Ke Buch Ban’en nib Manigil ni Bochan e Siminmin ni Tay Be’!

IMMOY l’agruw i ppin ni yow be yan u Baguio City u Philippines, ma aram mar guyew ba cart ni yima fanay u nap’an ni yibe machib ko yungi n’en ma muulung e girdi’ ni yoor ngay, machane da ranow ko re cart nem. Bay reb e walag nib pin ni ka nog Helen ngak nib sak’iy u tooben e re cart nem ni sap ngorow me siminmin. Yugu aram rogon ma de tal e gal ppin ney ko fare walag, machane dar pagew talin rogon ni sap Helen ngorow me siminmin.

Boch nga tomuren u nap’an ni yow be yan u bus nga tabinaw, mi yow guy reb e Tagil’ e Liyor ni bay bangi sign riy nib ga’ ni bay e jw.org riy. Ere yib ngan’row ni aram e re thin ni kar guyew ko fare cart. Ere ra oggow u bus nga but’, nga ranow ko gin bay fare Tagil’ e Liyor riy. Nap’an nranow ko yoror ko fare Tagil’ e Liyor, ma aram mar parew ngaur yaliyew e ngiyal’ ni ma tay e pi ulung e muulung rorad riy.

Ere un fa gal ppin ko bin migid e muulung nni tay. Nap’an nranow nga lan fare Tagil’ e Liyor mar gingow u nap’an nra guyew Helen! Ka chingiyal’ nem me yib ngan’row ni ir facha’ ni sap ngorow me siminmin. I gaar Helen: “Nap’an nra bow i yib ngog, ma dake nggu rus ya kug lemnag ni bay ban’en nib kireb ni kug rin’.” Machane me weliy fa gal ppin ngak Helen e n’en ke buch.

Ri felfelan’row ni kar unew ko muulung, ma dar magagawongow ni ngar chaggad e pi walag u taabang. Nap’an nra guyew ni bay boch e walag ni yad be klin u tomuren e muulung, ma aram mar fithew ko rayog ni ngkur piew e ayuw ko klin fa dabiyog. Bay bagayow e gal ppin nem ni ke chuw ke yan i par nga yugu reb e nam, ma bagayow e ke taabab ni nge un ko muulung ma ke tabab ko fol Bible. Gubin e pi n’ey ni buch ni bochan e siminmin ni tay be’!