1 | Meybil “Mpaged Fan Urngin e Magafan’ Romed Ngak”

BE GAAR E BIBLE: “Mpaged fan urngin e magafan’ romed ngak [Got], ya be lemnag rogomed.”—1 PETER 5:7.

N’en Be Yip’ Fan

Be yog Jehovah Got ngodad ni ngad weliyed ngak urngin ban’en ni be tomalnag lanin’dad nge gum’ircha’dad. (Psalm 55:22) Gubin e magawon nrayog ni ngad yibilayed murung’agen. Faanra ba ga’ fan u wan’dad, ma kub ga’ fan u wan’ Jehovah. Faanra ud meybilgad ma aram reb e ban’en nib ga’ fan nrayog ni nge ayuwegdad ni nge munmun me gapas lanin’dad.—Filippi 4:6, 7.

Rogon Nrayog ni Nge Ayuwegey

Faanra be mo’maw’ ni ngaud lemgad nib fel’ rogon, ma rayog ni ngad lemnaged ni yigoo gadad. Gathi gubin ngiyal’ ni manang e tin ka bay e girdi’ rogon e magawon ni gad be mada’nag. (Proverbs 14:10) Machane nap’an ni gad ra weliy rogon lanin’dad ngak Got u daken e meybil, ma gubin ngiyal’ nra motoyil ngodad maku manang rogon lanin’dad. Ma guydad Jehovah ma manang e pi n’en ma amithnag lanin’dad nge pi magawon rodad, ma baadag ni ngad weliyed urngin ban’en ni be magafan’dad ngay u daken e meybil.—2 Kronicles 6:29, 30.

Ra ud nonad ngak Jehovah u daken e meybil, ma aram e rayog ni ngari pagan’dad ngay ni ma lemnagdad. Rayog ni nge taareb rogon e lem rodad e en ni yoloy e Psalm ni faani meybil ni gaar: “Ga be guy e gafgow rog; ga manang e oloboch rog [“pi n’en nri be k’aring e magafan’ ngog,” NW].” (Psalm 31:7, BT) Faanra gad manang ni ma guy Jehovah e pi magawon ni gad ma mada’nag, ma rayog ni nge ayuwegdad ni ngad athamgilgad u fithik’ e pi magawon nem. Machane gathi kemus ni be guy e pi gafgow ni be yib ngodad, ya manang e n’en gad be yan u fithik’ ma ma fanay e Bible ni nge fal’eg lanin’dad me pi’ e athamgil ngodad. Dariy be’ nrayog ni nge rin’ e re n’ey nib fel’ rogon ni bod ir.

Rogon ni Be Ayuweg e Bible Julian

Rogon ni Ma Magawonnageg e Magafan’

“Bay fa gal m’ar rog ni ka nog e anxiety disorder nge obsessive-compulsive disorder (OCD) ngay. De mudugil e ngiyal’ ni ma magafan’ug. Ba ngiyal’ e ba fel’ rogog, ma ba ngiyal’ e ma yib e magafan’ ngog nib pag rogon ni yugu dariy tapgin. Ba ga’ ni ma magafan’ug u nap’an nug bay u fithik’ e girdi’. Ri ma magafan’ug ko n’en yad ma lemnag u murung’ageg.

“Piin yad manang e magawon rog e rib ga’ e ayuw ni yad ma pi’ ngog. Yu ngiyal’ e n’en yad ma yog e gathi aram e n’en nug be athapeg ni nggu rung’ag. Machane ba ga’ fan u wan’ug ni yad be guy rogon ni ngar ayuweged gag.

“Yu ngiyal’ e ba mo’maw’ ni nggu meybil ni bochan e gal m’ar ney ni bay rog. Ba t’uf ni nga rug athamgil ya nge yag nug tiyan’ug u nap’an nug be meybil mug non ngak Jehovah. Ba ga’ ni ma yan yan e lem rog me k’aringeg ni nge balyangan’ug. Ra dabkiyog ni nggu gagiyegnag rogon e lem nug be tay, ma aram e ba mo’maw’ ni nggu weliy ngak Jehovah e n’en bay u lanin’ug.”

Rogon ni Ma Ayuwegeg e Bible

“Kug fil u daken e fol Bible nug ma tay nde t’uf ni nge n’uw e meybil rog ara nga u gog boch e thin riy nrib fel’ rogon ya nge yag ni fel’ u wan’ Got. Yu ngiyal’ e faanra dabiyog ni nggu weliy e n’en bay u lanin’ug, ma kemus nug ma meybil ni ma lungug: ‘Jehovah, mu ayuwegeg.’ Yugu aram rogon ma gu ma thamiy ni manang Jehovah rogon lanin’ug ma ma pi’ e n’en nib t’uf rog e ngiyal’ nem. Ku reb e ban’en ni kug rin’ e aram e kug wan gu un ko tafalay. Gub felfelan’ ngay ni nggog ni gali n’ey e ke ayuwegeg ni nge fel’ boch rogog. Yugu aram rogon nib t’uf ni nga rug athamgil ya nge yag ni nggu ning e ayuw ngak e Chitamag ni bay u tharmiy, machane gu ma rin’ ni bochan e ba mich u wan’ug ni gub t’uf rok ma baadag ni nge ayuwegeg.”