N’en Ma Yog e Girdi’ u Murung’agen e Meybil
“Nap’an nug ra meybil, ma gowa bod ni bay Got u toobeg ni be kol paag ma be pow’iyeg ko ngiyal’ nda kug nang e n’en ni nggu rin’.”—MARÍA.
“I yib e cancer ko ppin rog, ma 13 e duw nga tomuren me yim’. Keb ngan’ug ni gubin e rran nug ma meybil ngak Got, ma gowa bod nri be motoyil ngog u fithik’ e kireban’ rog. Ri gapas lanin’ug.”—RAÚL.
“Meybil e aram reb e tow’ath ni ke pi’ Got ngak e girdi’ nrib manigil.”—ARNE.
Rogon u wan’ María, nge Raúl, nge Arne, nge ku boor e girdi’ e meybil e aram reb e tow’ath ni yu gub thil. Rogon u wan’rad e rayog ni ngar nonad ngak Got, mar pininged e magar ngak, mar ninged e ayuw rok u daken e meybil. Rib mich u wan’rad nriyul’ e n’en be yog e Bible u murung’agen e meybil ni gad ma tay ngak Got, ni aram e be gaar: “Aram fan nib pagan’dad u p’eowchen Got; mmudugil u wun’dad nra rung’ag e tin ni gadad be yog ni faan gadad ra ning ban’en ngak ni ban’en nib m’agan’ ngay.”—1 John 5:14.
Machane boor e girdi’ nde mich u wan’rad e n’en be yog e Bible u murung’agen e meybil. Baaray e n’en ke yog Steve u murung’agen rogon ni ma lemnag e meybil. I gaar: “Nap’an ni gaman 17 e duw rog, ma bay dalip e fager rog nra m’ad. Bagayad e chafin e karrow ni bay u langgin nge yim’, ma l’agruw i yad e ra limochgow u maday ngar m’ow.” Ere mang e rin’ Steve? I gaar: “Gu meybil ngak Got ni nge ayuwegeg nggu nang ko mang fan ni ke buch e pi n’ey, ma de fulweg taban e meybil rog. Ere ug fitheg ni lungug, ‘Mang fan ni nggu meybil?’” Boor e girdi’ ni yad ma lemnag ndanir fulweg taban e meybil rorad. Ere aram fan ni yad ma lemnag ko ri mang fan ni ngaur meybilgad.
Ku bay boch i fan ni ma lemnag boch e girdi’ ndariy rogon ni ngaur meybilgad. Bay boch e girdi’ ni yad ma yog ndariy rogon ni nga rogned ngak Got murung’agen e tin nib t’uf rorad ara pi magawon rorad ni bochan e manang urngin ban’en, ere ku manang e tin nib t’uf rodad nge pi magawon rodad.
Ku bay boch e girdi’ ni yad ma lemnag ndabun Got ni nge motoyil ko meybil rorad ni bochan e kireb ni ur rin’ed kafram. I gaar Jenny: “Bin th’abi ga’ e magawon rog e gu ma lemnag ndariy fag. Bay boch ban’en ni ka ug rin’ ni kug kalngan’ug riy, ere gu ma yog ngog u lanin’ug ndariy rogon ni nge motoyil Got ngog.”
Uw rogon e meybil u wan’um? Faanra taareb rogon e lem romed e pi girdi’ ney, ara bay boch ban’en u murung’agen e meybil ni be maruwar u wan’um, ma rayog ni nge fel’ lanin’um u nap’an ni ga ra nang nrayog ni nge pi’ e Bible e fulweg ko deer rom. Rayog ni nge pagan’dad ko n’en be yog e Bible u murung’agen e meybil,a ma rayog ni nge ayuwegem ni ngam pirieg e fulweg ko pi deer ni baaray ni be gaar:
Riyul’ ni ma rung’ag Got e meybil rodad, fa?
Mang fan ni bay boch e meybil ndanir fulweg taban?
Uw rogon ni nge rung’ag Got e meybil rom?
Mang angin e meybil ngom?
a Boor e tapigpig rok Got ni bay e meybil rorad u lan e Bible, ni kub muun e meybil rok Jesus Kristus ngay. Pi Babyor ko Bible nni Yoloy Nsom’on ni Thin ni Hebrew ni kub ga’ ni yima yog e Bin Kakrom e M’ag ngay e ba pag 150 e meybil ni bay riy.