada’nag ni be muleg lanin’rad. Bay reb e matin u Britain ni ka nog Anne ngak ni lal e bitir rok ni yog ni gaar: “Bay reb i fakag nug gargeleg nib m’ar ni boor ban’en ndabiyog ni nge rin’. Ma boch nga tomuren min tharbog reb e ppin ni fakag ko ulung, ma bin th’abi ilal e pagel ni fakag e kireb lolugen. Ri mulan’ug ndaki yag ni ngaug un ko muulung nge machib, me munmun ma aram mug tal ko machib.” Ri be kireban’dad ko n’en ni ke buch rok Anne nge chon e tabinaw rok nge ku boch e walag ni ku yad be mada’nag boch e magawon ni aray rogon!

6. Mang fan nrayog ni nge palog be’ ko girdi’ rok Jehovah ni faanra dabi fol ko fare thin ni bay ko Kolose 3:13?

⁶ Mu beeg e Kolose 3:13. Bay boch e tapigpig rok Jehovah ni kar damumuwgad ni bochan e n’en ke rin’ reb e walag u lan e ulung ngorad. I yog apostal Paul ni yu ngiyal’ e rayog ni nge rin’ reb e walag ban’en ngak yugu reb e walag ‘ndabun.’ Ku rayog ni nge rin’ reb e walag ban’en nde mat’aw ngodad. Faanra dab da kol ayuwgad ma rayog ni nge par e pi n’em u lanin’dad. Nap’an nra damumuw be’ ma rayog ni nge k’aring e re n’ey ni nge munmun me palog ko girdi’ rok Jehovah. Am lemnag e n’en ni buch rok reb e walag ni pumoon u South America ni ka nog Pablo ngak. Bay be’ ni t’ar e thin nga daken ni ke rin’ reb e kireb. Bochan e re n’ey me mul u pa’ reb e tow’ath rok u lan e ulung. Ere mang e rin’ Pablo? I gaar: “Gu damumuw ma aram me munmun mug malog ko ulung.”

7. Mang e rayog ni nge buch rok be’ ni ka be magawon laniyan’ ko denen ni ke rin’?

⁷ Faanra ke rin’ reb e walag reb e denen nib ubchiya’ kafram, ma rayog ni nge magawon laniyan’ nib n’uw nap’an. Rayog ni nge lemnag ndabkiyog ni nge t’uf rok Got. Yugu aram rogon ni ke kalngan’ ma kan dag e runguy ngak, machane ku rayog ni nge lemnag ndakuriy rogon ni nge mang reb e girdi’ rok Got. Bay reb e walag ni pumoon ni ka nog Francisco ngak ni i lem ni aray rogon. I gaar: “Ni ginangeg ni bochan e kug un ko ngongol ndarngal. Yugu aram rogon ni kug ulul ngaug un ko muulung nga tomuren, machane ri kireban’ug nib gel mug lemnag ndakuriy rogog ni ngaug chag ko girdi’ rok Jehovah. I magawonnageg e nangan’ rog, mug lemnag ndawori n’ag Jehovah fan e kireb rog. Munmun ma aram mug tal ko muulung nge machib.” Uw rogon u wan’um e pi walag ni yad be mada’nag fapi magawon ni kad weliyed murung’agen? Ga be nang fan lanin’rad, fa? Ma bin th’abi ga’ fan riy e, uw rogorad u wan’ Jehovah?

BA T’UF ROK JEHOVAH E PI SAF ROK

8. Ma pag Jehovah talin e piin ur pigpiggad ngak ba ngiyal’, fa? Mu tamilangnag.

⁸ Der ma pag Jehovah talin e piin ur pigpiggad ngak ni kar talgad ba ngiyal’ ndakurur chaggad ko girdi’ rok. Ku der ma pagtalin e maruwel ni ur rin’ed ni fan ko pigpig rorad ngak. (Heb. 6:10) I weliy Isaiah ni profet ba fanathin nrib manigil ni nge dag rogon ni ma lemnag Jehovah e girdi’ rok. I yoloy ni gaar: “Bay i ayuweg fare ran’ i saf rok ni bod rogon be’ ni ma gafaliy e saf; bayi kunuy fapi pifak e saf nga taabang, mi i fekrad ni ke uchuchumiyrad.” (Isa. 40:11) Nap’an nra tal be’ ko pigpig ngak Jehovah ni ir e En Th’abi Ga’ ni Ma Gafaliy e Saf, ma uw rogon e re n’ey u wan’? I tamilangnag Jesus rogon e re n’ey u wan’ Jehovah u nap’an ni fith pi gachalpen ni gaar: “Uw rogon ni gimed be finey? Gonap’an e mang e ra rin’ be’ ni faanra ba’ raay i saf ni fak me yan reb nga bang? Ra digey fa mereb i ragag nge mereb nem ni yad be kay e pan u sigreen e burey me yan nge gay fa binem ni ke yan nga bang. Nggog ngomed nra pirieg ma ba gel e felfelan’ nra tay ni bochan e taab binem, ko felfelan’ ni be tay ni bochan fa mereb i ragag nge mereb nde yan nga bang.”​—Matt. 18:12, 13.

9. Be’ nib fel’ rogon ni ma ayuweg e saf rok kakrom e uw rogon ni ma ayuweg e pi saf rok? (Mu guy e sasing ni bay u wuru’ e re ke babyor ney.)

⁹ Mang fan nrayog ni ngan taarebrogonnag Jehovah ngak be’ ni ma gafaliy e saf? Bochan ni be’ nib fel’ rogon ni ma ayuweg e saf rok kakrom e ri ma lemnag e saf rok. Bod ni David e cham ngak ba layon nge reb e bear ni bochan e nge ayuweg e pi saf rok. (1 Sam. 17:34, 35) Be’ ni ma ayuweg e saf rok nib fel’ rogon e yugu ra yan reb e saf rok nga bang ma manang. (John 10:3, 14) Be’ ni aray rogon e ra tay e tin baaram e saf rok nga lan e sum ara yog ngak yugu be’ ni ku ma gafaliy e saf ni nge matanagiy fapi saf rok, ma aram me yan ni be gay fare saf rok ni ke yan nga bang. I weliy Jesus e re fanathin ney ni nge fil ban’en ngodad nrib ga’ fan. I gaar: “Er rogon e Chitamangimed nu tharmiy nde adag bagayad e nochi tir ney ni nge malog.”​—Matt. 18:14.

MA GAY JEHOVAH E PI SAF ROK

10. Mang e micheg Jehovah nra rin’ ni fan ko saf rok ni ke malog nrogon ni bay ko Ezekiel 34:11-16?

¹⁰ Ri gad ba t’uf rok Jehovah ni be’ nge be’ nib muun ngay e piin kar maloggad ko ulung rok ni kan taareb rogonnagrad nga “nochi tir.” I micheg Got u daken Ezekiel ni profet nra gay e pi saf rok ni ke malog miki fal’eg bayay e tha’ u thilrad. Ki yog e n’en nra rin’ ni nge ayuwegrad ni taareb rogon ko n’en ma rin’ be’ nu Israel ni ma gafaliy e saf ni ke malog reb e saf rok. (Mu beeg e Ezekiel 34:11-16.) Som’on e ra yan facha’ ni ma gafaliy e saf ni be gay fare saf rok ni ke malog. Re n’ey e ban’en nra rin’ nib n’uw nap’an ma kub gel e maruwel ni nge tay riy. Ma tomuren ni ke pirieg fare saf, ma aram me fek nge sulweg ko gin ka bay e tin baaram e saf rok riy. Maku reb e, faanra ke maad’ad fare saf ara ke yim’ ko bilig, ma aram e ra tafalaynag fagi maad’ad rok, me chibiy nge fek, maku ra duruw’iy. Ere ku arrogon e n’en nib t’uf ni nge rin’ e piin piilal ni yad ma ‘gafaliy fare ran’ i saf ni Got e ke pi’ ngorad,’ ya nge yag nra ayuweged e piin kar maloggad ko ulung rok Got. (1 Pet. 5:2, 3) Yad ra gay e pi girdi’ ney, mar ayuweged yad ni ngar sulod ko ulung rok Got, mu kur manged fager rok Jehovah bayay.d

11. Mang e manang be’ nib fel’ rogon ni ma gafaliy e saf rok?

¹¹ Be’ nib fel’ rogon ni ma gafaliy e saf rok e manang ni yu ngiyal’ e rayog ni nge malog reb e saf rok. Ma faanra ke malog fare saf ke chuw u fithik’ e tin baaram e saf rok, ma dabi gafgownag. Am lemnag e n’en ni rin’ Jehovah nrayog ni ngan folwok riy u rogon ni ayuweg boch e tapigpig rok nra maloggad rok ba ngiyal’.

12. Uw rogon e ngongol rok Jehovah ngak Jonah?

¹² Jonah ni profet e mil ko maruwel ni pi’ Jehovah ngak ni nge rin’. Yugu aram rogon ma de mulan’ Jehovah u puluwon Jonah ni ka ngiyal’ nem. I ayuweg Jehovah Jonah ni bod rogon be’ nib fel’ rogon ni ma gafaliy e saf rok. I ayuweg e pogofan rok, miki ayuweg ni nge yib gelngin ni nge rin’ e maruwel ni kan pi’ ngak ni nge rin’. (Jonah 2:7; 3:1, 2) Boch nga tomuren me fanay Got ba ke gek’iy ni nge ayuweg Jonah ni nge nang feni ga’ fan e yafos ko girdi’. (Jonah 4:10, 11) Mang e gad ra fil ko re n’ey? Piin piilal e thingar dab ra gurgad nge mulan’rad u puluwon e piin kar talgad ko machib. N’en ni ngar rin’ed e ngar guyed rogon ni ngar nanged fan ni ke malog fare walag ko ulung rok Got. Ma nap’an nra sul bayay fare walag ngak Jehovah, ma thingari ulul e piin piilal ni ngar daged e t’ufeg ngak ma yad be lemnag rarogon.

13. Mang e rayog ni ngad filed ko n’en ni rin’ Jehovah ko fapi thin ni yog e en ni yoloy e Psalm 73?

¹³ Ri mulan’ e en ni yoloy e Psalm 73 u nap’an ni i guy ni piin nib kireb e gubin ngiyal’ nib fel’ rogorad. I lemnag ko faanra rin’ be’ e tin nib m’agan’ Got ngay ma bay angin nra yib ngak fa dariy. (Ps. 73:12, 13, 16) Ere mang e rin’ Jehovah? De yog nib kireb e n’en ke rin’ e re moon ney. Bin riyul’ riy e gagiyegnag ni ngan tay e thin rok e re moon ney nga lan e Bible. Munmun ma aram me tamilang u wan’ fare psalmist ndariy ban’en u lan e yafos rodad ni kab fel’ ko bin ngad manged fager rok Jehovah. (Ps. 73:23, 24, 26, 28) Ere mang e gad be fil ko re n’ey? Faanra bay boch e girdi’ ni be maruwar u wan’rad ko bay angin e pigpig ni yad be tay ngak Jehovah fa dariy, ma susun e dabi gur e piin piilal ngar turguyed rarogon e pi cha’ney u wan’rad. Thingar ra guyed rogon ni ngar nanged fan ni be non maku be ngongol e pi walag ney ni aray rogon, ko bin nga rogned nib kireb e n’en yad be rin’. Kemus rogon ma rayog ni nge fanay e piin piilal e Bible ni ngar pied e athamgil nga lanin’rad.

14. Mang fan ni t’uf e ayuw rok Elijah, ma uw rogon ni pi’ Jehovah e ayuw ngak?

¹⁴ I mil Elijah ni profet rok Jezebel ni leengin e en pilung. (1 Ki. 19:1-3) I lemnag ndakuriy reb e profet ni ka be pigpig ngak Jehovah e ngiyal’ nem, miki lemnag ndakuriy fan e maruwel ni be rin’. Ri mulan’ Elijah nib gel me athapeg ni manga yigi yim’. (1 Ki. 19:4, 10) Machane de yog Jehovah ngak nib kireb e n’en ke rin’, ya micheg ngak ni gathi yigoo ir e ka bay, ma rayog ni nge pagan’ nga gelngin Got, ma boor e maruwel ni ka bay nib t’uf ni nge rin’. I motoyil Jehovah ngak Elijah u fithik’ e sumunguy u nap’an ni be weliy e pi n’en be magafan’ ngay, miki pi’ boch e maruwel ngak nib beech. (1 Ki. 19:11-16, 18) Ere mang e gad be fil ko re n’ey? Gad gubin nthingar da ngongolgad ngak e pi tapigpig rok Jehovah u fithik’ e sumunguy, mab ga’ ni piin piilal e ba t’uf ni ngaur rin’ed e re n’ey. Demtrug ko ke yog be’ ngak e piin piilal ni ke damumuw ara be yog ni be lemnag ndabiyog ni nge n’ag Jehovah fan e denen rok, machane yad ra motoyil ngak u nap’an ni be weliy laniyan’. Tomuren ma aram mi yad guy rogon ni ngar micheged nga laniyan’ ni kab t’uf rok Jehovah.

SUSUN NGE UW ROGON U WAN’DAD E PI SAF ROK GOT NI KE MALOG?

15. Uw rogon u wan’ Jesus e pi saf rok e Chitamangin nrogon ni bay ko John 6:39?

¹⁵ Uw rogon ni baadag Jehovah ni ngaud lemnaged e pi saf rok ni ke malog? Ke dag Jesus e kanawo’ nrayog ni ngad folwokgad riy. Manang Jesus ni gubin e pi saf rok Jehovah nrib ga’ farad u wan’, ere i rin’ urngin ban’en nrayog rok ni nge ayuweg e “girdi’ nu Israel ni ke malog” ni ngar sulod ngak Jehovah. (Matt. 15:24; Luke 19:9, 10) Bochan ni Jesus e ir e en nib fel’ rogon ni ma gafaliy e saf, ma aram fan ni ki rin’ urngin ban’en nrayog rok ya nge dabi yan reb e saf rok Jehovah nga bang.​—Mu beeg e John 6:39.

16-17. Susun nge uw rogon u wan’ e piin piilal e re n’ey ni ngan ayuweg e piin kar maloggad ko ulung rok Got? (Mu guy fare kahol ni kenggin e “Rogon Rayog ni Nga i Lem Reb e Saf ni Ke Malog.”)

¹⁶ I pi’ apostal Paul e athamgil nga laniyan’ e piin piilal ko ulung nu Efesus ni ngar folwokgad rok Jesus. I gaar: “Thingar da ayuweged e piin ni yad ba war, ma ngan tay ngan’uy fapi thin ni Somol Jesus e yog ni gaar, Ba gel e felfelan’ ni ma yib ko pi’ ban’en ngak be’ ko bin ni be’ e nge pi’ ban’en ngom.” (Acts 20:17, 35) Be tamilangnag e re thin ney nib milfan ko piin piilal ni ngar rin’ed e re maruwel ney nib ga’ fan ni aram e ngar ayuweged e girdi’ rok Jehovah. Salvador nreb e piilal u Spain e yog ni gaar: “Gu ra lemnag rogon nri ma lemnag Jehovah e pi saf rok ni ke malog, ma ma k’aringeg e re n’ey ni nggu rin’ urngin ban’en nrayog rog ni nggu ayuwegrad. Gu manang ni baadag Jehovah ni nggu ayuwegrad.”

¹⁷ Urngin e piin kad weliyed murung’agrad u lan e re article ney ni kar maloggad e goo kan ayuwegrad kar sulod ngak Jehovah. Machane chiney e ka boor e piin kar maloggad ni yad baadag ni ngar sulod ngak Jehovah. Bin migid e article e gad ra weliy riy boch ban’en nrayog ni ngad rin’ed ya nge yag nda ayuweged yad ni ngar sulod ngak Jehovah.